أخبار السودان

موكب شندي.. الكلام دخل الحوش

موكب الاحرار – موكب الخلاص – موكب ثوار شندي الأول اليوم الجمعة 11/1/2019
مرقنا عشانك يا شندي ضد العسكر والطغيان
وفيك يا شندي المؤجر مابناضل * والمحرش ما بقاتل
في شندي نحن قدرك يا معارك *ونحن نورك ونحن نارك
نور بيحمل الرسالة * ونار بتحرق الضلالة
بالواضح كده: بعد الكلام دخل الحوش والاتهامات بموالاة شندي النظام وخوف ناس شندي – آها حا تشوفوا والتاريخ بشهد وبتكلم (شندي مرقت)
ناس شندي ما مفترض نوصيكم (أهل المك نمر ودار جعل) – بعدين نحن في شندي اهل عز وكرم وشجاعة والتاريخ يشهد بذلك.
هتاف من الأعماق سلمية سلمية ضد الحرامية، من غير تخريب ومن غير تكسير لانو شندي حقتنا ماحقت الكيزان
عشان البنزين البتقيفو ليهو صفوف لحدي الدسمة وبي مزلة واهانة وعشان الرغيف البتساهرو ليهو للصباح
عشان الدواء المافي والمعدوم وعشان عيون أطفالنا بكره يكبروا يتعلموا

• خط سيرنا ولقاءنا
– يوم الجمعة الموافق 11/1/2019 م موعدنا
– التجمع بعد صلاة الجمعة مباشرة من المسجد العتيق (مسجد السوق الكبير)
– التحرك من المسجد الكبير باتجاه المستشفى التعليمي حتى تقاطع البنك الزراعي
– العودة من تقاطع البنك الزراعي مع الوقوف قليلاَ بقسم الشرطة الفاشل وتعالي الهتوفات # تسقط بس # ووصولاً لتقاطع السكة حديد وحزقيال.
• نحن الثوار يشملنا
– أبناء شندي والهمهم الأول شندي والبحبوها
– كل المربعات والاحياء
– شفاتة شندي فوق والدايما فوق
– الديامة حطب القيامة
– التراس جماهير نادي الاهلي شندي
– أصحاب الركاشة والاتوزات (علشان البنزين البتقيفو ليهو صفوف والمرور الكرهكم حياتكم)
– شيبان شندي الاكارم
– اخوات وبنات دار جعل
– أبناء المتمة ومنبع الجعلية
– واهل الكرم والشهامة (السيال الكبير والسيال الصغير -العقدة -الحميراب -العبدوتاب -الكرده -الجوير المغاوير -طيبة الخواض -قوز بدر كلي الابيضاب -الهوبجي -سلوة الجريف -الجابراب -حجر الطير الثورات وود حامد …..الخ )
– المسيكتاب والشقالوة وديم القراي وكبوشية البياكلو النار حية

  • موكب الاحرار – موكب الخلاص – موكب ثوار شندي الأول 11/1/2019

لو مابتمرق معانا ساعدنا بالشير بث

وللثورة حكاية ولشندي رواية

‫2 تعليقات

  1. تقصد حوش بانقا!؟ إيه الغشامة والهبالة دي؟ شنو دار جعل ولا دار بقارة ولا دار هدندوة. ما قصة قبايل وما في قبيلة أرجل من قبيلة! ولو كان الأمر كذلك فقد سبقتهم القبائل في المدن التي بادرت بالثورة. هي دي العقلية والخيابة القومت الانتفاضة دي. بلا جعل ولا مساليت الكل سوداني وكل تربى في السودان لا يرضى الذل والمهانة وقد فات على الانجاس احترام هذه الخصلة وانبهروا بمال الشعب في أيديهم وغرتهم سلطة الدولة وسلاحها فاعتقدوا أنهم قد تمكنوا من إعادة صياغة هذا الشعب الأبي وتخويفه وإخضاعه ولكن هيهات هيهات … وهذه الانتفاضة لاستعادة هذه العزة والكرامة السودانية التي دنسها هؤلاء المنبتون ومسحوا بها الارض وجعلوا من كان يحترمنا يهزأ ويسخر منا بسبب هذه العقلية والروح الانهزامية التي مكنت لهؤلاء السفلة الجيعانين من حكمنا كل هذه المدة.

  2. ســــؤال:
    لم لم تخــــــرج مدن كريمة نوري مروي كورتي في مظاهرات الشعب للحين!!؟
    ولم لم تخرج مناطق المناصير وابو حمد!؟؟
    ولم لم تخـــرج قطاع كبير من احياء مدينة كسلا؟
    وفي مظاهرة الحلفايا من هم المتخلفـــــون !!؟
    نريـــد على هذه الاسئلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..