بتعرفو الكلب طبعاً
*وكلو بيت لو مافيهو كلب
*بكون قبل كدة اتربى فيهو كلب
*لو الكبار مابحبو الكلب
*الصغار بجبروهم يقبلوا بالكلب في البيت
*طفولة الكلب تكاد تكون أجمل طفولة مخلوق في الدنيا دي
*المهم
*كلنا بنعرف الكلب
*ذلك الوفي الصادق البشوش
*نعم الكلب البعضي ده بشوش
*شوف لما تكون جاي على بيتكم
*وكلبكم يكون برة
*ويشوفك
*يفرح….. يهز ضنبو
*ويجيك جاري
*يملاك شعبطة
*ويافليلك لو كان الكلب قبل جيتك رقد ليهو في طين
*يقابلك ببشاشة
*ولو جيت مارق يودعك برضو ببشاشة
*وحلاتك لما تجي مارق قاشر بالجلابية الماخمج
*وكلبكم يجي بي وراك ويتشعبط فيك
*ويكون جاييك من الطين المبلل كل الخور الجمبك..
*المهم
*كلنا بنعرف الكلب
*كلنا ربينا كلب
*وكلنا لينا مواقف مع الكلب
*والغريبة لو جيت شاقي حلة
*ولقيت كلب ناس برة
*واداك زرة
*تاني خجلة ساي مابتجي بالشارع ده.
*المهم ..
كلنا بنعرف الكلب
*بنعرف بنوم كيف
*بفرح كيف
*وبعبر عن زعلو كيف
*وبحمر للنملة كيف
*وبياكل كيف
*واكيد بنعرف الكلب بشرب كيف
*وبنحتار بي شرابو ده بروي كيف ؟!
*أها
*طريقة شراب الكلب دي
*بتشبه لي كلام الخبراء الاستراتيجيين
*البجيبوهم في القنوات ديل
*دحين كلامهم مازي شراب الكلب ؟!!!!!!!
*المهم
*في ظل الظروف الصعبة دي
*اتجه بعضنا لترشيد الصرف المالي
*واختصروا الاشياء
*الصلاة ذاتها فكروا يقصروها
*انهم ينشدون التوفير
*قرش ابيض لاجل يوم اسود
*لا اظن ان هناك اياماً سوداء في ظل اشراق متل هيك حرية ننعم بها..
*ونصيحتي للناس البتجوع عشان توفر قولي ليهم
*خليك عاقل يازول
*أكل قروشك ماياكلها الدكتور
*والدكاترة انا راجع ليهم
*معقولة
*حاجة فوق للتمنين
*تقول ليها دايرة رنين وصورة سادة للكبد بدون تلوين وصورة مقطعية للصدر اليمين وموجات للبروستاتة؟ معقولة يادكتور انين؟؟؟؟
*أها
*نجي لي شمارات والي الخرتوم
والينا المكلف علينا
*سبعة فحوصات والعلاج برة؟؟؟ معقولة يا اخينا؟؟؟؟
شمارات الكلب
ننساك كيف والكلب قال زعلان يا سلك… انا بشرب زي كلام ديل؟؟؟؟ والله حقو الواحد يعضيك
وإلى لقاء
سلك
كلام الطير في الباقير – صدقوني ما فاهم حاجه من الكلام ده – – يا سلك يبدو انو اسحق فضل الله عداك باسلوبه
يا سيف عشان افهمك برااااحة حصل نبح فيك كلب فجأة !!!
طيب نقرب ليك الحكاية حصل سمعت التوم هجو ومن علي شاكلتو بيتحدثوا !!!!
يا هو القاصدو سلك وقع ليك
كلام ساخر وجميل وذو معني واضح. العربية عصية علي الفهامة.