مهادن الزعيم
¶ قبل م نشوف اخطاءنا شنو في موكب 17 يناير تعالو نشوف انتشار العسكر كان كيف ومبني علي ياتو استراتيجية …
¶ اول حاجة عملو صندوق محكم يبتدي من جاكسون غربا (10 تاتشرات ابوطيرة) لحدي م توصل استاك شرقا ح تلقى كم دفار كجر مع مدرعات البمبان والموية وفي ضهرهم طوالي شمالا (تقاطع المريديان) في عشرة تاتشرات تاني من ابوطيرة ويستمر الوضع هكذا لحدي م بقى في خمسة نقطا تأمين في شارع القصر وحده (من الملاحظ كل المركبات الموجودة في اطرف المربع تحمل لوحة الشرطة) …
¶ داخل المربع كمية كبيرة من قوات لابسة لبس الشرطة بس التاتشرات الراكبنها لوحاتا ملاكي وهم لافين شالات في وجوههم (وديل انتشرو في الاستاد واطراف جاكسون والقندول وغرب المول واغلب التقاطعات المهمة بوسط العربي) …
¶ اما قواتهم الموجودة في الكباري كانت في حالة استعداد ومعاهم حاويات ورافعة وسلك شائك ومتاريس حديدية لمنع تقدم الثوار في حالة نجحوا في الوصول اليهم …
¶ محيط مول الواحة ومنطقة البنوك جابو فيها بكاسي من صباح الرحمن وفيها ناس لابسين ملكي وفكوهم هناك (ديل مهمتهم الانتشار داخل المواكب والرصد والمتابعة لاي حركة قبل م تقوم داخل المربع والتبليغ عنها ليتم ضربها واجبار الثوار علي التراجع خارج المربع) …
¶ نجي بعد دا للاخطاء الوقعنا فيها والعساكر بنوا عليهم خطتهم بتاعت محاصرة موكب امس عشان نقدر نعالجا في المواكب القادمة بإذن الله …
1/ (محاولة اقتحام المربع من اتجاه واحد) .. محاولة اقتحام وسط السوق العربي من اتجاه واحد (شروني) زييها زي محاولة الدخول عبر الكباري لانو بتدي العساكر الفرصة يركزو اكبر قواتهم في النقطة المستهدفة بالاقتحام عشان كدا كانو قاعدين كمية في شارع القصر مع وجود اخف في باقي السوق واشتغلوا احلال وابدال مع القوات الفي الخط الامامي لانو مساحة المواجهة نقطة واحدة فقط ….
2/ (تأخر الإعلان عن نقاط تجمع الموكب) … تنسيقية الولاية اعلنت عن نقاط تجمع موكب 17 يناير متأخر شديد (قبل اقل من 24 ساعة من الموكب) ودا غلط من وجهة نظري وكان المفروض تكون قبل تلاتة يوم مع حملة اعلامية مكثفة تتكلم عن النقاط المعلنة داخل السوق العربي ودا بخلي النظام قدام طريقين فقط (اما يقفل الكباري ويقطع النت) ذي كل مرة ودا بساعدنا في العصيان المدني ي (يغيرو من طريقة الصندوق العاملن)و دا لانو النقاط في عمقه (على فكرة ممكن تلقى زول لحدي هسه م عارف انو نقاط التجمع كانت في السوق العربي بسبب تأخر الاعلان وضعفه) …
3/ (عدم الالتزام بالحشد في النقاط المعلنة) .. بالرغم من انو التنسيقية اعلنت عن موكب مركزي ينطلق من عدد من النقاط داخل السوق العربي (قرابة الخمسة نقاط) لكن م كان في اي التزام بيها لا من قبل الثوار ولا من قبل اللجان المنضوية تحت جسم تنسيقية الولاية عشان كدا كانت في مواكب في بحري وامدرمان وشرق النيل وحتى الناس الجو العربي مشو باشدار فقط …
¶ (الحلول) : في ستة ابريل قدرنا نهزمهم بحاجتين فقط (كتلة بشرية كبيرة + الالتزام بالنقاط الداخل الصندوق) ودا الخلق ليهم الربكة والتشتيت عشان كدا ياريت لو التنسيقية اعلنت عن موكب مركزي تاني تحدد نقاط التجمع داخل المنطقة من نفقي بري والجامعة شرقا لحدي الاستاد غربا وتلزم كل اللجان بتفعيل هذه النقاط وتمنع اي مظاهرة بعيدة من هنا (عشان تخلي كل الحشد يجي العربي) وتهتم بالزمن شوية وتعلن النقاط بدري عشان ي يقفلوا الكباري يا يلقونا جوة القصر …
سلام ومحبة
