عبدالوهاب همت
الانسان الفنان المرهف والشاعر الرقيق الدكتور علي الكوباني أخصائي الطب الشرعي والذي يتلقى العلاج من مرض السرطان في دولة الامارات العربية المتحدة، لم يغب عن البال ، حاولت مداعبته أول الامس الخميس 10 يناير2019 في أن يقوم بإرسال تسجيل صوتي من قصائده للثوار، لكنه كتب لي الاتي:(( تحية النضال والثورة والمجد لشعبنا الصابر الابي .
أولاً أنا الان للأسف بدون صوت تماماً بعد رجع السرطان في الحلق، وشالوا كل الحنجرة بالجراحة والان أخضع للعلاج الاشعاعي والكيميائي ، وأسأل الله العلي القدير الشفاء التام.
إعزازي وفخري بكلماتك النبيلة لاحدود له. ربنا يحقق أماني وتطلعات شعب السودان ويتم علينا زوال الطغمة الفاسدة المفسدة ، ويعين بلدنا على النهوض.
وأنا في غرفة انتظار الاشعاع البرتون في معركتي لعلاج السرطان يا أحباب..
وجدتني أردد خاطرة اهزوجة للذين يخوضون المعارك الاكبر والأشرف ضد الطغيان وتجار الدين في بلدنا..
ورغم انها كلمات بسيطة بس مليانة حب للنضال.. أرجو ان تليق بإحساسي ببطولات أهلنا في بري واتبرا ومدني وكل مدن السودان الشريفة الثائرة..
نعم.. اضعف اضعف الايمان لكن ما باليد حيلة..
وقلت: ـ
انا بريد البراري.. بخاطري واختياري
حب من جوه قلبي.. وما بعرف اداري
ـ ـ. ـ ـ.
عشان فيهم شهامة.. بقوا للسودان علامة
قالوا خلاص كفاية.. للفسدة الظلاما
الهدموا عشم بلدنا.. وكتلوا كمان ولدنا
عشانم هم مرقنا.. وما بنرجع نواري
ـ ـ. ـ ـ.
ومن اتبرا انطلقت.. هبت ثورة طلعت
وفي مدني الارادة ..بشاير الفرحة هلت
يجينا صباح جديد.. راجينو زمن بعيد
وللسودان يعيد.. أمجاد الزراري
ـ ـ. ـ ـ.
وتسقط بس تسقط بس.. القالها ما مندس
حاشاهو النضيف وعفيف.. ماهو الوسيخ الغث
مندسيين الحراامية.. السرقوونا علنية
والقسموونا زندية.. وجزوا وطنا جز. .
وتسقط بس ..تسقط بس.. القالها ما مندس..
وتسقط بس.. تسقط بس.. القالها ما مندس.. ))
✌✌✌✌✌✌✌✌✌
#تسقط_بس
د. الكوباني وعد بكتابة قصيدة متى ماكان ذلك ممكناً ، ورغم معركته مع الداء اللعين لكن معنوياته في السماء ، ويرى أن معركته خفيفية مع معارك الشعب السوداني الذين شرعوا في منازلة السرطان البشري الذي فتك بشعب السودان منذ 1989.
نتمنى لك من صميم الفؤاد وأنت الفارس الشامخ أن تتماسك وبلاشك فأنت فاعل لتسحق هذا الداء ، لتسرع الخطى وتحتل مكانك بين الثوار ، فأنهض سريعاً فالشعب يريد أن يستمتع بعذب كلماتك وحلاوة ألحانك.
نسأل الله العلي القدير للشاعر الكبير تمام الشفاء والعافية
الله ينعم عليك بالشفاء العاجل وتشهد ظهور السودان الجديد فعلا