محمد معانا ما تغشانا

الوفد الاسرائيلي جانا

*ونحنا نقول محمد معانا ماتغشانا

*بتاع الامم المتحدة قالوا جانا

*ونحنا بنقول محمد معانا مايغشانا

*المايتسماش قالوا سرا جانا

*ونحنا بنقول محمد معانا ده بالذات مايغشانا

*والفات وفات وفي ديلو سبعة لفات

*قد يبتلي الله بعض القوم بالنعم

*نحنا ديل بعض القوم القصدنا الشاعر

*فنعمة الارض الزراعية ونعمة الدهب ونعمة الموية ونعمة الثروة الحيوانية ونعمة المعادن باشكالها وانواعها ونعمة (الطيبة)

*اتتنا بنقمة

*فصرنا عمق اقتصادي لدول بترولية وعمق استراتيجي لاثيوبيا وهدف استعماري للغرب وحوش بقر لمصر

*كل الناس ديل مصلحتهم في ان نظل كدة

*نختلف مانتفق

*نتهاتر

*نعيش بين دكتاتورية ثم ثورة ثم تتم سرقتها ثم عشر دقائق ديمقراطية ثم دكتاتورية لتنقذنا من فشل الاحزاب ثم ثورة تتم سرقتها ثم خمس دقائق مدنية ساكيها مجروس ثم دكتاتورية تصحح للناس ثورتهم حسب زعمها

*وخلال كل ذلك

*قطنا وسمسمنا وصمغنا تغزو الاسواق العالمية بديباجات اجنبية !!

*حتى بقرنا

*تورنا أب جاعورة ده

*بقي يقول لينا عليكم الله اسي التور انا ولا التور انتوا؟؟؟؟

*ونحن نظل نردد مع كل شر جايينا

*محمد معانا ماتغشانا

*أيها الناس

الشباب الذي لبى نداء الوطن بصدور مفتوحة للرصاص ولسان حاله يقول

*ونطلع بره للشارع في وش الريح

*في وش الريح بنتحدى

*نقيف للطلقة نتمدى

*عن اهدافنا وعن المبدأ

*ابدا ماحانرتد

*أيها الناس

*انه جيل وأدناه تحت ثرى الحرمان وضنك العيش

*فشب برغم كل ذلك عينو مليانة

*انه جيل تاتيناهوا بين الخوف الذي عشناه والنفاق كي يعيش

*فشب برغم كل ذلك شجاع

*انه جيل سحبنا من مقررات المدارس في عهده التربية الوطنية وادخلنا بدلا عنها العسكرية

*فشب برغم كل ماحدث جيلا مدنيا ينشد المدنية ويهتف مدنيااااااو

*انه جيل ولدناه فربانا

*وعملنا حب الاوطان وشرف التضحية وقيمة الانسان

*جيل معمول بحب

*وتحضرني قصة المسطول العايش مع ابوهو في البيت

*المسطول متزوج وعندو اولاد ما شاء الله

*الشفع خمسة اوقات بالجامع

*والابو الوضو فيهو كم ركعة ماعارف

*والجد يعاين بي عينو سااااي

*يوم الشفع مشوا الجامع

*جدهم قال لابوهم

*اسي اولادك ديل مابتخجل منهم؟؟خمسة اوقات يمشوا الجامع وانت مترمتل مع عواليقك ده تنفخ وتلف اليوم كلو؟

*المسطول قال لابوهو

عشان تعرف الفرق بين تربيتي وتربيتك ياحاج !!

*أها

*نجي لي شمارات والي الخرتوم

*والينا المكلف بينا

*لسة سمسم السويد بمشي النرويج بدون ما عائد الصادر يجينا؟؟؟

شمارات الكلب

ننساك كيف والكلب قال سمسم السويد يمشي النرويج كيف مع درب الشمال الحبنو  ابي يفتح ده!

والى لقاء

سلك