المخدرات خطر عالمي عموماً أضحى خطراً داخلياً على وجه الخصوص
*والمخدرات أنواع
*نباتية وهي التي لايتم تصنيعها أو تحويلها قبل ما الزول يطفحها
*ومثال لها القنب الهندي كما تطلق عليها المعامل الجنائية والمحاكم ويسميها القانون
*ونبات القنب الهندي هو البنقو الواحد ده
*البنقو العادي ده
*ومن فرط خطورة المخدرات المصنعة
*أفتى بعض فقهاء البنقو بأنه أي البنقو لايبطل الوضوء
*ويحكي أن جماعة بتاعين سجارة مشوا لي صاحبهم عندهم بنقو شديد لكن ماعندهم برنسيس
*برنسيس لغير الناطقين بها هو الورق الذي يلف بداخله البنقو والسجارة الحمراء
*المهم الجماعة ديل كايسين البرنسيس عشان كده مشوا للمعلم صاحبهم
*لسوء حظهم لقوا صاحبهم معاهو ضيوف من أهلو
*بقوا يدخلوا ويمرقوا
*لما كتروها صاحبهم قال ليهم مالكم؟؟؟
*قالوا ليهو دايرين لينا كفن
*قال ليهم ميتكم راجل ولا مرة؟؟؟
*قالوا ليهو ميتنا مرة
*قال ليهم في راس المزيرة ديك
*شيلوا كفنكم وخلوا الباقي
*الحوار الدار ده لغة مفهومة لدى ناس البنقو
*دايرين كفن يعني دايرين برنسيس نلف بيهو سجارتنا
*ميتكم راجل ولا مرة
*يعني سجارتكم بي كرت ولا بي كرتين
*لأنو كفن الراجل قطعة واحدة وكفن المرأة سروال وعراقي يعني قطعتين
*المهم
*غير المخدرات النباتية في مخدرات صناعية وهي التي تدخل عليها كيمياء تلعن أبو خاشة
*تلقى الزول زي موية زمان
*لالون له لاطعم ولا رائحة
زول يجيك ماشي عديل مابترتح ولا تفوح منه رائحة الخمر
*وعلى الرغم من كده تلقاهو ماياهو
*يبسم في محل لاعلاقة للبسمة به
*وماببكي الغريبة زي سكارة زمان
*النوع الببدأ معاك الموضوع
*ثم يشبكك طالبني حليفة؟
*وفجاأة يقعد يبكي
*المخدرات المصنعة دي متعاطيها ماببكي لكن ممكن يبكوا عليهو في أي لحظة
*جرعة زايدة بتودي لي بكرت والمقابر طوالي
*أما النوع التالت والأخطر من المخدرات
*هو المخدرات السياسية
*وخطورة هذا النوع تتمثل في انتشارها الواسع والسريع دون أن يشعر بها أحد
*فتصيب شعباً كاملاً
*المخدرات النباتية والصناعية تنحصر آثارهما السالبة على من يتعاطاها
*أما المخدرات السياسية فتنتشر بين الناس ولو كانوا خلفا مابتعاطوا شي
*فيدمنوها شأنهم شأن بقية الشعب
*النوع ده من المخدرات يا وداك السوق تلقط من الكوش
*ياوداك صينية المرور رافع جلابيتك
*ياوداك تشاد لاجئاً
*ياوداك الدايمة والناس حايمة
*وكل أنواع المخدرات تنتشر بقوة في ظل الظروف الاقتصادية السيئة للوطن والمواطن
*وإن كنا نريد تربية أبنائنا وإبعادهم عن تلك الدروب
*علينا أن نعيد تربية كبارنا المفسدين الفاسدين ونحارب الفساد بقوة
*فالمثل بقول شبعو حتى تطبعو
*انتوا دايرنو يعيش جعان وخرمان وواعي كمان؟؟؟؟؟
*أيها الناس،
*تستطيع المخدرات أن تصنع من وطننا مرتعاً للمساطيل والمخابيل وسكان المقابر
*فهل نريد لوطننا ولشبابنا ذلك؟؟؟
*إذن علينا بحرب الفساد لأجل إصلاح الاقتصاد
*أو يكيل الرماد حماد
نجي لي شمارات والي الخرتوم
*والينا المكلف بينا
*كفن راجل ولا كفن مرة حضرتوا لينا؟؟؟؟
شمارات الكلب
ننساك كيف والكلب قال مرة سطلت بمخدرات سياسية عضيت روحي.
وإلى لقاء
سلك
نقلاً عن الحراك
