حميدتي زعلان مني

ترددت كثيراً في الإتصال بالفريق أول محمد حمدان دقلو ، رغم رغبتي الشديدة في ذلك ، والسبب أنه ليس لي سابق معرفة بالرجل ، كما أني أراه متوتراً هذه الأيام وخفت أن يرفض الحديث معي ، ولكني حزمت أمري وقررت محادثته من أجل (المصلحة العليا للبلاد) .

: ألو
: السلام عليكم سعادة اللواء حميدتي .
: و عليكم …، ولكن أولاً أنا ما لواء ، أنا فريق أول ، وتانياً ما تقول لي حميدتي، أنا ما بعرفك عشان تهظر معاي ، ولا قاعد أتونس معاك قدام ست شاي ، إسمي محمد حمدان دقلو.
: معليش سعادتك أنا والله ما شاطر في معرفة الرتب العسكرية دي ، وبعدين إسم حميدتي فيه شنو ؟ ما كل الناس بقولوا ليك حميدتي .
: يا سيد دا إسم عائلي خاص جداً ، سمتني بيه حبوبتي لما كنت شافع ، زي ما كل حبوبة بتدلع أحفادها وما ليكم شغلة بيه … وزمان كنت بقبل الإسم من الشعب لأنو كان بحبني زي حبوبتي ولكن الآن الوضع إختلف .
: آسف جداً والله سعادتك ، ومعاك حق في ما قلت ، يعني لو عملنا كدا حنقول عبودي لحمدوك ، وتوحة للبرهان و شوشو للكباشي ومريومة لمريم وهكذا …  والله معاك حق ، المفروض نكون جادّين شوية في مخاطبة المسئولين.
: يعني وقع ليك كلامي؟
: مية المية سعادتك .
: طيب إنت منو وعايز شنو؟
: أنا مواطن غلبان …
: دا ما تعريف ، البلد دي فيها 30 مليون مواطن غلبان .
: يعني إنت حاسي بالحكاية دي؟
: يا زول إنت أهبل ولا شنو؟ إنت ما قاعد تشوف خطاباتي في التلفزيون ولا  ما قاعد تقرا الراكوبة؟ ما أنا  كل يوم بكرر في الكلام دا لي حد ما جاب لي هوا .
: بعيد عنك الهوا سعادتك.. بس الهوا جاييك من فض الإعتصام ؟ .
: ما تستعجل على فض الإعتصام ، عندكم لجنة تحقيق إنتظروها لي حد ما تعمل التقرير بتاعا ، وإنشا الله رئيس اللجنة يكون راجل ويقول الحقيقة .
: يعني إنت ماليك دور في الحكاية دي .
: إجايتي واضحة .. أنتظروا اللجنة … وكلوا (بالقانون).
: سعادتك والله أنا كنت عايز أفضفض معاك شوية لكن شايفك متوتر .
: و الله أنا المحتاج أفضفض ، ولكن ما لاقي زول يسمعني مع الأسف .
: لا ما تقول كدا سعادتك ، إنت ليك شعبية كبيرة ومحبوب من قطاع واسع من الشعب ، وممكن يسمعوك بكل إحترام .
: و الناس البقولوا عليّ جاهل وفريق خلا وجنجويد وما سوداني ، ديل تقول فيهم شنو ؟ .
: حسادة سعادتك ليس إلا … حسادة .
: حسادة ولا خسة وغدر وخيانة يا مواطن ؟ الناس نِست بسرعة أني طلعت زعلان من الإجتماع الكان البشير بقول فيه أنو عندو فتوى بقتل تلتين الشعب ، طلعت وقلت ليه في وشو (أعوذ بالله) ، والعاملين فيها ملايكة ديل واصلوا الإجتماع وعملوا الدايرنو … وبعد دا كلو الشعب بيسخر مني ويسميني الفريق خلا … وبيتهمني بفض الإعتصام .
: بس سعادتك حكاية فريق خلا دي حقيقة ، أنت ما درست عسكرية ..
: يا مواطن العسكرية دي طب ولا هندسة ولا علوم فضاء؟ يعني عمر المختار درس عسكرية ولا المهدي درس عسكرية ولا خالد بن الوليد درس عسكرية ؟ دا شغل دواس ، داير ليه زول قلبو حديد وعينو شرارة … وبس .
: طيب دي وافقناك عليها  بس عايزين تبرير لمشاركة جماعتك في فض الإعتصام .
: ياخي أنت مش مواطن غلبان ، إنت مواطن حيوان … كيف عرفت أنو جماعتي شاركوا في فض الإعتصام ؟ .
:  كانوا ظاهرين في الفيديوهات وهم بيضربوا في الناس .
: و كيف عرفت أنهم فعلاً جماعتي ؟ .
: من ملابسهم .
يضحك بسخرية وحزن

: يعني يا مواطن لو أنا أديتك هدومي دي ولبستها حتكون الفريق أول محمد حمدان دقلو ؟ .
: طبعاً لا سعادتك ، ولكن هل تقصد أنو ديل ما جماعتك ؟ .
: أنا بأكد الكلام دا ، أنا غدروا بي المجرمين الكبار … ولبّسوا جماعتهم ملابس الدعم السريع .
: مين هم .
: إنت عارف وكل الشعب عارف كيف (حدس ما حدس) ، ولكنكم جبناء ..
: لا يا سعادتك ما تظلمنا ، نحن ما جبناء ولكن إنت عارف ، ورانا عيال عايزين نربيهم … وبعدين أنا شخصياً شايفك رجل إبن بلد وقلبك على السودان وحاسي أنك حزين يعني ما (حميدتي) … عفواً ما الفريق أول دقلو بتاع زمان … مالك ؟ .
: أيوه حزين ، لأنو عايزين يدخلوا الدعم السريع في الجيش ، نحن أقوى من الجيش و لحمنا مر ، بالله عليك يا مواطن في إنسان عاقل بفكر يدخل ليه صقر في بطن جدادة ؟ .
: يعني إنتو صقور ؟ .

: أيوه .
: والجيش جداد ؟ .
: حمام … ولي حد هنا كفاية .
: معليش سعادة الفريق دا كلام خطير عايز توضيح .

I said to you that is ENOUGH : .
: بس معليش سعادة الفريق أول محمد حمدان دقلو أنا عايز …
: سيبك من الدهنسة دي … أنا الحبيب (حميدتي)…
: شكلك عايز تنضم لحزب الأمة بعد حل الدعم السريع !!! .
: أفهمها زي ما تفهمها  يا الحبيب ..
: طيب كلمة أخيرة يا الحبيب .
: الله أكبر و لله الحمد …