حميدتي نديك ليها من الآخر

خليل محمد سليمان

سوء حظك لم تجد ناصح امين بين عشيرتك ، او مستشاريك ..

ايّ زول قال ليك عندك مستقبل سياسي في البلد دي بقوة السلاح ، او بالامر الواقع ، و الإرهاب بمليشيا صنعها النظام البائد لأجل القتل ، والسرقة ، والإغتصاب قد اوهمك.

نعم من حقك ان يكون لك طموح سياسي ، ولكن بعد ان تتخلى عن قيادة هذه المليشيا ، وتصبح مدني بالكامل وتعمل عمل اهل السياسة.

بالامس تساءلت عن اين تكمن المشكلة؟ .

انت اساس المشكلة ، واسها ..

اعتقد من تفاوضوا معكم بإسم الثورة من عواطلية ، و متسكعين ، وانتم تمثلون لجنة المخلوع الامنية ،  فاوهموكم عبثاً بأنكم شركاء في الثورة والتغيير.

انتم من مخلفات النظام البائد شئتم ام ابيتم .

اول خطوة للتفكير في الضمانات التي وردت في خطابكم يجب التخلي طوعاً انت ، واسرتك عن قيادة مليشيا الجنجويد  العابرة للحدود بشهادة كل العالم .

ثم يتم وضع آلية من خبراء وطنيين لعملية دمج وتسريح السودانيين منهم في الجيش ، والحياة المدنية ، ومن أُستقدم من خارج حدود الوطن توفق اوضاعه ثم عليه بالمغادرة.

الإستمرار في التعنت ، وفرض الامر الواقع سيقود كل الشعب السوداني للمقاومة التي لا قِبل لكم بها ، بإعتبار انه تحت إحتلال ، فالتظاهرات في شوارع الخرطوم التي ذكرتها بالشارعين او ثلاثة فهي نزهة ، فالقادم اسوأ .

كسرة ..

توجد محكمة مُفرغة بالكامل من سنوات تعمل لأجل إكمال إجراءات تجنيس افراد مليشيا الدعم السريع القادمين من خارج الحدود .

من المعروف كيف يتم إستخراج الاوراق الثبوتية، من جنسية لجواز سفر ، لبطاقة شخصية ، واخيراً الرقم الوطني ..

ما دام جابت ليها محكمة تعمل  بتعليمات يبقى في تزوير ، وتجنيس خارج القانون ، وما ادراك ما اليمن ، والإرتزاق بإسم السودان.

كسرة ، ونض

حميدتي قال ليكم تعالوا للحوار وهو  جاهز ، بطلوا مظاهرات ، وعوارة في شوارع الخرطوم .

كسرة ، وتلاتة ارباع ..

نقل حميدتي عن  كامل مدير المخابرات المصري .. يجب ان يكون الحوار سوداني سوداني.

يا ربي السودانيين الح يقتنع بيهم حميدتي للتوسط في الحوار ديل منو، ومين الح يسميهم؟ .

اخيراً ..

قسماً بالله يا حميدتي ، والسجمان البرهان تفتشوا للمهلة الإنتو فيها دي بشق الانفس ، وما ح تطولوها.

فكروا في خلاص انفسكم، فالشعب احق بتقرير مصيره ، ويعرف مصالحه.

بعد ماسورة روسيا الحقو إتخارجوا لو اصلاً في طريق للمخارجة.

أللهم قد بلغت فأشهد ..

[email protected]