مهدي يوسف إبراهيم
توطئة
شهد حفل الأوسكار للعام 2022 حدثاً فريداً، حيث قام الممثل “ويل سميث” بصفع الممثل الكوميدي ” كريس روك ” وذلك بسبب سخرية الثاني من زوجة الأول والتي تعاني من مرض سبب لها صلعاً كاملاً …و في الاسكتش أدناه أحاول تناول هذا الحدث من زاوية سودانية ساخرة بعض الشيء ….
…………….
(مذيع يحدّث المشاهدين من داخل استديو، بينما يظهر في الخلفية مراسل القناة في واشنطن)
– سيداتي سادتي ..مساكم منقة ..و يسعدنا في برنامجكم ” أضواء على اللساكِر” (جمع تفجيغ لكلمة أوسكار) أن نتناول اليوم حدثاً ساخناً سخانتو تلحم ….معاكم محدثكم “الطاهر ود حمد” ..و معانا من واشنطن مراسلنا ” التوم ود عجيب ” …( ثم ملتفتاً صوب المراسل) خبرك شنو يا التوم؟
– شديد وحاة أبو الجيلي …
– ضارب لي الروقة في واشنطن شايفك لامن قامنلك كضيمات..
– ياخوي و الله تجدع “عشة الجبل” فوق ملياراتا …
– قالوا البلقى الهوا بضرّي عيشو
– اضرّي بس ؟ و الله اضرّي و ازرع عيش جديد كمان …
– أها متين جاي ؟
– بعد كهربتكن دي تتصلح …ما بدور أصوم في القهبونة دي يا ود عشوشة ..
– طيب أخبار اللوسكار شنو ؟ قالوا السنة دي مختلف من كل اللسكار الفاتن
– ها زول هوي …والله كان مولّع تولّع البطان في دار جعل …
– سمعنا يا التوم قالوا في شكلة …
– شكلة و الله ناقصالا عكّكّز و حجّار …
– بين منو و منو ؟ نعل ما فوقا التوم ود كروز …
– لا لا ..”التوم ود حاج كروز” أظنو سافر جيهة “رفاعة نيويورك” يشوف بت خالتو الضربتا كرونا …الشكلة كانت بين ناس فريق “كريس ود حاج روك” و “ويل ود حاج سميث” ..
– مالن الله يقطع طاريهن؟
– يا زول “كريس ود حاج روك” كان بقدّم في حفلة اللوسكار ..كل شي كان ماشي تمام …الناس منجعصين فوق مقاعدن مرخمين .. الضربلو ببسي و الضربلو كركدي و الضربلو شربوت ..
– و اللهِ لاقنها أولاد ال ……خواجات !!
– دنيتن …الاشبعو فوقا ..شاحد الكريم يتقلو في جهنم تقلّي السمك في طاجن علوية في الموردة ….
– ياخ بطل الحسادة و وريني الحصل شنو ..
– الحصل إنو “ويل ود حاج سميث” كان قاعد حدا وليداتو و مرتو ام صلعة ديك …المرة كانت رايقة و بتشرب في سجارة برنجي ..مرطبة رغم إنو راسا عدمان الشعرة …التقول بيضة جدادة ..
– شن صلعبها ؟
– أصلاً الجنا “ويل ” دا أبوهو ” حاج سميث” من جيهة شندي …جعلي من قبيلة ” السميثاب ” …و ديل جو من الجزيرة العربية بدري خلاس ..بقولو بنحدرو من قبيلة جهينة …المهم …قالوا قبل خمسة سنين كانت “جادا” – مرة الجنا “ويل” – ماشة فاتحة جيهة “جبل أم علي “..كانت راكبالا برينسة موديل 78 ..و فجأة انقلبت بيهن و هي و ولعّت النار فوق رويسا و سببتلها سعلبة …
– ممكن توضح لي المشاهدين السعلبة دي شنو
– السعلبة دا مرض بحت الشعر حتة “البرهان” من أخلاق الرجال و”حميدتي” من التفكير ..و يخلي الرّويس زي قرع “ود العبّاس” في المثل الشهير البقول …..
– (مقاطعاً برقة) كدي نرجع لي الشكلة ..حصلت كيف و سببا شنو ؟
– الجنا “كريس ود حاج روك” من شوايقة “نوري”…و عقابو راجع لي ” الرويكاك” …و جدهم كان شهرتو ” الروكاك الضرب الكوراك” ..
– الضرب الكوراك ؟
– بلحيل …قالوا مرّة من ذات المراري نزل هو البحر يعوم مع اصحابو ..بس يقوم يمرقلهم تمساح قدر الكتلة و يبدا يبلعلك في أصحاب “الروكاك” زي الزلابية في حلق شافعاً جيعان … صاحبنا الروكاك” لمن شاف المنظر بقى يكورك زي المجنون …جدودنا قالوا صوتو وصل أسوان ..و من هنا جاءت التسمية المعني يعني…
– كدي رجعني لي الشكلة
– شيل الصبر …انت لاحقلك صف بنزين؟
– ياخ المشاهدين بدورو يعرفو الحصل شنو
– (بشيء من التقعر) ياخي لابد من قراءة تاريخية لي الصراع بين السميثاب و الرويكاك
– ( متأففاَ) طيب
– قالوا القبلتين اتشكلو في جرف قريب من النيل ..اتضاربو لمن عكاكيزن وصلن السماء السابع…و القصة وصلت المحاكم …الرويكاك كانوا كيزان و تابعين لي المؤتمر الوطني …و السميثاب جدهن الكبير كان أنصاري بايع الإمام الهادي في الجزيرة أبا
– أها
– بس ..القاضي كان كوز معفّن فحكم لي مصلحة الرويكاك ..أها السميثاب حردوا البلد ..فيهن الطش مانعرفت جيهتو و فيهن المشى ينقّب في الدهب و قالوا فيهن واحد مشى حارب في ليبيا و من هناك طش أمريكا …
– ياخ بعد شوية حا تقول لي حبوبتن أم جميل زوجة أبو لهب ..ياخ ارجع لي الشكلة …
– سمح .. ( ثم ممسكاً بعلبة بيبسي) كدي النجغم لي حتيتة من الببسي الليلي دا …
– ( مهمهماً ) يجغمك تمساح يخليك جتة برا راس ..
– ( و هو يمطق خشيمو ) الحمد آلاف …و الله الخواجات ديل لاقنها ..يلقاهن مرفعين جيعان في شارع مدني الخرطوم بي الليل …
( تمر ثواني ثمّ)
– ضربت الببسي خلاص؟
– و الله الواحد أكان لقالو سندوشتي فول بي بصلة من ملجة المناقل ..يومو يبقي مية مية …
– ياخي رجعنا لي الشكلة ….
– انت مالك جاري لي الشكلة ؟ شن الشر النزل فوقك فجأة دا ؟
– ياخي مش دا سبب البث ..
– البث؟ أشكو بثي إلى الله منك ….المهم زي ما إنت عارف “كريس ود حاج روك” خشيمو خفيّف ..و كان ما لقى زول ينكّت فوقو..بنكّت فوق رقبتو …أول شي مسك الناس قداهن بي كم نكتة مرض من شريط “محمد موسى” داك ..و تاني ” جاب كم نكتة سياسية عن حميدتي ..و لمن شاف الجو بيض و مافي زول هببّو عاين ليك لي راس مرة “ويل ود سميث” و فكّالك فوقا نكتة ..خلا الناس دي مصارينا تتقطع …
– يا زووول …
– وحاة أبو حفيظة صحي …
– أها ..
– “ويل ود سميث ود جبارة الله” حاول يتماسك ..علاّ وكت شافلك الناس تضحك و مرتو تبكي و تتنخّج ..و تقش في نخرتا بي مناديل جابن ليها ود خالتا الشغّال في عرعر …يا زول النار قامت فوقو
– أها
– بتعرف وليدو داك اب رويساً متل السوسيو الوقع في برمة عجين؟
– دا الجنا العمل مع “جاكي ود شان” فيلم “شافع الكراتيه” ؟
– بس ياهو ذاتو
– بلحيل بعرفو
– الجنا دا كان ماسكلو مسجل اب سماعات ..كان بسمع في غنية ” أب عاجات اللحو ” و يهوزز فوق رويسو متل القاعد فوق تندة لوري و خشيمو ملان ود عماري من محلات ” ود السانية” الفي المناقل.
– أها
– بس “ويل” ختفلك المسجل من ولدو و مشالك جيهة “كريس ود روك” الكان واقف نص المسرح بضحك
– أها
– بس جبدلك منو المايك و رفع صوت المسجل ,,و بقى يرقص زي الكبّو فوقو تلج في الشتا ..كريس المسيكين جا يرقص جنبو …و يهز في رقبتو زي نسوان الهدندوة …و فجأة …
– أها ..
– “ويل ود سميث” رفعلك يدو اليمين و طااااااخ قشطلك “كريس ود روك” كف خلالك راسو تلف متل مروحة الطربيزة …
– لااااااااااا
– وحاة “الجيلي ود النادر” …و قبل الناس تفيق من الصدمة ..ردفلو بي كف ساموطي لمن كباية الشاي الشربا الصباح جلبغت في ذاكرتو …
– لا حول و لا قوة إلا بالله
– و قالو كدي اتشبكو …شبكة قراد في مؤخرة بقرة …
– قدام الكاميرات ؟
– قدام انظار العالم كلو يا زول …الحضور في الأول قايلين القصة دي جزء من العرض ..علّا بعد شوية عيونن مرقن قدامن من الصدمة زي عيون توم لمن جيري يدقلو مسامير في ضنبو….بس قشطة الكف التانية صحتن ليك و قالوا كدي قاموا يحجزوا …
– قدروا يحجزوا ؟
– قدروا بعد جهدٍ جهيد …بس “ويل” دا لمّ ليك في “كريس ود روك” نبذ السنين ..لا خلاّلو حبوبة باعت عرقي زمان ..لا خالة فرشت طماطم …لا بت عم هزّت روب ..لا ود عم اشتغل مونة …يا زول بربحو ليك تبربح الغصن ….
– هع ..عفيت منو و الله
– و قالوا كدي وليداتو بقوا يهزو ورا ..و مرتو ترقص رقبة ..و بناتو يزغردن …و بت خالتو شلت شريط “قيقم” و بقت تغني ” النار ولّعت بي قلبي بطفيها”..
– و التصوير كان شغّال ؟
– المخرج في الأول اندهش التقول شاف أب لمبة …علّا بعد دقايق مسك المايك و قال ” أيها السادة …نمرق شوية استراحة و نجي صادّين بعد دقايق “…
…………
…………
………..
فجأة يظهر شاب أمريكي أبيض قرب ” التوم ود عجيب” ..وينظر إليه لثواني و يهمهم ” الزنوج مليتو البلد ..الله يلعنكن” … ثم لا يلبث أن يقشط ” التوم ” كف لمن علبة الببسي تجلبغ في البلاط ..
يلتف المذيع صوب المشاهدين و يقول و هو يبتسم في بلاهة ” سيداتي سادتي ..نستأذنكم نمرق في كف ..اقصد استراحة قصيرة و نرجع …سلااااااااااااااااااااام ”
….
جدة
28/3/2022
من يقيم المواضيع التى تنشر بالراكوبة يعنى اى كلام وخلاص المهم الموقع يكون مليان!!!!!!
عليك الله شوف شغلة غير الكتابة!!
عليك الله شوف شغلة غير الكتابة!! والله مفروض انت ال تاخد الكف ده