هل تعتذر ( الانتباهة ) عن سقطتها اللغوية الواردة في اعتذارها ؟
كنا في مهمة عمل بمدينة بورتسودان قبل استفتاء الجنوب علي الوحدة وفي مكتب استقبال الفندق وبينما كان المدير يرتب لنا أمر أقامتنا دخل علينا شاب عشريني وبعد أن سلم مدير الفندق مفاتيح قام بتحيتنا أنا ومديري ودعانا لندوة مهمة جدا علي حد تعبيره تقام مساء ذات اليوم بالمدينة ، سألته عن القائمين بأمر الندوة اجابني : منبر السلام العادل واردف أها بتجونا ؟ اجبته بصوت عالي : لا ما بنتشرف والله … صدم الشاب وبان عليه الضيق وجلس في كرسي مواجه لي وسألني ممكن اتناقشك معاك شوية ، اجبته بنعم … سألني عدد من الاسئلة ، اوردها لك عزيزي القارئ ومعها كل اجابة مني .
س : أنت سوداني ؟
ج : نعم .
س : أنت موش ود عرب ؟
ج : انا سوداني دي كفاية ود عرب دي شنو كمان .
س : شكلك ود عرب ، أنت موش مسلم ؟
ج : نعم مسلم .
س : طيب أنت عارف أنو الجماعة ديل لو ما أنفصلوا الجيش دا ، جيشنا دا ح يكون أكتر من نصه منهم ما مننا ؟
ج : والله ما عارف عدد قواتهم لكن أها يعني شنو ؟
وابتسم الشاب ابسامة بلهاء واعتقد انه قد امسك بزمام الامور والنقاش وانه لا محالة منتصر واستعدل في جلسته وبدأ موجهاً حديثه لنا كلنا ( يا جماعة لمن الجيش يكون منهم معناتها السلطة ح تكون في يدهم وبكدا البلد دي ما ح يكون فيها شريعة أسلامية ، عشان كده نحن عايزنهم يطيروا ونبقي نحن بلد عربي مسلم مائة في المائة ) أنتهي وعلقت عليه باختصار ( أنا مع الوحدة وعايز العاصمة تكون جوبا ما الخرطوم ، والسودان شماله ما عربي ولا أي حاجة وكمان فيه ديانات تانية غير الاسلام وأنا عايز الدين يقيف في مسافة متساوية من كل الاديان وأنت والطيب مصطفي ممكن عادي ترجعوا الجزيرة العربية لو متضايقين وشكراً ) ..
عذراً للمقدمة الطويلة ولكنها ضرورية في فهم الانتباهة لسان حال منبر السلام العادل وخطها المنادي بعلو كعب القبائل من الاصول العربية ، وعنصرية الصحيفة لسان حال منبر السلام العادل لا تحتاج لاثبات فيمكنك عزيزي القارئ مطالعة اي عدد منها وستجد ذلك ، لذا لم اندهش للاعلان المشين المنشور بها والذي ( يتقاطع تماماً مع سياساتها الراسخة واخلاقياتها وادبياتها ) والأعلان يطلب بنات سودانيات بمواصفات محددة : عمر ، جمال ، لون ….. ولا اشك البتة انهم بنشر الاعلان قصدوا مع سبق الاصرار والترصد ارسال رسالة محددة مفادها أن الفتيات ذوات البشرة السوداء غير مرغوبات في العمل وفات عليهم أن في نشر الاعلان قوادة صريحة ناهيك عن التمييز السلبي لفئة من النساء ، ويبدو أنهم قد ادركوا فداحة الأمر فنشروا اعتذار مبررين ان النشر حدث لعدم الدقة وسهوا ، دعونا نتقبل الاعتذار ولكن كيف فات عليهم وهم احفاد الناطقين بالعربية أن كلمة يتقاطع المنشورة في الاعتذار ومعها التأكيد تماماً تعني (الأتفاق) … هل تعتذر الانتباهة صحيفة العرب عن هذا الخطأ الفادح ؟ اقلاها في حق اللغة العربية .
مقتبس من الأعلان ( وتؤكد الصحيفة أن الاعلان المذكور مر سهواً عبر غربال الصحيفة الدقيق وأنه يتقاطع تماماً مع سياساتها الراسخة وأخلاقياتها وادبياتها )
الناس ديل كانوا ما بعرفوا عربي ما بعرفوا الخطوط المتوازية والخطوط المتقاطعة في الرياضيات ؟ بالمناسبة الصحيفة دي فيها كلمات متقاطعة ؟ لو فيها ينادوا الموظفين كلهم ويقول ليهم الكلمات المتقاطعة يعني المشتركة في حروف.
بالمناسبة كلنا ( بما فينا الخال الرئاسي) عند العرب ( فروخ) (خال) أو اذا تهذب اللفظ نكون (زولات)
فليطمئن الطيب مصطفي وغيره ممن ( المتوركين) اكثر من الترك و( المتعوربين) اكثر من العرب وهكذا فقدنا مساحة حدادي مدادي كان يمكن ان ينتشر فيها الاسلام دون تاشيرة او باسبورت —- أنا السودان كلمة جميلة يتلخص فيها تاريخ السودان الضارب في الجذور الممتدة الي ما قبل العرب حاملا كل الرسالات التي مرت علي الانسانية والتي يطلب منا ديننا الحنيف التصديق بها—- علينا نحن ( السودان) ان نرفع الصوت عاليا باسم السودان الشعب والمكان للعودة كما كان السودان.
تستاهل البخليك تقرأ جريدة الغفلة شنو
شوف يا باشا لو عندك مشكلة مع الانتباهة ومنبر السلام العادل ده حقك وانا شخصيا عندي معاهم اضعاف ما تحس به من مشاكل وضيق من جهلهم وسطحيتهم، لكن عليك ان تنتبه ان هذه الصحيفة لا تمثل العرب في السودان او غيره بل تمثل تيار معروف ومحدد والعرب في السودان لا يمثلهم احد وليس لاحد ان يدعي الحديث باسمهم منبر او خلافه لا ن العربيه لم تعد عنصرا بل هي ثقافة، وهولاء النفر من الناس هم قمة العنصريه والسفه والسطحيه هم عار علي السودان وسبب كثير من مشاكله وحروبه يجب ان يحاكمو بجريمة الخيانة العظمي ويمنعو من ممارسة اي نشاط عام طيله حياتهم البائسة
نرجو تقبل التعليق وتحية للوطن والام السودانية
الاخ التلب مشكور علي المرور والتعليق … لم أعني تحديداً انها تمثل العرب أو القبائل العربية ولكن قصدت المفارقة فيما تدعيه الصحفية ( أنها تمثل العرب في السودان ) وأن تخطئ في الكتابة بذات اللغة التي تتدعي انها تمثلها ، بالغ أسفي لعدم توضيح الأمر بهذا الشكل في متن المقال ولك العتبي .
اعتذارك ما بفيدك ! العملتوا كان باييدك ، واخلاقيات ومثل الشعب السودانى ليست محل لعب واعتذار…….اتحمل الجاياك يا ايها الخال الرئاسى
شكرا لك،، ماسمي إعتذار، فعلا،… ما ورد فيه يتقاطع! اي يتفق مع خط الصحيفة العنصري والرزيل معا، ويشبهها تماما، و يلتقي معها، في نقاط التلاقي، (س،ص) مثلا، لأن المتوازى مع الشيء، لا يلتي معه “الخطان المتوازيان، لايلتقيان، في اي “نقطة” وهذه ابجدية، لكن هل حقيقة ان الاعلان، يتوازى مع خط الصحيفة التحريري والايدلوجي ام يتقاطع؟؟؟ سمح القول في خشم سيدو…
(( (يتقاطع تماماً مع سياساتها الراسخة واخلاقياتها وادبياتها )) انتهي الاقتباس ، لاحظ تماما، ماتقاطع خمج “تماما”الاعلان يطلب بنات عرب!! وفقا لعقل الانتباهة، او شماليات، والمعاينات (في الكويت)!!؟؟ بعد فرز الصور الكاملة، التي تبين، اللون الفاتح، الخمري، والطلة الحلوة، والقد المياس، والقوام السمهري، ضمن شروط التقديم للشغل!!؟، وبمباركة وفاتحة وزارة العمل!!، حكومةو الناس مظلومه،شريعة والناس عاملين زريعة؟؟! اي والله.. حسب ترويسة الاعلان، وسمسرةالخال الدلال، ونشر صحيفته الانتباهة الفاتية!!، الداعية للشريعة!! بنوعيها مدغمسة!! ومصغية!!، مدد!!!السؤال لماذا لم تنشر الصحيفة “الفتوى الشرعية”؟؟ والمصاحبة للاعلان، التي تبرر سفر البنات بدون محرم وفقا لفقه المظاريف السلطانية!!؟ او لسنا، في دولة السماء، وشريعة الله، ويحك يا (صفصفة)!! حتى لانموت بغيظنا يا ايها الطفل المعجزة!! بارون الاستثمار،…. ,في اي باب من ابواب الفقه؟؟؟ يقع هذا العمل!!! حتي يحسب في ميزان حساب الخال والانتياهة عظيمة الانتشار، في بنك الضلال ، صحصحوا يرحمكم الله
تابى الحقائق الا وان تسفر عن نفسها. هكذا هم اهل الاتباهة وهكذا اهل الانقاذ لا ينتج من التعالى على الناس الذين اكرمهم الخالق والنظرة اليهم بدونية الا القوادة و هتك الاعراض والاغتصاب واع شئ مهين ومهدر للكرامة. لا خير فى اهل الانقاذ ومن شايعهم ومن جلس معهم ومن له اية صلة بهم
طيب شريف نيجيريا شايلين حالو وناقريين طارو مالكم!!!!!! المسكين كان راضي ب إختيارات الكموسنجية والوكلاء في الخرطوم البشحنو ليهو البضاعةوعلى مسؤولية اربابو!!! اصلو المسكين شرطو واحد ومختصر في كلمات بسيطة ملخصها (العجالي يكون لاحم)!!!! حليلك يالشريف ياالمادير صورة حتي من جنب واحد….. وشرط العمر مفتوح عند معاليك !!!!!!!ومطبق نظرية الفحل ما هو عواف بحذافيرها!!!!! تسلم من ناس بوكو حرام بتاعينك وجماعة بوكو حلال تبعنا !!!!!!
الطيب مصطفي يدعي العروبة ولا يتقن اللغة العربية او انه يتقنها ويعني ما يقول ان هذا هو فعلا ما تدعو له صحيفته (نشر الرذيلة والدعوة لها) وبمناسبة انه يفتكر انه عربي يقال ان سوداني شمالي في احد الدول العربية ساله الكفيل عن اسمه فقال له اسمي عبيد فرد له العربي ادري انك عبيد بس ويش اسمك ؟
المدهش في الاعلان المشين الذي نشر بالانتباهة انه يبرز العنصرية ضد النساء السودانيات داكنات البشرة او غير العربيات بصريح العبارة وفي ذات الوقت يقدم السودانيات البيضاوات او فاتحات البشرة ومن اصول عربية يقدمهن كسلعة رخيصة بكل وقاحة..اذن ما هو فضل البيضاوات علي السوداوات يا ناس الانتباهة ؟ سحقاً ..سحقاً لمن لم يتعظ بقول رسولنا الكريم ( دعوها فإنها منتنة ).
ياخوان ناس الانتباهة كانوا فرحانين انو اخوانهم الكوايته المتعوربين جوهم وبيباشروا معهاهم بزنس11 ومالتفتوا لاعلان الوضييعععععع!! واها اخوانك العرب مشغولين من شاكلة ده!! ودايرين يجسوا العروبة الناديتوهم ليها مش يحثوها!! ولزوم الزعل شنو!!!مابيضيفوا ليكم نقاء عروبي اصلي!!!!