مقالات سياسية

موبايل خارج التغطية (لاتوجد شبكة)، بهذه الطريقة يمكنك الاتصال بالطوارئ

مواطن سعودي منزل فيديو عن كيفية طلب الطواريء في حالة انو الزول تاه في الصحراء وجواله خارج التغطية (لاتوجد شبكة) ، وضح من خلال الفيديو انو الجهاز يمكن ان يتصل بالطوارئ حتى ولو كان خارج التغطية فقط عليك استخدام خدمة الطوارئ و الاتصال بالرقم ١١٢ وحا تستجيب ليك اقرب وحدة طوارئ ، وللتجربة قام باخراج الشريحة من جواله واتصل على الرقم ١١٢ وفي كسر من الثانية تمت الاستجابة وكانت المحادثة التالية :
-السلام عليكم عمليات الطواري معاك مين معاي؟

– معاك ……
– من وين تكلمنا ؟
-انا اكلمك من البر (الخلاء) وعامل تجربة عملية عشان اعلم الناس البتتوه في الصحراء انو ممكن ان يتصلوا بالطواري بدون ان تكون هتالك شبكة بالجوال
_ نعم صحيح يمكن ذلك
– انت من اي طوارئ ؟
– انا من طوارئ الدمام
– انا بعتزر لازعاجكم
– نحنه في خدمتك
(انتهت المحادثة)

صراحة اندهشته للموضوع وشعرته باهمية الفيديو وقلته دي معلومة مهمة ولازم الناس تنشره على اوسع نطاق ، تاني فكرته اني اجربه قبل نشر الفيديو ، قمته ختيت الجوال في وضع طيران وقمته اتصلته بالرقم ١١٢ و جاتني تيت تيت تيت وعبارة تم انهاء المكالمة فكعادتنا نحنه السودانين ننظر لاي حاجة بالتشاؤم حسيت انو الخدمة دي مستحيل تكون موجودة بالسودان حمدته الله اني بتصل وانا في غرفتي وفكرته اني لو كنت في الصحراء كانت اتلحسته ولحقته امات طه.

لكن في لحظة قلته اخلي السلبية واكرر المحاولة وكم كانت دهشتي فبمجرد اتصالي جاني رد سريع :
مرحب معاك شرطة النجدة معاي منو
– معاك مقدم شرطة معاش عوض كرنديس
مرحب سعادتك ممكن نخدمك بشنو
– والله انا بعتزر شديد لازعاجكم لكن حبيت اجرب خدمة الاتصال بالطوارئ ١١٢ واتاكد انها شغالة بالسودان فختيت التلفون وضع طيران واتصلته
: ابدا مافي ازعاج سعادتك انت متصل من وين ؟
– انا متصل من الصحافة وصراحة سعيد باستجابتكم
: العفو سعادتك ده واجبنا
– شاكر ومقدر وفقكم الله
: اميين سعادتك في رعاية الله

صدقا ادهشني الامر واتمنى ان ينشر الموضوع على اوسع نطاق فالخدمة دي ممكن تساعد ناس وتساهم في انقاذم في مواقف محرجة كثيرة ما حالة ضل الطريق فقط فرجاء المساهمة في نشرها وتنوير الجميع بها .
مقدم شرطة (م)
عوض كرنديس

تعليق واحد

  1. دى حقيقة ولا طلس يا كرنديس ؟ هههههه كان تقول ليه متصل من معسكر كريندينق عشان يعرف حاجة و تكون كرنديس و كريندينق ههههه.

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..