قضائية شيطان بس

*المحاماة مهنة ممتعة ورائعة وتمثل ضلعاً مُهماً من أضلاع العدالة

*هي مهنة تفتح أبواب الثقافة لمنسوبيها من أوسع الأبواب

*هي مهنة إعمال العقل فيها وجوبي وضروري وشرط من شروط الانتماء إليها

*في السودان مفروض نغير اسم المحاماة إلى اسم المعاناة

*المحامي السوداني يعاني ويعاني لما يفقد كل المعاني

*بما فيها معاني الهمة ومعاني ضبط النفس

*إذاً لماذا؟؟؟؟

*،ببساطة لأن بيئة العمل في المحاكم بمختلف درجاتها

*وسوح العمل من أراضٍ ومساحة وتسجيلات ومسجل عام شركات ومسجل أسماء عمل ونيابات

*كلها تمثل بيئة رديئة جداً للعمل

*لذا تجد المحامي في سن النبوة يعاني الضغط والسكري ويعاني توقعات الجلطات وموت الفجاءة

*الموضوع ده طويل

*عشان كده الليلة حا أتكلم عن المحاكم بس وباختصار

*إذا عندك إجراء في ملف دعوي

*والقاضي طلب الملف قول تسعة صباحاً

*وأنت مشيت لموظف القاضي

*وموظف القاضي طلع الملف

*حايقول ليك شوف ليك حاجب يشيلو

*أنت مابتقدر تعرف الحاجب من العين

*لأنو مافي زي معين بميز الحاجب

*ولا ديباجة

*ولا في حاجب مختص بعمل قاضي ومتواجد في قاعة القاضي

*ممكن تبحث عن الحاجب لي اطناشر وماتلقاهو

*وممكن تلقاهو ويقول ليك أنا ماحاجب

*وممكن تلقاهو ويقول ليك شوف حاجب مولانا فلان أنا ماشغال معاهو

*وتقعد تبحث النهار كلو بحثاً عن حاجب مولانا أحلام دون جدوى

*محكمة بدون حواجبين

*أو بي حاجب واحد شغال مع جميع القضاة

*وإذا جبت شافع قلت ليهو ارسم لي الشيطان

*مهما اختلف الرسم

*إلا أن جميع الرسومات ستتفق في أن الشيطان لاحاجب له

*أو له حاجب واحد

*فهل قضائيتنا بعدم حواجبينا ده أو بحاجبها الواحد في أحسن الفروض

*شيطانية؟؟؟؟

*ياسعادة رئيس القضاء

*هذه المحاكم تحتاج لتنظيم وتهيئة بيئة عمل مناسبة

*تحتاج لموظفين كافيين

*وتحتاج لحجاب كافيين

*لكل قاضي حاجب

*ولكل حاجب زي مميز

*يعرفه كحاجب

*ومامعقول بعد الرسوم الخيالية دي

*تستكتروا لبسة لحاجب يكفينا عناء البحث عن حاجب يعلي على العين والراس كمان

*ياسعادة رئيس القضاء

*محاكمك شوية

*ماممكن مدينة قدر الثورة حاراتها فوق للمية

*بالإضافة للقرية

*ويكون فيها محكمتين

*واحدة فيهن بيت مستأجر

*وتلقى القاضي شغال مدني وجنائي وشرعي وحاجب في بعض الأحيان

*يا قضائية

*حني علي أنا ياستي

*الحاصل بي سببو انتي

*سنعود

*ونعود للأراضي والتسجيلات والشركات والنيابات

*أها

*نجي لي شمارات والي الخرتوم

*كان شفت يا والينا

*لو في زول طالبنوا قروش وأبا يدينا

*مابنمشي المحكمة يا والينا

*الرسوم هاتهرينا

*سنتين حكم مابيطلع لينا

*أمشي وتعال بتهد حيلنا الفينا

*أخير نعفيهو يا والينا

شمارات الكلب

ننساك كيف والكلب قال البشيل حقك عضيهو وما تشتكيهو

وإلى لقاء.

الحراك السياسي