*الماء
*منه كل شئ حي
*في السودان ده بقى مشكلة
*موية في العين
*موية في الركب
*موية في الرئة
*إلا الحنفية موية مافيها
*وتمتد مشكلة الموية في السودان إلى الأرض
*موية سطحية تطلع على حوائط الناس بصورة جنونية
*وتهدم المنازل بمنتهى السهولة
*راجع أبو روف وبيت المال وتعويضات بيت المال شمال وجنوب والعرضة جنوب
*بيوت بقت زي البسكويت
*والملاحظ في الآونة الأخيرة
*أن العمارات
*أو قل امتداد الدرجة الأولى
*والخرطوم اتنين
*نلاحظ تمدد المياه على معظم الحوائط
*أحياء راقية عرفت الصرف الصحي قبل مية سنة
*ولكنه صرف صحي بدائي وعدائي
*ويعتمد على آبار توصل مياه الصرف إلى جوف الأرض حيث المياه الجوفية
*تقوم تضايق السطحية في حياتها
*فتهرب إلى حوائط الناس ومبانيها
*تعلن عن كارثة وشيكة
*ستنهار معظم عمارات الخرطوم
*لا بسبب اشتباكات بين الحركات التي صارت تقطن الخرطوم
*ولكن بسبب تسرب مياه الصرف إلى طبقات الأرض التي تستند عليها قواعد تلك العمارات الجميلة
*وماعارف الجهة البتشيل رسوم الصرف بتودي الرسوم دي وين
*والخلاصة أن عاصمتنا تسبح على بحيرة كبيرة من المياه القذرة
*تعبر عن حضارية الماضي وثورية الحاضر وضياع المستقبل
*وتظل الموية غائبة عن الحنفية
*بسبب (المواسير) التي يفترض أن تقوم بإيصالها حتى قدوم الحنفية في ظل سداد مقدم مع فاتورة الكهرباء
*وتظل مياه الصرف تؤذي المواطن والوطن والبيئة
*وتظل الفوضى ضاربة بالبلاد
*طالما أي زول بقد الواطة ويصل للمياه الجوفية (ليستفرغ) فيها
*ونظل ننفخ في قربة مقدودة
*اتقدت يوم خرج الانجليز من البلد
*وبقى القد يكبر يومياً بسبب إهمالنا مرة وبسبب جهلنا مرات كتيرة
*أيها الناس البتحكمونا
*قدوا خلونا نقفل (قدو) لتنتفخ القربة وتقيف لمبة
*الله لا جاب عقابكم
*وكمان اليومين دي جابت ليها قطوعات كهرباء
*يجيب أجلكم يريح المواطن منكم
*أها
*نجي لي شمارات والي الخرتوم
*كان شفت يا والينا
*مرات الموية (لما تجينا)
*بتجينا عفنة يا والينا
*تكون العفنة في الموية ولا في نخرينا يا أخينا؟؟؟
شمارات الكلب
ننساك كيف والكلب قال كلو ما أتذكر الآبار العشوائية أتذكر المثل البقول: ما يبول في الصحن البياكل فيهو إلا الكلب.
وإلى لقاء
