مقالات وآراء

ست الشاي ، ثاني ، وثالث ، ورابع

خليل محمد سليمان

نحتفي بأمهاتنا ، واخواتنا ستات الشاي لأننا نعلم بغض الكيزان لهن ، لا لشيئ إلا لأنهن صمدن في وجه البطش رغم ضعفهن ، وظروفهن..

ستات الشاي

الشاعر العطا علي العطا / البركل

كل ما الخطوه تسوقني السوق

وحد ما  اقنب جم ست شاى

قبل انجمه وبالي يروق

عقلي يساسق غادي وجاي

فيهل اتحير كيف هي صبوره

وكيف متصالحه مع الاقدار

كل مااتمعن في  علويه

 فيها  احتار كيف  ياكيف

من دردوق  تجي للشعبيه

تخلي  ولاده وراها صغار

يا  الله  من  كلتوم

قبال  اطلب  منها شي

حيلى اتهد غلبني اقوم

لما سمعت كلامه حديثه

عن الدبلوم

وعن الجيه ايام الجامعه

من جبل اولياء للخرطوم

وبعد مالاجت غادى وجاى

جات للسوق وبقت ست شاي

لاجخ فاضى ولابوبار

روقو وصنو

واصبرو شويه

حاجه ثريا

مرا مادله وماشاء الله

مرا خريجه محو  اميه

زوله قنوعه صبوره صبر

تنده فى الله صباح وعشيه

استر حالي انا ياستار

وفوق للفوقه

حديثه براهو كلامه كتر

بناته اتنين مهيره ورابعه

الاتنين طالبات في الجامعه

مسمي مهيره عظيمه الشان

وتقول لى رابعه

رفقه الرجعت البمبان

مسمي محمد ولده الواحد

دسيس مان

وكل الدنيا  دى عارفه ثريا

مرا مليانه  شموخ  ووقار

فيها  سمات محمود ود احمد

وود حبوبه وعلى دينار

تشوفه تقول تبع الخاتميه

يساورك  شك هي من الانصار

وفيها عراقه كرمه وكورتىوكل امجاد  البجراويه

حكمه ربنا

من  ما قامت  مرا  صوفيه

دقات  قلبها دقات نوبه

طقطيق سبحه ونقرات  طار

مرا من يومه فارسه حوبه

مرا معلومه وقداميه

وفوق للفوقه مرا صوفيه

تشوف في وشيها ورع  سنار

وهي متل سوبا ملانى اسرار

وفوق للعشم الشاغل البال

فيها  اماني وفيها  امال

وحن وحنين لى جوبا ملكال

حن الجار لى سابع جار

حكمه ربنا من هي صغيره

كلام  الرادي تعدو هظار

لما يقول الرادي الفشقه

تهوزز راسه  يصيبه  دوار

وحد ماتسمع اسم شلتين

تحس بي انها عندها تار

بعد ما تولع  نار كانونه

تبدا تغني وبى صوت هادي

اغاني ابوعركي

غنا مصطفي واناشيد وردي

وغنا زنقار

لمن تقرأ

شعرمحجوب والحميد

وعمر الدوش وعاطف خيري

تقطع  شكها زوله قويه

ومرا لايمكن يوم  تنهار

تسوط الشاي

بى غنا  ياسين

تغني  بلادي  مع  النجار

تخت الجبنه  بالجابريه

وحمتو ونوره وست الدار

كل عصريه

ترتب اموره تحلحل دينه

حسابه تحسبو

فى اصابع ايدينه

تحس بالجمه تحس بالراحه

لمن تمرق حق السكر

وحق الشاي

وقروش الجامعه والايجار

وبي برااحه

ثريا  تنادي تقول لي ثريا

كلام جوااني حديثا سار

بعد سويت بالشاي الدايره

وعشت وشفت ولادي كبار

احمد الله واشكر فضلو

حمد ماعندو عدد ومقدار

الاولاد تربايه النار

بقو سراي بقو ياكلو  النار

تعليق واحد

  1. هههههه بغض الكيزان ليهن نعم عندهم حق طبعا لانه دا فسوق وقلة ادب وماشغل كويس وهو عبارة عن ونسة وطق حنك وبعدين الشاعر فارغ وماعندو شغلة ست شاي شنو كمااان عشان يعمل ليها شعر ويغنو ليها غني ونحن مفروض نحارب شئ اسمو ست شاي وهي دخليه علينا جاءت نسوة من اثيوبيا وارتريا وعملو الشئ دا وكنا بنقول فساد تربوي ونجي نحن نعملو يخسي لكن وعليك الله البيمشي يقعد جمب ست الشاي بيعتبر راجل ولي عندو زرة رجوله ودا لو راجلي اقطع ليه رجلو لو لقيتو لافي جمب ست شاي وهل عظماء السودان كانو بيقعدوا جمب ست الشاي غير الشماسة والصعاليق الماعندهم اهل منو البيمشي يقعد ايوه حرامي البيوت عاطف خيري يمكن ومعاه اشباه الرجال الذيو بيمشو يقعدوا جمب ست الشاي طبعا هههههه وماتزعل يا الخليل دا كلام ساي وكدا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى