عثمان يس ود السيمت
كتبت هذه الرسالة للسيدة جيسيندا ارديرين رئيسة وزراء نيوزيلندا أبان محنة الهجوم الارهابي في كربستشيرش وفي قمة هجوم التتار في بلادنا في محاولاتهم اليائسة البائسة لإخماد ثورة ديسمبر، اعيد نشرها متحسرا عليها ومتأسفا على بلادي التي يرأسها البرهان بالإنقلاب وفكي جبرين بالوكالة (ودنيا حظوظ). :
رسالة من ود السيمت الى السيدة جاسيندا ارديرين رئيسة وزراء نيوزيلندة
السيدة جاسيندا ارديرن رئيسة وزراء نيوزيلندا الموقرة
اخاطبك دونا عن كل رؤساء الوزارات
الكويسين الماعندنا فيهم نصيب .
والكعبين ضلمة الابتلانا بيهم ربنا ناس معتز وإيلا.
والفوق ليهم والتحت منهم.
الغلاااااد والرقاق ونحن ماعندنا رقاق زيك
عشان ناسنا هنا بياكلوا مال النبي وما حامدين ولا شاكرين
انتي وشك مطروح قدام شعبك وناسنا صارين وشوهم وهي خلقة شينة سبحان الخالق المصور.
انتي عديلة ومهيلة في كلامك وهم بجتروا الكلام جتر عروق وارموا فيهوا دراب دراب فلقونا كلام سااااااااي عليك امان الله.
انتي اتكتلوا عندك خمسين لبستي اسود ودمعتك فوق خدك تنتف والعبرة خانقاك من اليوم داك خليتي البلد والدنيا كلها حادة معاك وبقيتي مسلمة ناقصاك الشهادة وناسنا غير الشهادة ما عندهم التكتح.
الكتل خمسين قلتي ماتقولوا اسمه وكتلتي اسمو طيب الزول ده اكان كتل الاف كنتي سويتي فيهو شنو. نحن عندنا كتالين رقاب كتيرين لكن، اها اكان ماجبنا اساميهم نناديهم كيف ، انا فكرت نناديهم بطريقتنا السودانية
زول كردفان
زول دارفور
زول المناصير
زول النيل الازرق
زول كسلا
زول القضارف
زول شمبات
زول بري
زول رمضان
زول سبتمبر
زول علي فضل
زول ديسمبر
زول باقي الشهور
بس كلمة زول واجعاني فيهم بس الشباب ما بقصروا بسعفوني باقتراحات
عارفة اعاين في صورتك ما بشبع فيها شوف شكلي جعان لي صورة ريس. الرؤساء عندنا بعيد عنك الواحد غدوه شهر ورواحه شهر يمر جنبك زي القطر ابخمسين عربية مسافة حتى تشوفي اخره.
انا عازمك تجينا مرة
شعبنا طييييييب وسمح واخو اخوان وزيك كدي دمعته في طرف عينو في الحاجات دي.
نحن عنواننا ما بتوه
متحكرين في الدنيا من يوم ما اتخلقت اتقول قالوا لينا اعزلوا بكانكم قبلما الناس يصحوا ووحاتك عزلناها عزل حجزناهوا ناصية في القارة وفي صرة الدنيا وحددناهوا مليون ميل علا نقول شنو من الولادة العايقة قطعوه خلوهو مشرشر زي رقبة المضبوح لا عرفنا راسنا وين ولا باقينا وين عشان كده يا جاسيندا بلدك خليها لي سكرجي او ود حرام او زول مبتلي بي السبعة وزمتا بس ما تخليهو لمهووس وتاجر دين . السكران بيصحى والمبتلي بتعافى لكن المهووس كلما يغرق في الهوس بيفتكرها زيادة عافية. وبراك شفتي وغايتو
علا متوكرين شديد بي ناسا قاعدين معانا من وانتي كنتي عمرك 10 سنين عارفة بس قراااااد واتلصق في جلدنا ويمص ويتفل بره ويمص ويتفل بره لما نشفونا عدمونا الوريد حق السوائل بقى اتعس زول فينا الممرض وكتين يقولوا ليهوا ركب ابرة الفراشة.
انتي دقيتي سدرك ووقفتي ومنعتي السلاح عشان شعبك يعيش لكن في ناس اجارك الله واضانك طرشا يشيلوا ويشتروا في السوخوي والتاتشرات والبمبان وده بيرموهوا لينا في وسط بيوتنا وفي البرندات لحدما شفعنا ادمنوا ريحتو. واتخيلي بنطو علينا في البيوت معليش الحكاية دي ماحتفهميها حاحكيها ليك بعدين لما تجي.
نحن يا جاسيندا عندنا بنات في سماحتك وخجلان اقول اسمح منك عشان مرتي بتقرا البكتبو بعدي ، باقي نحن شعب مثقف شديد. والله بناتنا سمحات سماح وشاطرات شطارة واديهن الرجالة في المظاهرات. انتي لبستي الحجاب لما كتلوا ليك خمسين وبنوتنا اتحزمن وقلعن الححاب وكت اخوانن اتكتلوا، والله في واحدة سوت مظاهرة براها وواحدة حبوبة سوت اعتصام براها وبنية بري بتخمش البمبان في ايدها زي حلاوة قطن ترجعو للكجر.
انتي لو جيتينا ما بتخلينا ويازولة والله نحن مابنخليك نحن اصلنا اخلاق يمين وكايسة فردة شمال بس تعالي.
عندنا حلاة غنا وحلاة رقيص وحلاة حفلات وحلاة هجيج وحالفين نسوي ليك جرتق منو وجديد بس ظروفنا اليومين ديل صعبة شوية غايتو باللقيمات بنعديها ليك.
انا كتبت ليك الكلام ده بالدس عشان تصوري يا جاسيندا الكلام عندنا ممنوع والكتابة برضو الا كتابة الفقرا لكن غايتو بنتنفس اسافير والبقول بغم بلحق عثمان ود ميرغني.
ما قادر اختم رسالتي دي لكن بكتب ليك تاني ان الله امد في العمر.
العنوان
السودان
شمبات
فريق العرب
دكتور عثمان يس ود السيمت
اصغر صغير بجيب لي الجواب
ماتنسي رسلي لي عنوانك مع الرد يمكن ازوركم اسوي الواجب طال الزمن ولا قصر نحن فاتحتنا واجبة علينا .
أهي دي الديمقراطية ولا بلاش – هل من المتصور أن يشعر رؤساء وزرائكم وزعماء أحزابكم هنا أبداً بالإجهاد من الحكم؟ هناك الحكم بالفكر والعصف الذهني في كيفية التغلب على مشاكل الشعب وأزماته والاجتهاد على رفاهيته وليس لكنز الأموال والأملاك والثروات فإن هذه لا يملها أحد خاصة إن كان حاكماً ودونكم المخلوع والمخلوعة تبعه والمخلوعين معه 30 سنة ويريدون المزيد بقتل ثلث الشعب ليستمروا مع الثلثين الباقيين؟! فرق ما بين الشمس والأرض ما بين إنسانيتهم وإنسانيتنا الأنانية المتخلفة الدنيئة
كلامك كلو صاح اكن بس في الأخير قلت وانسانيتنا، نحن حكامنا ما عندهم انسانية. جاسيندا موطفة بمسمى رئيس وزراء لكن نحن ناسنا حرامية بمسميات مختلفة زي وؤساء ووزراء وولاة والحرامي لت بفتر ولا بشبع ولت بوريك وشو. نحن نحتاج لنموذج جديد يصلح معنا ويصلح حالنا.