مقالات وآراء سياسية
لجنة تحقيق في مكتب البرهان ، ودخل القش ما قال كش..
خليل محمد سليمان
فاكرين زمااااان قلنا قروش الإرتزاق في اليمن ماسكها زول واااااحد بس؟ .
اها الزول دا هو البستلمها ، وبحولها للجنيه السوداني ، وبوزعها .. كيف؟ .
دي بعرفها هو بس ، وعبدالوهاب..
الزول دا إسمو المدير المالي لمكتب البرهان ، وهو اللواء محمد الفاتح الفكي.
رفع عدد من منسوبي الكتيبة الرابعة التي شاركت في حرب اليمن بين 2017م و 2018م دعوى ضد السيد المدير المالي لمكتب القائد العام.
علي ضوء هذه الدعوي تم تشكيل لجنة للتحقيق مع المسؤول المالي لمكتب البرهان.
يمثل اللجنة المدعي العسكري العام د.كمال الدين يوسف ، وقائد الإستخبارات العسكرية اللواء الركن محمد علي احمد صبير.
كسرة..
طبعاً معروف موضوع اللجان في الجيش الذي تقوده لجنة المخلوع الامنية .. مهمتها الاساسية قتل القضايا ، ودفنها بالذات لو كانت لها علاقة بالقيادة ، او قريبة من دوائرها.
كسرة ونص..
فاكرين موضوع بيع 32 مكنة طيارة بملحقاتها بسعر مكنة واحدة؟ .
ومبلغ 25 الف دولار رشوة للقائد لتزوير خطاب ليهرب المشتري من دفع الجمارك ، والمستحقات المالية الخاصة بالدولة؟ .
اها اللجنة دي دفنت الموضوع الي الابد لأن الموضوع هبش قادة كتااااار علي رأسهم رئيس الاركان.
لم يُعلن حتي تاريخه عن نتائج اللجنة ، ولا يحزنون ..
اكتفوا بإحالة قائد سلاح الطيران الذي باع المكنات بالامر المباشر الي التقاعد ، وقبض مبلغ ال 25 الف “ضولار” ليهنأ بما سرق ، ويتمتع بكل مخصصات ما بعد الخدمة.
كسرة ، وتلاتة ارباع..
اها الموضوع دخل مكتب البرهان بدقنو..
ننتظر مراسم دفن القضية ، وإحالة السيد اللواء الي التقاعد ، ويا دار ما دخلك شر..
شكرا سعادتك جنابو خليل محمد سليمان علي المثابرة وملاحقة وفضح فساد عصابة قندتو وزمرة حجر العسل .. ضباط يقول ليك عظام يقرمشو في “عضام” رفقاء السلاح ..
اللص اللواء محمد الفاتح الفكي غيض من فيض والبلك امين فى ادارة الشؤون المالية بالقيادة العامة ساكتين علي فساد تشيب له الولدان فى ادارة المعاشات والتأمين والمبيعات وكما ذكرت و التلجين المشبوه للمعدات ومكنات الطائرات ثم بيعها بالعملة الصعبة وتقسيم الغنائم .. قاتل الله الكيزان الفسدة القتلة ناهبي المال العام ..
وقروش إرتزاق الدعم السريع ما ماسكها زول واحد؟ وعاملها قروشوه هو وأسرته؟ تقدر تفتح الموضوع دا يا جنابو ولا بتخاف؟