نحن لانعيد الغلطات فقط ، بل نضخمها ونزينها بالغباء

شوقي بدري

يقول مصطفي عثمان شحادين ….. السودانيون قبل نعمة الانقاذ كانوا شحادين . كتبت ما قلت لك في ندوة كوبنهاجن التي أقمتها انت في يوم 12\12\1994م وبالرجوع الي التقرير الذي كتبته انا عن زيارتك لكوبنهاجن , كان معك السيد انجلوبيدا نائب رئيس المجلس(الوطني) والاخت العزيزة اقنيس لكودووالى جوبا ابنة خال اخي وزميل الدراسة والداخلية في ملكال عيسى عبد الرحمن سولو ، وبدرالدين مدير شركة كوبتريد رجل اعمال المرافق وفؤاد عبدالمنعم محمد رئيس لجنة الأحياء الشعبية في الخرطوم ورجل اعمال ورجل الامن على..
وبعد الندوة حاول رجل الاعمال بدرالدين الذي تاستلم المال المسروق ممثلا في الشركة الحكومية كوبتريد ان يعطيني كرته الذي رفضته . كان يقول لي انه عرف من السودان انني شاطر في الخشب السويدي والشغل ويريد التعاون معي . وبالرغم من انني كنت كما ذكرت انت احد السودلنيين الشحادين , رفضت ان آخذ الكرت . وقلت له انا لا اتعامل مع النظام او من يتعاملون مع النظام الانقاذي ..
عزيزي مصطفي انت كنت وقتها رئيس منظمة الصداقة الشعبية (المؤسسة الموازية لوزارة الخارجية) . وكان هذا بداية التلميع لمصطفي عثمان اسماعيل . وكان شيخك الترابي وقتها يعدك لأن تستلم وزارة الخارجية . ولقد شارك الاخ احمد عبد الرحمن في عملية التلميع والتهذيب والتشذيب . ولكن الطبع يغلب التطبع . وضح ان العملية كلها صنفرة ازبداج وجملكه. كلامك كلو طلع تمثيل اول ما ضغطوك بقيت زي ،،ابو الكعيب،، حيوان صغير مشهور بالحماقة ،،.
وعندما انقلب السحر علي الساحر كان الترابي يراهن عليك ويقول انك ستستقيل. ولكنك كنت قد عملت الواجب المنزلي . والكيزان اذا كانو اربعة وواحد وقع في حفره ما بينتظروه بيواصلوا طوالي. وطوالي بتدو الباقين الحشة الاولي. (طبعا حشة البرسيم الاولي بتسمم).
الزول قبل الانقاذ كان لمن يجي لي ناس ضيف وجابو الدرب مرة تانية بيسأل . سنة 94 لمن جيت كوبنهاجن وانت ما شحاد الحمدلله ما كان تضرب تلفون زي ما ضربت تلفون زمان طالبا خدة تم توفيرها لك بكل ترحيب وفرح. انشاالله بس تقول عشة حبيبنا سار او دجاجي يلقط الحبه. وانتم يا سيدي لا تعرفون الولاء وهذا جديد علي السودانيين . فبعثتك انت وكل الكيزان كانت بسبب سيطرة الكيزان علي حكومة نميري . واذكر انه في الثمانينات كانت هنالك خمسة بعثات لبيطريين في الدنمارك كانوا جميعا من الكيزان . وكانت الخطوط البحرية السودانية ترسل الكباتن للسويد لدراسات فوق الجامعية ولكن بعد سيطرتكم صار كل الكباتن المبعوثين من الكيزان او من تابعين لهم ..
وانت ياسيدي لم تكن وفيا لشيخك ، حتي اذا كنا شحادين فقد كنا اوفياء لاهلنا. يا خي يوم كده ربنا ما فتح عليك بي كلمة كويسة عن الترابي وانت مدان له بكل شيء نحن اعداءه وبيننا ما صنع الحداد لكن انت مالك؟.
اسأل السعوديين العجائز . كان بيقولو لينا انحنا يا سودانيين نديكم دمنا. انحنا كنا بنتعالج في بورتسودان مجانا. وما عرفنا المضاد الحيوي الا في السودان . واول سيارة ركبها الملك عبدالعزيز آل سعود كانت هدية من سودانيين وموجودة الى اليوم في متحف القصر . تقريبا اى انسان كان يتزوج في الحجاز كان شيلتو بتجي من بورتسودان…. عارف ؟. راجع جريدة الحضارة سنة 1938م عيد الاضحي , لستة بأسماء المتبرعين لسكان مدينة المصطفي . اللسته كانت تشمل السيد عبدالرحمن والهندي والسيد علي حتي المسيحي السوداني هنري وديع وكل اعيان السودان . وكانت جلود الاضاحي تجمع وتباع وترسل الفلوس للمدينة وكل جامع في السودان كان يجمع الفلوس لاهل السعودية . والله لو شحادين ديل شحادين السرور. وكان الفقراء في الحجاز ينتظرون المحمل السوداني. فلقد كان السودانيون يدعمون يساعدون اهل السعودية ..
كاربيلد رئيس وزراء السويد السابق ووزير الخارجية الحالي قال عندما كان رئيسا للوزراء. (ان الاجور في السويد كانت متدنية جدا في الستينات وان الاجور كانت اقل من دول كثيرة ذكر منها السودان). وكثير من الاوربيين كانوا يأتو للسودان بلد الشحاديين بحثا هن الرزق…. !! ان يافطات المرور في الخرطوم كانت مكتوبة بالانجليزية والعربية واليونانية . هل سمعت بالانجليزي المستر ليق الذي رجع الي انجلترا وبعد العز في السودان وجد نفسه ساكن في كرفانه مع اسرته بعد الجنايني الطباخ . فأطلق النار علي زوجته وابنائه وقتل نفسه.
مدرسنا في الاحفاد الثانوية الشاب مايكل تزوج اناهيد بنت الخالة اوجين كوركيجيان من ارمن امدرمان جيراننا واحبابنا ذهبت اناهيد مع مايكل الي انجلترا لم يصدقها الاهل عندما رعت ، كانت تقول انو ناس مايكل ساكنيين في شقة صغيرة وما عندهم حمام ولانو هي متعوده علي الراحة الحيشان والحمام مرتين في اليوم كانت تاعبة نفسها واهل مايكل لانها تستحم في الطشت كل يوم . قال شحادين. يعني يا مصطفي اهلك قبل الانقاذ كانوا شحادين طالبين باب كريم ؟.
نحن الشحاذون كنا ناتي بالطلبة من الصومال واريتريا واثيوبيا للدراسة في المدارس السودانية. ونخصص مقاعد لاهل عدن وحضرموت. وكان اهل عدن وحضرموت في المدارس الاولية والوسطي يدرسون المقررات السودانية والكتب التي يطبعها معهد بخت الرضا. وبعده يحضرون الى السودان للدراسة في المدارس الثانوية . اخيرا صاروا يقبلون في جامعة الخرطوم . وكنا ندرب دول الجوار في الشرطة والإطفائية والسجون والممرضين والممرضات والقابلات والمساعدين الطبيين . الملك فهد وشقيقه الحاضر الملك عبدالله كانوا في معهد بخت الرضا.

عندما حاصرت روديسيا زامبيا اقتصاديا قام السودانيون ببناء سكة حديد تنزانيا وشاركوا في بناء الكهرباء والاتصالات في شرق افريقيا. وبرضو انحنا كنا شحادين لكن دي الوقت صرنا ميتيين بسبب الانقاذ واللصوص من امثالكم …
كما كتبت انا للتجمع ان العملية كانت عبارة عن (مد قرعة). ولقد استعملت هذا التعبير السوداني لأن هذا كان هو غرض الوفد . وكان التركيز علي المدخلات الزراعية التي كانت الدنمارك تقدمها للسودان كدعم . وبدر الدين وفؤاد عبد المنعم محمد كانوا يريدون ان يسيطروا علي شركة قروند فورش اللتي تنتج احسن مضخات غاطسة في العالم وشركة استورك اللتي تنتج المضخات الزراعية . ولقد سبق ان اعطت الدنمارك السودان هدية عبارة عن سفن تجارية حديثة بنيت خصيصا للسودان لنقل منتجاته ..
دعني اخبرك يا سيدي مصطفي عن نوع خاص من الشحادين لم نشهده في السودان من قبل . فلقد سمعنا عن سرقة بالاكراه . ولكن اول مرة نسمع بشحده بالاكراه كانت مع الانقاذ . البشير كان يستدعي اصحاب الشركات الكبرى . ويشحدهم دعما للنظام . وبعد ان يعطوه يقول لا.. ده ما كفاية نحنا عاوزين زيادة. وكما سمعت من الاخ خالد الحاج انه عندما كان يعمل مع بيطار ان البشير استدعى روجيه بيطار وطالبه بدعم للنظام . فذكر روجيه بيطار رقم 2 مليون جنيه. فغضب البشير وقال نحنا متوقعين 10 مليون. فأحتار بيطار فانقذ خالد الحاج الموقف قائلا دي البداية. وطبعا يا مصطفي دي ما شحده.
بيطار الكبير كان شغال بوسطجي في امدرمان بوزع الجوابات . بإجتهاده كرجل عصامي كون نفسه وحب السودان وقدم للسودان اكثر من الآخرين . وحجار كذلك كان كان يعمل في البوسطة في الجنوب . كون نفسه وقدم ولا يزال يقدم للسودان اكثر من الآخرين..
السودان القديم بلد الشحادين كان يعطي فرص بدون سرقة ونهب كما يحدث في الانقاذ.
إن ابعد ناس عن الشحدة هم السودانيين اكثر ما يميز السودانيين هي الكرامة والعفة. ومهما يحتاج السوداني لا يتذلل . والشحدة دي اشتهروا بها الكيزان … ود آمنة يقول في مدح صديقه .
اتنين من رفيقي بعاد حب النفس ودخول النفس في الزاد
انت بتسيها يا البتقضي كل اغراض
ضبح ام سري ودفع النقي بو عقاد
* ام سري هي الناقة , النقي هو الجمل المختار والعقاد هي التميمة او الحجاب الذي يعلق على رقبته ..*
لقد طلبت مننا ياعزيزي مصطفي ان نعطي فكرة جيدة للدنماركيين عن النظام السوداني . وان نساعد كسودانيين في إعطاء الاسكندنافيين فكرة جيدة عن النظام , لأن السودان يحتاج للدعم والمساعدات والبلد فقيرة وتعبانة ومحتاجة. واذكر انني كنت اول المتحدثين . وقلت وانت تجلس في مواجهتي وتفصلنا منضدة (الإسكندنافيين ما اغبياء انتو نظام سيء . كل علاقاتكم مع دول الجوار سيئة. ويكفي سجلكم في حقوق الإنسان سيء). ووافقتني انت بأن سجلكم في حقوق الانسان سيء ولكن قلت (نحنا احسن من دول الجوار) فقلت لك (كلو بطال زي ما تقول لي انا بدق مرتي بالكف لكن جاري بدقها بالعكاز).
تفسيرك لسؤ العلاقة مع مصر هو ان النميري اجرم وفرط في البلد لأنو اعطي المصريين عشرين محطة للمراقبة في حلايب بدون تحديد المدة. والمصريين خدعوه وقالوا انهم يحتاجون لنقط المراقبة حتي لا تأتي اسرائيل وتضرب السد العالي من الخلف. وقلت بالحرف الواحد انحنا الموضوع ده ما حا نخلي. وانحنا بالوقت مفرغين السفير في هولندا لمتابعة هذا الموضوع ورفع دعوة ضد مصر . كلامك ده كلو وعنترياك راحت وين اهو نميري في الخرطوم . وانت كل يوم مع المصريين تقهقه لمن نشوف ود حلقك .

التهديد الذي وجهته لمصر كان يعكس معرفتك بأنكم تعدون انتقاما من الحكومة المصرية . ووضح هذا بعد عدة شهور في محاولة اغتيال حسني مبارك . تلك حماقة دفع السودان ثمنها باحتلال حلايب والفشقة .
نميري الذي لا يزال الكثيرون يعظمونه ويطلق اسمه على الاكاديمية العسكري ويسبح بحمده من نحترمه ونشد على يده الجنرال احمد ادريس ، هو اكبر عميل لمصر واسوأ ابناء السودان قاطبة . لقد كان دائما ما يبنفذ كل اوامر مصر . واليوم يتفوق عليه البرهان . الذي اعطى حكومة مصر مدينة مروي الاستراتيجية مطارها ارضها والحق في التصرف في كل ما يريدون .
الصادق وخادمه برمة كانمشغولين بامورهم الشخصية . لم يتم نقاش قوانين سبتمبر التي قال عنها الصادق وهو في المعرضة … لا تساوي الحبر الذي كتبت به . ولم يتطرق الصادق رئيس الوزراء ووزير الدفاع وخدامه وزير الدولة للدفاع . لمنحة نقاط المراقبة العشرين في حلايب لحماية السد اذا اتت اسرائيل من الجنوب ؟؟ اين هى الاتفاقية التي وقعها نميبري مع المصريين بخصوص نقاط المراقبة ؟؟ اذا وجدت اتفاقية فهذا يعني أن مصر تعترف بسيادة السودان على حلايب . مصر كدولة لايمكن ان تطلب من جزر القمر نقاط المراقبة ، لان جزر القمر لا تمتلك الحق في حلايب . اذا كان المر شفاهيا فهو غير قانوني . الا أن امريكا بواسطة ماكنمارا الضابط الامريكي وزير الدفاع في حكومة نكسون ثم رئيس البنك الدولي في بداية السبعينات ومن سكان امدرمان وادي سينا لفترة ليست بالقصيرة ، قد طلب من عبود ووفده عند زيارة امريكا باعطاءهم حلايب كقاعدة . لم يوافق عبود بسبب انضمامنا الى دول عدم الانحياز .