عمرو زين العابدين محمد علي
بطبيعتي كسوداني اعشق التحليلات السياسيه لكن قناعاتي انها اذا لم توجد فالدولة في الاغلب بخير والشعب راضي وقانع وهانئ المعيشه ، لانو المواطن لايعبث في السياسة ولا يحلل الا اذا كان الوضع لايحتمل بالنسبه ليهو او الي السياسة تدخل ليه الحوش ،
فالنظرية بسيطه win win ريح المواطن عشان مايتدخل في السياسة وتندم انت بعدين .
ربما يختلف المدخل مع مضمون المقال لكن بالطبع ستجد الاتفاق بين السطور وحقيقة الخلاني اكتب السطور ادناه دي الا خبر عن كشف قاموس اكسفورد الجديد عن اضافة بعض الكلمات الجديدة المستمدة من لغة التواصل الاجتماعي المستحدثه ايمانا منهم انو دي لغة الجيل الجديد ولغة العصر .
اولاً :-
(hangery)
وهي تعني (الرجل الذي اصابه الغضب جراء الجوع) هي مزج بين كلمتي جوع وغضب في اللغة الانجليزية hungry and angry
Instayam : اسم ..مشاركة وتبادل الصور الخاصة بعيد الشكر عبر تطبيق انستجرام
fanishment : اسم .. تم حظرك من على حساب احد مشاهير “السوشيال ميديا
(ثلاثتهم مستمدات من مواقع التواصل الاجتماع)
وده بوريك بنظره الفاحص مقدار تاثير التكنلوجيا علي العلم وتسليم الناس للتكنلوجيا كاسلوب حياة غصبا عننا كلنا ايذانا بجيل جديد يطرح نفسه عنوه وبكامل الالق في شتي المجالات …
بل حتي انه جيل تغلغل الي اللغة ووضع بصمته فيها وطرح كلماته والوصول للغة هو وصول للجذور من الصعب بمكان تطبيقه .
ومن الجميل تلقي دينا الحنيف متوافق مع نظرية تطور وتسليم الاجيال … بمقولة سيدنا علي بن ابي طالب :-( لاتربو اولادكم كما رباكم اباؤكم فقد خلقو لزمان غير زمانكم)
اذا عكسنا هذا الواقع الجديد علي العالم ، علي السودان بالاخص سنجد فراغات كما انك شايل دقيق في غربال ، التغير هو سنة الحياه عدا في السودان هو مكروه وغير مستحب ولنا في الشخصيات الاعتباريه الدائمه للدوله السودانيه خير مثال عمر_البشير ومازدا وشداد واخرين لايسع مقالي لذكرهم …
يمكن للقراء انتقاد عبثيه توحيدهم في جمله وهم المختلفون في الصفات لكنهم متفقون في الفترات الزمنيه في الكرسي وعدم التجديد وانتشار الحاشيه حولهم .
وهذه من عبثيات السودان الحبيب ، حيث تقديس الشخصيات الاعتباريه بتاكيدات من حاشيتهم انهم اذا قاموا من الكرسي الدنيا حتبوظ او سؤال البديل منو ؟
سالني احدهم يوماً اذا ماسقط البشير البديل منو ؟
جاوبته البديل هو عبد اللطيف بوي ، قال لي منو عبد اللطيف بوي ده ! اوعي يكون الباك الشمال بتاع الهلال ، قلت ليه : نعم هو ، قطعاً حيكون احسن من البشير ، واحسن لينا زاتو نحنا كهلالاب من قصة باك شمال دي .
انا افتراضي انو اي منظومه ناجحه هي في البدا عبارة عن سيستم والافراد هم تروس في هذا السيستم مع اختلاف مهاراتهم ، لكن في النهاية تروس ، اذا سقط واحد في الف واحد .
وإجابتي المنطقية لسوال البديل منو ؟ البديل هو السيستم او النظام .
استكمالاً لما بدات نحنا شعب لايقنع بنظرية #التجديد_سنة_الحياه ولا نظرية #جيل_بسلم_جيل
الا اذا الجيل أتحلل وبقي بترول ونتزنق حينها لنردد فلان الفلاني #مابجي_زيو والزمن_الجميل وبعض الجمل الغوغائية ، لانو في نظري دائماً يوجد مؤثرين ولكن مافي زول موظف مافي زول زيو أبداً .
قال لي احد الاخوة الافارقه ، ان العقلية الافريقيه تعشق الماضي لانها ليس لها جديد لتقديمه ، في تقديري انا غياب الديمقراطيه لفترات طويله عن القارة السمراء هو ما احدث الفرق في العقلية الافريقية المستقلة حديثاً ، او ربما بقايا تاثيرات الاستعمار اجهزت علي العقلية الأفريقية الفزة .
تجد اغلب السودانيين في كثير من الاحيان يبالغون في تقديس الماضي ولكن حتمية احترام الحاضر والبناء للمستقبل هي الحقيقة الوحيدة .
نعم زمان كانت النفوس_طيبه لكن التاثيرات الاقتصاديه وسرعة وتيرة الحياة هي التي خلت الشباب_تعبان كما يحب ان يردد الناس الكبار .
انا لا انتقد السودانيين وانا منهم ، لكن جلد الذات احياناً بصحي من النوم ونحنا في الحقيقة نايمين منذ الاستقلال .
نحنا شعب كذلك غير مقتنعين انو عربات_بتسلم_عربات
الكوريلا 2007_اغلي_من_ال2018
والكليك جيب نظاره اغلي مني ومنك ومن الدهب
الحواته لايرضون ولو بدندنه لاغاني حوتهم ولن يرضو بمثيل له وحيرددوا لهيب الشوق والفات زمان حتي اخر شهيق وزفير …
وبننتقد كل من يغني اغنية قديمة بحجة انو ماحيكون زي سيدها الاصلي ، رغم انو من المتعارف عليه عالمياً ان الاغنية الCover اجمل من الاصلية ، والبعض تخصص في هذا المجال في السوشيال ميديا .
ربما لا يعلم البعض ان قانون الفن الوحيد هو ايهما اجمل فقط كما قال #شكسبير سيد الاسم (اكيد ماعوض)
مهرجانات وافلام وفيديوهات لشباب واعلامنا يعاملهم وكانهم ابتدعو في #الميديا … وهم ليسوا كذلك البته …
هم فقط كفروا بالتلفزيون (الغومي) وقناة امدرمان
ومايقدمانه من غوغاء غير مواكبه للزمن …
يخيل لك ان التمثيل حكرا علي جيل #الدهبايه و #فرقة_الاصدقاء وان خشبة #المسرح لن ترضي بغيرهم عليها … مع عدم انكار تميزهم حينها والي القريب لكن #الي_متي!
آحواء لن تنجب مبدعين …هم بس
معقوله!
#لانرضي بتغير سلم موسيقي اغاني #وردي وكانه ابتكرها من خارج التيونات المعروفه … ونغضب اذا ردد احد اغنياته …وبعد فتره سنأسف علي حال الشباب لانه لايغني اغاني وردي العظيمه لذلك اندثرت ونردد (ده شباب ده) في تناقض مثير جداً .
فرضوا اغانى_الستينات واشعارها تلفزيونيا واذاعيا ولن تنجح في مزاوله المهنه الا اذا غنيت حقيبه …والاغاني الوطنيه المذاعه فقط هي اكتوبريات وردى وود الامين والكابلى وابو عركى وزيدان والكاشف ( اعز مكان وطني السودان )(وطن الجدود)(النيل الخالد) فقط … بل حتى الاجازة للاصوات لا تتم الا باغاني الحقيبه !!! رياضياً وكروياً بالاحري فرضو علينا مازدا والخبير احمد بابكر وشداد الرجل الذي لاسلف له …و #كاس_العالم_1970 الذي لم نتاهل له من الاساس …
خرج #الانجليز1956 فاستعمر السودان هذا #الجيل_الخالد و تحكم فيه (فنيا ورياضيا وسياسيا واعلاميا واجتماعيا) …. نصف قرن من الزمان (الستينات والسبعينات والثمانينات والتسعينات والالفيه + 18 +ماشين في السكه نمد)
في الرياضة ومؤخراً وانا هلالابي سعدت ايما سعاده وانا اري في المريخ السماني_الصاوي(21)سنه والتش (20) سنه وفي الهلال#وليد_علاء_الدين(20)سنه وغيرهم قليل للاسف .
وزادت فرحتي عند رؤيتي راجي (32) سنه في دكة الاحتياطي وخبر شطب
#علاءالدين_يوسف_والمعز_محجوب_ومساوي (الي_مالا_نهايه)
#جيل_بسلم_نفس_الجيل_ماف_ليكم
مابجحف اي زول حقو … جميع المذكورين اعلاه من اسامي ادو الامانه واسعدونا في كثير من الاوقات وماقصرو وقدمو للوطن ولي انفسهم الكثير …. الخ الخ الخ … لكن بالله بس #اشرب_وناول_الجمبك
ماتدس الكوز او الكوباية … وعلي قول حبوبتنا مكتبك_زمان_كان_فيه_زول_وحيجي_فيه_زول
انت بس اعمل العليك و قوم سريع …
#اخيرأ_وليس_اخرأ
والقاعدين فوق البمبر متعشكبين ياسودان …
