عرفنا ناس الجيش رافعين القزاز، و مظللين دوكو، و في ابراجهم المحروقة.. اخخخ اقصد العاجية، لا ورونا مدني سقطت كيف، و لا الجنينة، ولا نيالا، و لا زالنجي، و لا الضعين..ولا عارفين العمليات ماشة كيف، ولا خطة الجيش، و اولويات الحرب..
كلنا مجازفين الحكاية من وسائل التواصل الإجتماعي، مرة تصيب، و اخرى تخيب..
و المحظوظ بكون خالو ضابط جيش، او جارهم ، او صاحب ابوهو..
ما ينط موهوم يقول لي يا زول ناس نيالا و الضعين قالوا للجيش اتخارج، و الجيش اتخارج..
بنقول ليهو الكلام دا ما سمعناه من الجيش، ولا يكون الجيش مكسوف و خجلان ما قادر يكلمنا؟
المهم دا ما موضوعنا..
موضوعنا موضوع الاتصالات، و دا امر مدني يخص حياة كل السودانيين/ت..
اصبحت حياة الناس في شبكة الانترنت، الكل يعيش علي التحويلات عبر تطبيق بنكك..اغلب السودانيين بين لاجئ، و نازح..
تقطعت بهم السبل، التواصل يهون عليهم شيئ من مآسي هذه الحرب اللعينة بالاطمئنان علي بعضهم..
معاناة الحرب، و اللجوء، و النزوح كانت اهون علي الجميع من ايام قطع الإتصالات..
اخرجوا علي الناس و قولوا لهم الحقيقة.. الحقيقة لا تغيّر الواقع..
الحقيقة تجعل الناس ان تدبر امرها، و تريحهم بعدم إنتظار المجهول، وسط هذا الركام، و الرماد..
كسرة..
اعتقد اسهل طريق سريع و ناجز بدل هذه المماحكة ان تقوم الحكومة بتوفير اجهزة starlink عشرة اجهزة كحد ادنى لكل محلية..
ما تقول لي ما ممكن و ما عارف شنو.. الآن الدعامة بجيبو اجهزة و شغالين إيجار الساعة بالفين، و تلاتة الف..
مرفق اسكرين من رسالة سودانية موجوعة تعيش تحت القنابل، و الرصاص، و تخرج للبحث عن شبكة انترنت..
اخيراً
قسماً بالله ايّ مسؤول في البلد دي يوم القيامة إلا يقوم جاري..
حسبي الله و نعم الوكيل..
والله يا جنابو خليل نحن حقنا ما عافينو من ازهرى لحدى البرهان ربنا يأخذ لينا حقنا منهم.
هنالك مبادرة من صاحب استار لينك (وهو من جنوب افريقيا…) فقد اعلن مع زوكيربيرقير عن توصيل خدمة الانترنيت للدول الفقيرة…اضافة الي ان السودان به حكومة بليدة ومجرمة…لذلك يمكن السودانيين في اميركا الاتصال بالان ماسك…لتقديم خدمة الانترنيت مجانا للسودان…
فهيا تحرك…مع بقية السودانيين النشطين
يا جنابو خليل ذكرت في احد مقالاتك أنك ستقوم بنشر اسماء ضباط الجيش الذين هربوا من أرض المعركة وما اكثرهم. ولم نسمع او نري شيئا.جعل الله المانع خيرا…!!!!
نحن في انتظار قوائم العار للضباط الهاربين من القتال ضد الجنجويد. اوع يكون أي كلام الغرض منه الاثارة ليس الا،كما هو حال تصريحات البرهان ولجنة البشير المهزومين والكيزان الذين يسمون انفسهم بالخبراء الاستراتجيين.؟؟؟…
.لا تنسي يا جنابو ان الراجل ب يقبضوا من لسانو.
خائن عميل شديد بغيض و غير أخدر , والشعب السودانى الاصيل و السمح يكره الانترنت و يعتبره من ادوات الشيطان ومفاتيح المستغربة و العلمنة و العولمة و غيرها من مصطلحات الشر , وقد عمل شيوخنا الكرام جهدهم للتحذير من خطورته كونه وسيلة الضلال الاعظم التى تجب الاذاعات المحلية و القنوات الوطنية الاعلامية التى تعزز للهوية السودانية الباذخة بالقونات و الدلاليك و تعظيم التقاليد السودانية بالممارسات الاصيلة فى تحضير أم شعيفة و اختها تكشو التى ابهرت العالم.
و يكفى فقط الظهور بالعمامة و الشالات المزخرفة بالجدلات الصوفية المثيرة لتعزيز هويتنا الخدراء السامقة فى ذهن المجتمع و ينشأوا فى كنف قواتنا الاسلامية المسلحة و شيوخنا الاجلاء
المشكلة ما فى توفير استار لنك المشكلة البحرس الاستار لنك دا منو الدعم السريع ما بخلى شارده او وارده الا ونهبها وانت تعرف انها أجهزة قابلة للسرقة
صح لسانك يا سعاده