Try to make the out best of it

دي النصيحة القدمتها لي سحر أختي وأنا كالعادة من يوم ما جيت مصر فارة من الحرب، مكتئبة ومكفرنة وشايلة الدنيا وملفحة بالآخرة على قول المثل، عايشة حالة من الإحباط، كل يوم بتذكر في البيت والحوش وشجراتي الليمونتين والمنقتين والنخلتين، بتذكر سريري ومرتبتي المريييحة ومخدتي، بطاطيني الاتنين حقة الصيف وحقة الشتاء، دولابي وطرحي العزلتهم بمزاج عالي شديد، أي واحدة اشتريتها بفهم وذوق وعندها معاي عشرة ومحبة، دولابي حق الملايات وتيابي، العدة والكباية حقتي حقة القهوة الساخن بارد  الجابتها لي سحر ذاتها من امريكا وعربيتي الضربتها الدانة، محل الخدار والفرن وصف العيش والطعمية،

التفاصيل دي كلها أنا بجتراها يومي وعيوني بتتملي دموع،  وبفقد الرغبة في أي حاجة، وبنغلق على نفسي،

سبحان الله حقيقة البني آدم غريب جدا ياخ، التفاصيل الببكي عليها دي ما كانت عاجباني وكنت بنقنق من قطع الكهربا والموية وصف العيش والغلاء الجنوني، وكنت سحر المسكينة ذاتها بشتكي ليها من حالة السودان، صحي الطمع في عجينة البشر، يعني زي ما قالت لي سحر انتي يا نهى مصر دي كنت بتحبيها شديد وبتصري تجي كل سنة، قالت لي حاليا انتي قاعدة فيها في شقة مؤجراها وفارشاها  الحمد لله على مزاجك ما نازلة ضيفة على زول، مافي قطع كهربا وموية زي السو.ان وحتى المعيشة عامة أحسن من السودان بكتير، مالك معيشة نفسك في الحالة الصعبة دي،

صراحة كلامها صاح، احتمال أكتر حاجة موتراني إني فشلت إني ألقى لي اي شغل، قدمت كمية من التقديمات كدة أسكتو بس ويوميا بصحى من النوم بفتح مواقع الوظائف، والحمد والشكر لله لم تنجح محاولاتي حتى الآن و I am still keeping trying ، والرزق ب الله والشفاعة بمحمد، لكن الشعور بإني لي فترة طويلة شديد مستهلكة تاعباني شديد، وقعادي عاطلة دة ماكل معاي الجمبتين ما جمبة واحدة،

وأنا عارفة دي حالة عامة وناس كتيرين مؤهلين شهادات وخبرات ومهارات أكتر مني بكتير وبرضو ما لقو طريقة شغل في مصر، لكن ياهو طبع الإنسان خلق هلوعا إذا مسه الشر جزوعا وإذا مسه  الخير منوعا، ودايما بفكر في الحاجة الناقصاهو ما العندو،

ربنا نعمه كتيرة، ربنا يجعلنا عبيد حامدين شاكرين،

سحر قالت لي حاولي شوفي ليكي كورسات بتاعة أي حاجة بتحبيها أدخلي فيها، حاولي أعملي برنامج رفهي عن نفسك، والله كتر خيرها ما قصرت معاي، المشكلة فيني أنا، كانت عندي النية لبعض الزيارات العائلية والاجتماعية، بصحى من النوم بلقى نفسي كنسلت أي برنامج ممكن أعمله، شاعرة بنفسي زي المقيدة ومسجونة في العملتو الحرب، ما قادرة أتجاوز الماضي وأعمل move on زي ما بيقولو،

ولعل المشكلة كلها في إنه الإنسان ما بحب تتفرض عليهو الحاجات، والحرب ياها فرضت علينا النزوح والهجرة واللجوء جايي في السكة، والوجع كلو في الوضع القسري دة،

ح أحاول أمشي بنصيحة سحر   وأشوف لي كورس أدخلو إن شاء الله بتاع معجنات،  وربما أمشي أزور الناس أمعطهم وأشوف لي منتدى أدبى أبل الناس بقصيدتين من كلامي الخارم بارم،،،