خستكات

راقدة في أمانتين الله ماسكة تلفوني مرة اوتسب ومرة افسبك وأحيانا اتكتك

فجأتن رننننن التلفون ضرب أعاين ألقى ليك مافي اسم مسجل، خير يا رب دة منو

-ألو

-يلولو راسك ما تعملي لي فيها طيبة ومسكينة

استدعيت الحكمة كلها وقلت أكيد رقم غلط، اتعامل بالذوق

– معليش يا أخت شكلك ضاربة غلط

– لا ما ضاربة غلط، يضربك الضريب انتي مش عبير

استغفر الله العظيم، طلعت عارفة اسمي، في جزء من الثانية مخي ودى وجاب وجاب وودى، يا ربي في شنو

– أيوة أنا عبير يا استاذة، خير، موضوعك معاي شنو

– عندك نفس كمان تسأليني من موضوعي يا ختافة الرجال، يا بايرة، تلقاكي جقة وقبيحة، مؤكد مشيتي لفكي بتاع سفلي كتبتي عثمان راجلي، ما بصدق بعاين لكرور وعواليق زيك وانفتحت ليك في الشتايم، ما خلت نبذة ما قالتها لي، ولا دعا ما دعتني بيهو

وانا وحاتكم نزل علي سهم الله، دة كلام شنو وعثمان منو وراجل منو ودي منو، ما عارفة ذاتي أنا للوكت دة شايلة التلفون وخاتة في أضاني وما قفلت المكالمة ليه.

المهم الزولة دي ردحت رديح العدو وآخر حاجة قالت لي والله ما تبعدي عن طريق عثمان تشوفي البحصل ليكي يا شلابة يا الما محسوبة مرة يا تمامة العدد ورججججج قفلت الخط.

شلت التلفون وقعدت اعاين فيهو وانا بقول بسم الله الرحمن الرحيم، يا ربي المرة دي منو وجابت اسمي من وين  وعثمان راجلها دة ياتو

قدر ما نحت راسي ما اتذكرت لي عثمانا كدة أنا بعرفو،

ثم ثانيا أنا عبير شينة وبايرة وشلابة،

خليت موضوع عثمان ومرتو في محلو ولقيت قصة جقة وشينة دي أكلت معاي جنبة شديد، طوالي مشيت وقفت قدام المرايا، واحلاتي يا ناسي لقيت ليك نفسي ما شاء الله عسل بس، عيوني صاح صغار لكن معبرات ونخرتي كبيرة شوية لكن ما شاذة في وشي وعندي أجمل خشم وابتسامة، أسنان مرصوصة زي اللولي، شعر أسوااااد غزير وطويل ولون قمحي مايل للأصفر وبشرة صافية ورايقة، صاح أنا مليانة حبة لكن ما جقة، يخسي عليها مرة عثمان الما عندها نظرية، ليه بتحاول تحبطني وتقلل ثقتي في نفسي وجمالي،

فجأتن كدة اتذكرت إني ما بعرف نهائي زول اسمه عثمان وقلت لنفسي يا بت يا قشير قصدي عبير هسع المرة الما نصيحة دي لو جات البيت وعملت ليكي مشكلة مع امك وأبوكي وأخوانك وجابت ليكي فضيحة في الحلة دي تقبلي وين، هسع يا عبير بدل تشوفي الكبة الجاتك قاعدة تعايني في المرايا وتتعوجبي لرقبتك، ما بسألك نهائي،

طيب، صاح العقل زينة، أها لازم أولا بالتبادي تعرفي عثمان دة منو المتهمنك بمحاولة شلبو ومرتو دي منو وجابت اسمك ورقمك من وين

وقعدت افكر يا ربي أكلم أمي وأحكي ليها القصة وللا بعدين المرة دي تبقى لي في رقبتي، أصلا زهجانة مني ومن رفضي للعرسان المخستكين البتجيبهم هي وخالتي إحسان وآخرهم مصباح ود خالتي إحسان ذاتا،  الصايع الضايع الما بقعد في شغل ولا عندو مبدأ في الحياة، قال شنو جايبنو عشان أنا أصلحه، عشان أنا قارية سايكولوجي وشغالة باحثة اجتماعية في مستشفى النفسية بتاعة بحري، بريييي زولهم دة ح يجنني أنا ذاتي أكتر من المجانين البعالجهم، هسع أمي عارفاها ح تقول لي عثمان دة مالو، والراجل محللات ليهو أربعة وما يمكن زول كويس وبقدر يفتح بيتين وأخش لي في موال كدة ما أقدر اطلع منو.

غايتو بس الحمد لله على راي المثل يا قاعدين يكفيكم شر الجايين قصدي شر الضاربين تلفونات، مرة عثمان مالها علي يا اخواني وكل شوية أتذكر قصة جقة وقبيحة واتوجع زيادة وأمشي أعاين في المرايا حبة وأقول ما شاء الله تبارك الله على نفسي (عسسل يا عبورة)

وفجأتن تانية غير الفجأتن الأولى رنننن التلفون يضرب، ألقى ليك نفس الرقم بتاع مرة عثمان، أيوة اصلا اتذكرتو با ال٥٥ الفي آخره واختف ليك السماعة وأنا هايجة هيجان شديد هووووي يا مرة انتي انا لا بعرفك لا بعرف عثمانك المزعوم وأحسن تحترمي نفسك ويكون لمعلوميتك واحد ذاتو معرس مرة نباذة ودعاية زيك ما بلزمني ويكون لمعلوميتك انا لا بايرة لا شينة لا جقة تلقاكي انتي الشينة وجقة وهو ذاتو فك ليكي بورتك وندم، انفتحت فيها وأبيت أفرمل نهائي، لازم أتسدى حقي عاد ما هبشتني في اللحم الحي، صاح عمري ٣٣ سنة ونص لكن مااااا بايرة أنا براي البرفض العرسان الكرور الما نافعين،

الموهيم وأنا منفعلة شديد وهايجة قالت لي

– أنا بعتذر ليكي يا أخت شديد أنا لخبطت، اسمك ورقمك أدوني ليهم لأني كنت عاوزة باحثة اجتماعية لود أختي وفي نفس الورقة كتبت اسم واحدة قالو لافة على راجلي دايرة تختفو وما فرزت الرقمين، لقيت رقمك ودخلت فيكي شمال كدة معليش يا أخت،

– يا سلام، بالبساطة دي دايرة تعتذري بعد ما خليتيني اتعقد وأعاين لنفسي ديشيليون مرة في المرايا وأفكر جادة أعرس مصباح ود خالتي  السجمان عشان اتخارج من قصة البورة،

– معليش والله أنا متأسفة يا دكتورة

– بلا دكتورة بلا زفت

أقول ليكي حاجة غالبا ح أفتش عثمان راجلك دة ولو لقيت فيهو أي عمار ح أشلبو منك انتي واللافي معاها الجديدة

ورزعت الخط في وشها

شوف المعولقة قال شنو أنا شينة وجقة وبايرة 🤨🤨🤨

—