هل اطلق الدعم السريع سراح 400 ضابط شرطة وللا (عين) 400 غواصة شرطة. هل الشرطة عندها قاعدة بيانات زي نادي الهلال عشان يقول لينا ديل (مسجلين) عندنا وللا جايين إعارة وإعارة تعني عندنا (عارية) وعارية يعني ما حقتنا. 400 ديل قبضوهم كيف ، وللا ضربهم السلك زي طير القطا عند المغارب. بعدين اليونيفورم جدييييد أول لبسة وعمري ما شفت اللون الظهري والأبيض ده سمح كدي إلا لامن يكون (تعيين جديد) والرتب وغالبيتها عقيد برضو أول ختة ليها والنجوم ترقش. وبعدين هم فرحانين مع إنو الأسير ده بطلع خجلان من نفسه وفي نص هدومو ومكتئب لحدما يجيبوهوا للعصبية والنفسية ، قاعدين يبشروا. وبعدين أنا بعرف إنو مافي عقيد شرطة بابس (مبهدل) يعني ما ممكن يطلع لابس رسمي والقميص بره البنطلون إلا في لبس خاص لامن تكون اللبسة (بدلة). وبعدين ضباط الحركة ديل قبضوهم من وين بالعدد ده ومع الموية والكهرباء القاطعات ديل غسلوا وكووا كيف. (آناس إن بتسمعوا كلامي الهدوم دي هدوم جديدة) .
تسليم الأسرى العادييييين بكون فيهو احتفال (وتسليم وتسلم) أو (تبادل أسرى) وصليب أحمر وصمت من الجانبين. قبل شهور شاهدنا الشيخ الذي (توسط) يستقبل كيكل ، أما كان لكيكل أن يحضر هذه (المناسبة) ويتفشخر علينا بأنه رجل سلام وإنسانية ودين ويخطب خطبة عصماء.
في البريميرليق لما فريق يفقد الكرة بطريقة سهلة يعني (تمريرة خطأ) المذيع (وأنا بتفرج بالقناة البإلإنجليزي) بقول (he gave the ball very cheap) يعني أعطاهم الكرة رخيصة. فيا ترى ماهو سبب هذه البيعه الرخيصة من الدعم وما وراءها ، أليس منهم رجل رشيد مثل جوارديولا أو أرتيتا يقول لهم ما يقوله (أبوعبيدة) لو عاوزين أسراكم الضباط ديل تستلموهم في جدة مثلا أو أي تماحيك من تماحيك الدعم.
برضو من المتوقع في مثل هذه المناسبات أن (يسوق الدعم لنفسه عالميا) ويرفع هذا الحدث على منصات عالمية.
أورد الشاعر الإغريقي هوميروس في الإلياذة والإوديسة عام 500 قبل الميلاد قصة حصار (طروادة) وقصة حصان طروادة ولأننا في حكومة (الأمر الواقع علينا) لا نقرأ تلك أساطير الأولين وخزعبلاتهم القديمة فإننا من الجائز (أنا بقول من الجائز) أن نقع فيها وتقع علينا.
على كل حال، أعتقد أن جنود وضباط الجيش والشرطة قد عرفوا كيف ستتعامل معهم المؤسسة العسكرية عندما يقعوا في الأسر. هم يحملون أرواحهم في اكفهم ويدافعون عن الوطن بتجرد، ولكن عندما يتم أسرهم يتم التشكيك في ولائهم ووطنيتهم ويتم وصمهم بالعمالة والارتزاق. وقد سمعنا من قبل أيضا ان هناك من ينادي بقصف المناطق الاسترتيجية التي يوجد بها اسرى محتجزون.
والله عندنا جنود وضباط في القوات المسلحة والشرطة مستائين جدا من هذه المعاملة من مؤسساتهم، لأنهم عرفوا كيف سيكون مصيرهم عند الوقوع في الأسر.
المهم الرسالة وصلت لعدد كبير من الضباط والجنود.
وحسبنا الله ونعم الوكيل
ابو دقيهة دا جنا ولا شنو ؟؟ والله الخوفة الدخلوها فيكم الدعامة ما بتمرق بالساهل
دي حالة متأخرة يا اخي روق ..
“يحسبون كل صيحة عليهم”
والله انتو بقيتو الواحد فيكم يلاوز ويزازي من ضلو من شدة الخوف …
تتخيلون كل شئ حتي الاسري المفرج عنهم صاروا خيلاً قد تكر عليكم !!
استهدوا بالله وتذكروا قول القائل …
ما زلت تحسب كل شيء بعدهم ** خيلا تكــر عليكم ورجالاً
حَيِّ الغداةَ برامةَ الأطْلالا *** رَســماً تَقَــادَمَ عهــده فَأَحـالا
إنّ الغَوَادِيَ وَالسّواريَ غَادَرَتْ ** للريح محترقاً بِهِ وَمَجالا
وهذا صرب من الخبال الذي جعل الجنجويد ينتصرون علي نعامات كرتي حي قبل ان يهجموا عليهم … هل هذا يدخل في باب الاعذار والمبررات الاستباقية … “الدعامة غشونا بي حصان طروادة” … اختشي واركز !!
كتر البتابت عيب !!
كلامك في محله تماما ومطابق لكلام الفريق عابدين الطاهر رجل المباحث العبقري واظن ملاحظات زي دي قد تفوت علي استخباراتنا الجات بفوق راسها مدرعات الغزاة من الزرق لما دخلت مطار مروي ودمرت الطيران الموجود …الحذر قم الحذر والاعتمام علي المقاومة الشعبية احسن من انتظار البرهان عشان يتقدم خطوة للتحرير
ظباط وجنود الشرطة ببن مطرقة المليشيا أ وسندان المليشيا ب
وحكامات الأقلام يلعبن علي المصالح حسب هرموناتهن