عنقاء النيل
رندا عطية
صحفية سبرانية
المقادير:
1. بصل و..
– هه !!
– شنو؟
– مُلاح ام زُماطة؟!!
– هو نحنا ناقصين؟!! ويطلع شنو مُلاح ام زُماطة ده كمان؟!!
لارد على هؤلاء المقاطعين بطولة بال بأن:
– يا جماعة الخير حيلكم حيلكم ، إنتو اكان صبرتو وخليتوني اوضح ليكم مقاديره ، ح تعرفوا ماهية مُلاح ام زُماطة بضم حرف الزاء.
علما انه انا شابه حالي حالكم:، اول ما وقع اسمه على مسامعي ، من لدن استاذة/ كلتوم ، جارتنا ، ابنة الابيض عاصمة كردفان ام خيرا جوه وبره ؛ اللي جابت سيرته ونحن في خضم ونسة ، في كرري ام درمان في عام 2023م حيث جمعتنا مقادير الحرب.
والتي شرحت لي طريقة عمله خلال شهر و ..
– وه!!
– شهر!
ومع اضافة احدهم ساخرا
– شهر!! شرح طريقة عمل مُلاح في شهر!!! يا زولة شهرزاد الحجوة بتحكيها ل شهريار بالكتير في يومين!
اجبته بحراق روح:
– هو لكن شهرزاد وشهريار كانوا في كرري ام درمان؟!! كانوا في نص الدانات ، شهريار وشهرزاد ديل كانوا في وسط القصف المتبادل ما بين الجيش وقوات الدعم السريع! يا ناس عليكم الله خلوني انتهز فرصة هذه الصنه والهدوء النادر ده عشان اشرح ليكم طريقة عمل مُلاح ام زُماطة من اول، اهه قلنا شنو! قلنا شنو!! ايوووووه قلنا:
المقادير:
1/ بصل + زيت + ملح + بهار
2 / ماء بطيخ مخمر
3/ دكوة بيضاء
4/ ويكة
واللي اول ما ابتدات تشرح لنا طريقة عمله ، اي مُلاح ام زُماطة قاطعتها وانا بدهشة متمحنة
– هو بالله البطيخ! البطيخ الواحد ده بيتعمل منه ملاح!!
ومن بعد اجابتها لي بان:
– نعم.
واصلت استاذة/ كلتوم معلمة الاساس كلامها بهدوء وسلاسة ان طريقة العمل:
نصفي ماء البطيخ ، ونجعله فترة من يومين ، إلى ثلاثة ايام ، في إناء محكم القفل ل التخمير، ونخدع البصل والزيت ، ثم نطفئه ، ثم نضيف ماء البطيخ على البصل ، ونضيف الدكوة البيضاء حتى يغلي ونضيف الويكة على حسب الطلب ، وبعد يستوي تمام ، اضافت استاذة/ كلتوم بصوت مستمتع:
– وبالهناء و..
لاقاطعها بشحتفة روح وبصوت ضاحك : إنه إن شاء الله لمن الاحوال تروق انها حتما ولابد من انها تعمل لينا مُلاح ام زُماطة و..
ومن هنا ام درمان/ كرري يوم الاحد اول ايام عيد الاضحى المبارك الموافق 16 يونيو 2024م دايراكم تشاركوني قولة شكرا ليك استاذة /كلتوم ان عرفتينا على مُلاح ام زُماطة ؛ وشرحتي لينا وعلمتينا طريقة عمله.
كما اتمنى ان تشاركوني قولي لها كل عام وانتي طيبة استاذة (كلتوم احمد حماد النور) وفي عطاء متواصل ومتصل ؛ وربنا يوقف وينهي الحرب وترجعي لمدينتك الابيض آمنة وسالمة انت ونور ابنتك ومؤتمن حفيدك ، ولدنا اللي ولد وسطينا عام 2023م في ام درمان كرري .
اتمنى ان تشاركوني تهنئة الاستاذة بمناسبة قدوم عيد الاضحى المبارك ، وانا على ثقة ان تهانيكم هذه ستدخل الفرحة والسرور إلى قلبها ؛ وستزيد روحها صبرا وثباتا وطمأنينة. روحها التي باتت تهفو على راس كل ثانية ودقيقة للرجوع إلى مسقط راسها، مدينة الابيض / كردفان ام خيرا جوه وبره .
واوعدكم اني انقل لها تحاياكم واحد/ة، تكفيرا على لياقتي ولداحتي عليها في كل الاحوال وتحت كل الظروف ، بقولي لها كل ما عيني تقع عليها:
استاذة كلتوم قلتي لي شنو ما هو .. مُلاح ام زُماطة!!
استاذة كلتوم تمي لي كلامك عن .. مُلاح ام زُماطة.
استاذة كلتوم ماهي مقادير .. مُلاح ام زُماطة؟!!
استاذة كلتوم اشرحي لي طريقة عمل .. مُلاح ام زُماطة!!
الصور المرفقة:
*صورة استاذة/ كلتوم احمد حماد النور وحفيدها مؤتمن.
** صورة البطيخ لزوم زيادة شحتفة الروح.
شكرا ابنتنا رندة عطية …مقالك جميل كدعاش نسمة خريفية …ذكرتيني بالتراث الكردفاني الخالد وبالمائدة السودانية التي يبدعنها امهاتنا واخواتنا في كردفان بحيث لا تاكل نفس الوجبة يومين متتالين …وربنا يمد ويبارك في عمر اختنا استاذة كلتوم وهي تنقل لكم بكل اريحية ابداعات الكرم الكردفاني ..
السلام عليكم
حقيقي سعيدة ومتشرفة باستحسانك للمقال
حقيقة وكما قلت المائدة السودانية عامرة وغنية.
دعواتك الطيبة ل استاذة كلتوم إن شاء الله توصلها
تقبل جزيل شكري ومودتي
يابت الصول عطية نعم أم زماطة ملاح بموية البطيخ لكن مش نوع البطيخة الصورتيها دي! ملاح أم زماطة بسووه بموية البطيخ البلدي الاغبش داك البخزنوه في الصيف في الكرباب وببجنوه لأكل البهايم وسقيها في الصيف حيث لا ماء مع الجو الحار ومويتو بيضاء ولبتو ممجرة ويجمع حب البطيخ للأغراض المختلفة كعمل عصيدة أو مديدة البجبجي إلى عصر زيته وقليه لعمل التسالي وكده. أما ميوته فليست حلوة لأنو ما بعملوه من البطيخة أم دم فهي لا تتحمل التخزين ومويتها ما كتيرة أما البطيخة ابو حبا ابوكاكا ابو لونا زيتي أو بني ومويتها تميل للحموضة بعد التخزين البطيخ في الكرباب وليس تخزين موية البطيخ لتحميضها كما ذكرت الحاجة كلتوم وإنما التحميل طبيعي يحدث للبطيخة المخزنة شهور وببجنوه يعني بخرتو اللب وبصفوه بالقش الناعم الناشف طبعا في الصيف تصفية فقط من الحب أو البذور وطوالي بعملوه ملاح بإضافة اللواييق وغالبا عشبة الابديب البرية ناشفة بدقوها أو لينة بفركوها ما بخلاطة طبعا لكن بالمفراكة حقت الملاح الواحدة دي وهو في النار وهو شديد الليوقة وبعملوه خفيف كده وما بستناك تلوك اللقمة زي ملاح الويكة الناشفة العادي واللقة على طول تنزمط في البلعوم لذلك سموه ملاح ام زماطة عرفتي؟ ضيفي لمعلوماتك باكلو بيه العصيدة فقط وليس الكسرة أو الرغيف بس لقمة العصيدو الحارة ديك عشان كده تلقي الجماعة بزمطو في اللقام مع أصوات الزمط مع لية في الرقبة من كية اللقمة داخل البلعوم بكامل حرارتها غير مخففة باللوكان في الفم ودي نوع العصيدة البخلصوها الجماعة من الصحن والبوخ لسه لاوي ولذلك تسمع كلام زي خلصتوها سريع كده اصلكم ماكلنها بأم زماطة؟
السلام عليكم
شكرا ليك على الشرح االجامع ووافي ومفصل ومسحتف للروح لتذوق ملاح ام زماطة بما يؤكل وكيف يؤكلبالعصيدة البوخها يلوي.
كان ما توضيحك لنوع البطيخ اللي بعملو بيهو ملاح ام زماطة كنت حسع اتمقلبت زاشتريت البطيخ الاحمر ده.
اخيرا وليس اخرا ولتعم الفائدة بستأذنك في اني اخد تعليقك وشرحك الوافي ل ملاح ام زماطة وارسله مقرونا بلقبك ( الكردفاني الحمري) لكل من ارسلت له مقالي اعلاه فهلا اذنت لي؟ مع العلم انني ساوضح ان تعليقك هذا ورد ب الراكوبة.
لكن النكلمك من حسع اني ح ابدا ردك ب يا بت عطية حتى لا يتشتت انتباه القراء الذين يعرفونني ب رندا عطية
تقبل تحياتي وشكري
يابت الصول عطية نعم أم زماطة ملاح بموية البطيخ لكن مش نوع البطيخة الصورتيها دي! ملاح أم زماطة بسووه بموية البطيخ البلدي الاغبش داك البخزنوه في الصيف في الكرباب وببجنوه لأكل البهايم وسقيها في الصيف حيث لا ماء مع الجو الحار ومويتو بيضاء ولبتو ممجرة ويجمع حب البطيخ للأغراض المختلفة كعمل عصيدة أو مديدة البجبجي إلى عصر زيته وقليه لعمل التسالي وكده. أما ميوته فليست حلوة لأنو ما بعملوه من البطيخة أم دم فهي لا تتحمل التخزين ومويتها ما كتيرة أما البطيخة ابو حبا ابوكاكا ابو لونا زيتي أو بني ومويتها تميل للحموضة بعد التخزين البطيخ في الكرباب وليس تخزين موية البطيخ لتحميضها كما ذكرت الحاجة كلتوم وإنما التحميل طبيعي يحدث للبطيخة المخزنة شهور وببجنوه يعني بخرتو اللب وبصفوه بالقش الناعم الناشف طبعا في الصيف تصفية فقط من الحب أو البذور وطوالي بعملوه ملاح بإضافة اللواييق وغالبا عشبة الابديب البرية ناشفة بدقوها أو لينة بفركوها ما بخلاطة طبعا لكن بالمفراكة حقت الملاح الواحدة دي وهو في النار وهو شديد الليوقة وبعملوه خفيف كده وما بستناك تلوك اللقمة زي ملاح الويكة الناشفة العادي واللقمة على طول تنزمط في البلعوم لذلك سموه ملاح ام زماطة عرفتي؟ ضيفي لمعلوماتك باكلو بيه العصيدة فقط وليس الكسرة أو الرغيف بس لقمة العصيدة الحارة ديك عشان كده تلقي الجماعة بزمطو في اللقام مع أصوات الزمط مع لية في الرقبة او خنسة كده من كية اللقمة داخل البلعوم بكامل حرارتها غير مخففة باللوكان في الفم ودي نوع العصيدة البخلصوها الجماعة من الصحن والبوخ لسه لاوي ولذلك تسمع كلام زي خلصتوها سريع كده اصلكم ماكلنها بأم زماطة؟