بدرالدين محمد
همسة شوق
لليل الهادي
وظل النيمة
في شارع النيل
لناس رويانة
بحب ومحنة
وضميرهم صافي
والجواهم زي براهم
قلوبهم صافية
وكلامهم دغري عديل
ناس اجتمعوا
بريد ومحنة
في شمبات
والوحدات
وامبدات
والثورات
والكلاكلات
ومن كل انحاء
المدن التانية
في الجامعات
واحلى مقيلهم
شارع النيل
والاطفال لو شفتهم كانوا
بيجروا جري
للمنتزهات
مع اهاليهم
مع اصحابهم
احلى طفولة
وما نسوا شليل
حتى وبعضهم
كان بتغذى
على الدرداقات
وبرغم الحاصل
وكل آلامنا
بنغني نقول
باكر ضواي
وبنشيلوا املنا
في الظلمة شعاع
بنقول لوطننا
لو صعبت فيك
واتعثر حالك
ما هو ضياع
ايام وتعدي
وتعود ايامنا
امل وحنين
عمل وعمار
والشايفنوا ضياع
هو سحابة صيف
والصيف لو طال
من بعده خريف
ترجع مخضر
وننعم في حضنك
يا اغلى عزيز
تفرهد ازهارك
وتثمر اشجارك
اصلوا بذورك
ليها جذور
يا صوت قمرية
تقوقي في سور
يا صوت نقارة
ونغم طمبور
ويا الغنواتك
في الونسات
ويا الكلك نور
