مشاعر الجنوبيين ما زالت معلقة بالسودان.. يطلق الجميع في جوبا لفظ "الخرطوميين" على الذين يجلسون في شارع الثورة.. في ولاية واراب (منطقة سلفاكير) أطلق العائدون إلى قراهم اسم الخرطوم الجديدة.

الحمد لله الذي اخرج عنا الاذى وعافانا

والله نحن بنحب ابناء الجنوب وزعلانين جدا للانفصال والله لوبيدنا نضم الجزيره للجنوب وقطعا ده ارحم لينا من الجماعه اياهم:lool: :lool: والله انا ايضا بفرح عندما اشوف صوره د.استيلا قاتيانو :lool: :lool:

من الصعب جداً للانسان السباحة عكس التيار!!!:o :o :o :o :o :o :o

الله حلاكم من الكيزان بس رماكم فى باقان الحاقد وقدر اخف من قدر وطالما ده خياركم مبروك عليكم والله بوفق دولتكم

سلم لي عليه وابعث امنياتي الزايده وشوقي ليهو
ما في زول ولا جريده تتعاقد مع استيلا عشان نحن خرمنا لكتاباتها ونقول زي ما قال محجوب شريف
مرت الاشجار وكنت الطف جار

يظل السودان دولة واحدة برغم اراء وتقلبات الساسة وعدم التقدير للمشاعر الشعوب وسيظل اخوان من جنوب من التقيناهم ف دروب الحياة المختلفة يظل بينا الود وامل اللقاء ف دولة السودان الواحد مرة اخرى

هذا الانفصال ليس هو خيار الجنوبيين ولا الشماليين هذا حدث نتيجة للسياسات الاسعلائية التىيمارسها من يدعون الاسلام على كل الاعراق فى السودان وانا اليوم شمالى ولو خيرونى لاخترت ان اعيش فى الجنوب ليس كرها فى السودان ولكن فقط لاعيش حياتى بعيدا عن ظلم الاقربين — المتكبر كالطير كلما علا صغر فى اعين الناس نرجو ان يتوب اهل الانقاذ الى رشدهم ويزنو امر العباد والدين بعيدا عن التشدد وببصيرة والا فالانفصال مصير كل الاقاليم — نقول للاخوة فى الجنوب اننا نتفقد ونتحسس ما تركتموه من فراغ فى شتى بقاع السودان فنشعر بالحزن ونصاب بالاحباط لما أل اليه المأل فى السودان ولكن وحدة الوجدان والمشاعر النبيلة المشتركة عزاؤنا واملنا للم الشمل

أجييك أخي دينق ونحن لن نسى إخوة لنا في الجنوب من زملاء دراسة وعمل وغيره وأيضاً نقدر لكل من صوت للإنفصال بأنهم لم يصوتوا إلا كرهاً للإنقاذ وسياساتها والله كلنا بنحب السودان لكن وضعنا في نفس الظروف التي مريتم بها لصوت للإنفصال

ونحن نعتذر لكل إخوتنا الجنوبين عن كل ما لحقهم من جهالتنا التي لم يأمرنا بها إسلامنا وعنصريتنا التي لم تأت بها شريعة

والتحية مني لكل مريخاب الجنوب الذين ضربوا المثل الأعلى في الوطنية بذهابهم إلى يوغندا لتشجيع المريخ

كما أحي رشاشات الشمال والجنوب

بعد قراءتي للمقال جد حزنت من الوضع الحصل في السودان- اقسم بالله نحنا نحبكم يا الجنوبيين لانكم اخوانا وتربينا مع بعض لكن ربنا ينتقم من البشير وحكومته ومن خاله – ربنا ينشف الدم الفي عروقهم – الاهي لا جعل فيهم بركة – فصلو الاخوان عن بعض – لكن والله والله نحبكم يا الجنوبيين.عشمنا بكره نرجع زي ما كنا بعد ما يذهب الشياطين ديل – كلاب الجبها.

أخي دينق ابيي

لك التحية ،،،،

ظلم النخبة الظالمة في الشمال ليس كل هم كل الشماليين ،،، وياما كان هناك حكومات سابقة وانظمة سابقة اسقطها الشماليين انفسهم وبالثورات والانتفاضات ،ومات الكثيرين من ابناء الشمال بسبب ظلم تلك الحكومات ،،،

انتم صوتم للانفصال ،،، وتسببتم في فصل الجنوب من الشمال ،، والسبب هو انكم تكرهون الشماليين لانكم تعتقدون انهم ينظرون لكم باستصغار ،، ولكن للأسف انتم اخترتم الاختيار الخطأ ،،،، الشماليين هم اكثر الناس في الدنيا اقرب لكم من حيث المعاملة وحسن الجوار واحترام حقوقكم ودينكم وعاداتكم ،،،،،

نسيتو العشرة

أنا ماعارف ليه عندى قناعة بأن هذا السودان مستحيل أن يتم فيه الفصل الوجدانى بين الشعبين ،، وكمان عندى إحساس أقوى بأن السودان شماله وجنوبه سيعود موحدا كما كان وأكثر صلابة وتماسك من زى قبل ،، إن شاء الله يارب

صدقت ياأخ مثيانق شريلو-جوبا

من تقريرك الجميل الذي يوضح مدى ثقافتك نقلنا باحاسيسنا معكم الى جوبا وانا اعلق وفي خاطري ( يا مسافر جوبا) وفيفيان وميري وجبل الرجاف الما بنشاف مدن وطبيعة لم نراها لكن تظل عالقه في اذهاننا هذه المسميات الجميلة .

تاكيدا لاحساسك وانا اتابع التلفزيون للاشقاء في جمهورية جنوب السودان وانا استمع للمذيع ما زال يردد جنوب السودان ويرجع ويعدل لي ( جمهورية) هذا يبين ان الاخوان في الجنوب ما زال السودان الكبير يشكل شياً من وجدانهم . وايضا في ذات المتابعة في مشهد في التلفزيون وقد زار ضابط جمهورية جنوب السودان احدى الشخصيات وقد تقدم لتفقد الصف مع الرئيس سلفاكير ، و في هذه المراسم التفقديه نادى العقيد بأن / سعادة رئيس الجنوب .. تلعثم ورجع وقال جمهورية جنوب السودان

ما عارف هل هذا باقي احساس وتعلق بالسودان الاب ام أخطاء وانه لس ما تعودوا على الاسم المطول جمهورية جنوب السودان بدل الجنوب او جنوب السودان.

ويا مثيانق سلم لي على جوبا وواو وميري وملوال ودينق وشول

والابنوس والفافاي
واكيد نحن كشعب في الشمال او الجنوب احساسنا واحد وحسرتنا وصدمتنا ما زالت قوية لم نفق منها لما حدث لانقسام السودان وتبقى السياسة القذره هي التي فصلتنا

أستاذي الكريم/ عبد المنعم الفيا: لقد ركبت مركبا وعراً سيكلفك الكثير بمحاولتك ريط خيوط الشأن السوداني اللغوي بالنسيج العربي المهترئ.. خاصة وأن هناك الكثير من (الثقوب) في نسيجنا نحن، اللغوي وغير اللغوي، تجعل من "عجمتنا" أو "فصاحة" لساننا من دون سائر الشعوب العربية،أمراً ثانوياً، خاصة وأن ما كان يعرف بــ(السودان) حتى أشهر قليلة مضت، أصبح (سودانات) وقبائله – الناطقة بالعربية أو بغيرها- أصبحت في حالة تلاعن وتباغض. أعانك الله في محاولتك المستميتة أن تجعل من فسيخ أهل السودان.. شربات.

اخوتنا الجنوبيين…….والله نحن اكثر حزنا منكم.

انا لو كنت جنوبياً وقرأت عدد واحد من صحيفة الانتباهة لصوت للإنفصال مئة مرة اما اذا رأيت عتل الجاهلية يذبح ثوره الاسود لاقترحت ترحيل الجنوب لجوار بوركينا فاسو وهذا سيحدث ايضاً لو استمعت لتصريحات كمال حقنة.
الاستفذاذ يؤدي الى القتل والتمثيل بالجثة وهذا ما تعرض له اخوتنا الجنوبيين عندما كانوا حائرين بين الوحدة والانفصال خلال السنوات الستة وكانوا في حاجة لمن يأخذ بيدهم بالحسنى ويطبطب على جراحهم ويطمئنهم على وضعهم في السودان الموحد بل كانوا في حاجة لمن يعتذر لهم على المستوى الرسمي لما تعرضوا له من حرب ابادة جماعية بالمعني الصحيح وهذا لا يستطيع ان ينكره احد حيث كانت الحرب تدور في اراضيهم وتحرق قراهم ولا يعفي من القتل طفل او امرأة او شيخ كبير اذا تعرض رتل من الجيش الى كمين وكانت رسالة الجيش رسالة الجيش واضحة اقتل اقتل اقتل ولا تبنى قطية او مدرسة وإلا اين الاسرى بعد انتهاء الحرب حيث لم نسمع بتبادل الاسرى بين الجانبين بعد انتهاء الحرب وهذا الموضوع يحتاج لبحث وتنقيب من صحافة الغفلة وصحفيي المكاتب المكيفة في انتظار ان يأتي الخبر شايلة النسيم يهفف ولكن ليس لديهم الجرأة او الملكة في البحث عنه !!
الجنوب انفصل نتيجة العناد السياسي والاستفذاذ من قبل السلطة الحاكمة حيث لم تكن هناك قيم وطنية عليا دونها حد السيف. الكلام مباح الى اليوم في فركشة الوطن وقبل طرد الجنوبيين وحتى دارفور والنيل الازرق وجبال النوبة لو (قلت ادبها) هي الاخرى تغور في ستين داهية وهذا الكلام مطروح بقوة ويخرج كل يوم من الخشوم العفنة بدون حسيب ولا رقيب لأنه قد تربى هكذا بعض السودانيين ولا ينتظر منهم خير وللأسف فالبعض من هذا النوع تبوأ مراكز القرار في الدولة وصار نفث سمه في كل اتجاه…
المصري افعل به ما شئت ولكن لا يأتي لسانك بسؤ عن مصر وإلا سيقتلك ولكن نحن لا نتحلى بهذه الروح للأسف فالسودان عندنا هين ولا همنا في المقام الاول حتى ولو تجزأ لمئة دويلة ويمكن ملاحظة هذا السلوك بوضوح لدى وزير الاعلام كمال عبيد وخال الرئيس الطيب مصطفى ونزولاً لمن والاهم من العامة في حساب الرجرجة والرئيس نفسه بصورة اخرى حيث لم يتخذ اي اجراء ضدهم …
الجنوبيون فيهم نبل وقيم واخلاق قلما توجد في فئة اخرى من الشعب السوداني وقد عشتها وعايشتها منهم بحكم جوارنا الجغرافي لمناطقهم وتداخلهم معنا في سبل كسب العيش ومجريات الحياة اليومية وكدليل على قولي هذا فهم رغم انهم تعرضوا للإبادة الجماعية بحق وحقيقة إلا انهم لم يتطرقوا لهذا الموضوع ولم يرفعوا دعوى ضد الحكومة ولديهم ما لديهم من ادلة دامغة ولا احد يستطيع انكار هذه الحقيقة…

انا من وجهة نظري ان الحكومة كانت تعمل للإنفصال بالقول والعمل خلال السنوات الست بعد نيفاشا لأننا لم نسمع مرة واحدة انها تنازلت عن شئ مصيري طالب به الجنوبيون كي يبقى السودان مواحداً فكانت تفسر كل طلب يصب في خانة الوحدة تقدم به الجنوبيون انه نوع من الابتزاز السياسي وعلى الحركة ان تركع وتأتي صاغرة كما الكلب ينبح والجمل ماشي وعلى الجنوبيين يأتوا في القاطر والحكومة ليست ملزمة بالمناورة والمحاولة للسير في خطهم. هكذا تراكم القهر والغبن لدى الجنوبيين فصوتوا للإنفصال حتى ولو يسقطوا في المحيط ولكن قبلها لم يكن اي جنوبي يحمل الفكر الانفصالي…

تاكد يا ابو السارة انك انت الاذى ذاته ولا بد لنا نحن الشماليين الشرفاء الوطنيين الذين يعشقون السودان بخارطته القديمة ان نتخلص من اذاكم انت والذين على شاكلتك يا متخلف
والله ان هذا المقال اعاد لي الاحزان وغصة ذلك اليوم يوم الانفصال والله لن انسى ذلك اليوم جاءتني خاطرة بان استغل القطار الى جنيف وكلها ساعتين وان اشتكي عمر البشير وحكومته لمجلس الامن اتصلت باخواتي في السودان فوجدتهم اكثر تاثرا مني وبكينا سويا وتذكرنا حسن الجيرة التي جمعتنا بناس نادية وبيتر في مدينتي اقصى الشمال فيا ترى ما الفرق بيننا وبين ابو السارة هذا عجبي

الاخ ابو الساره : ارجو أن تراجع نفسك فيما كتبت ومن أي فهم او دين أخذته ، اما أن كنت كوزاً فلا حرج عليك فيما كتبت لان هذا هو فهمكم للدين الذي شوهتموه ؟؟؟؟؟؟؟؟؟

لابد ان يتلم الشمل من جديد طال الزمن او قصر لانو دا شعب واحد

خنقتنى العبرة وعبر عن دواخلى الدمع
لا كسب الله بنى كوز حتى انفسهم

مبسوطين الله يسهل عليهم جميعا

بلا وانجلى

ان لم يستطع السودانيون ان يقهروا عصابة الانقاذ ودحر الانفصالين والعنصريين من الطرفين خلال وجود هذا الجيل ليوحدوا السودان فلن يتوحد السودان ابدا .. هذا الجيل الذي يحمل الوفاء لبعضه هو حلقة الوصل التي تجعل اعادة وحدتنا وبشكل يضمن للجنوبيين خصوصيتهم وفي نفس الوقت يضمن لبلادنا وحدتها ممكنا ، وان لم نتوحد في عهد هذا الجيل الذي فيه ارتباط ببعضه فهذا لن يحدث في الاجيال القادمه حيث يلعب الانفصاليون علي عامل الزمن وتوسيع الهوه وتنشئة اجيال لاترتبط ببعضها وليس بينها ماضي تستذكره ولامستقبل تدرسه … ولكن تبقي العقبه الاكبر في وجود الانقاذ والكيزان والعنصريين من الطرفين وعلي راسهم خال البشير العقيم .. ان لم نزل هذه العقبه قبل فوات الاوان فعلي السودان السلام .. هذه مسئولية هذا الجيل من الطرفين فهل نكون علي قدر التحدي ام سيكتب التاريخ اننا فشلنا !

مر قرابة 5,000 قارى للمقال فى 6 ساعات ومعظمهم يؤيد الوحدة هذه صورةمصغرة لحال السودان الشمالى
لواعتبرناها عينة عشوائية لك الله يا سودان :mad: :mad: :mad: :mad:

كل الود لطله الزهرة السمراء

الرائعة إستلا ، أنتي السودان كل السودان وصدقيني أنا كفرد من الشعب السوداني غير راضي عن هذا الإنفصال . والخطأ لدي علي عثمان طه، وعمر البشير . هولائي الساده لم يشاورونا كشعب ( من الشمال ) وآسف لكلمة من الشمال ) . صوت جنوب السودان فقط !!! وكل الرض لكل الشعب السوداني .لماذا لم نصوت نحن ؟؟؟؟
صدقوني أنا حزين لإنفصال السودان . وأنا لو كنت من جنوب السودان لكنت طالبت بالإنفصال .للظلم والعذاب والحرمان والشقاء والتعاسة والعنصرية .والإستعباد !!!؟؟ ولماذا كل لهذا ؟؟؟ ومن هم العرب الأحرار !!!؟؟؟ كلنا أفارقه . ولا فضل بيننا في السودان نحن شعب واحد (جنوب وشمال ) وآه آه آه علي هذا الإنفصال . وهذا إنفصال سخيف .
وصدقوني 90% من الدول العربية يعتبرون السودانيين عبيد . وأرجو أن لا نخدع أنفسنا بأننا عرب !!!.
الغالية إستيلا لا تغيبي عنا وأنتي زهرة السودان الحقيقية . ولو كنت أعرف تلفونك لكنت إتصلت فيك ، مع حبي .

رفعت الاقلام وجفت الصحف . والجنوبين قالو كلمتهم التى شكلت واقعهم الذى يعيشونه الان بغض النظرعن اين كان هذا الواقع وتلك العواطف الجياشه لن تغير فيه شئ ومن السخف ان يفعل الجنوبين ذلك بعد ان صدعو رؤسنا بتلك الشعارات الرنانه على شاكلة التهميش والمواطنه من الدرجه الثانيه ووو والى اخيره من تلك الشعارات . كنت اجد نفسى فى قمة العاطفه حيال تلك العاطفه لوكان هذا الاختيار فرض فرضاً عليهم وليس خيارهم الذى بلغت نسبته نسبه من العبط الانسياق خلف هذه العاطفه الجياشه التى ابداها الجنوبين اتجاه الوحده الذى هم نفسهم رفضوها وقالو فيها مالم يقوله مالك فى الخمر.ثم عن اى وحده يتحدث الجنوبين الان وهم بالامس كانو يصفون الذى كان ماهو الآ استعماراً شمالياً للجنوب بدليل انهم لم يذكرو كلمة انفصال قط بيد انهم دوماً يقولون استقلال فكيف بالله تستقيم هذه مع تلك العاطفه والحنين للوحده. مايبديه الجنوبين من عاطفه جياشه لما كان سابقاً له تفسيران لا ثالث لهم اماانهم كاذبون فى تلك الشعارات التى رفعوها فى سبيل ماهم فيه الان اوانهم يحاولون استدرار عاطفة الاخرين علهم يجدون مخرجاً لما هم فيه الان بعدان تبخر ذلك الحلم الجميل واجد ان هذا هو الاقرب لتفسير تلك العاطفه التى هبطت فجاة عليهم

ليحتفظ الجنوبيون بمشاعرهم لأنفسهم فلو كانت صادقة لما كانت نتيجة الإنفصال أقرب للمائة بالمائة. ما يهمنا هنا ترحيل من تبقى منهم بالشمال وترك "وسخ الخرطوم" كما قال فاقان أموم.

مع كامل احترامي لكل المعلقين

انفصال الجنوب بيحللة ليكم عجذ بيت شعر

كالمستجــــــــــير من الرمداء بالنار !!!!!!!!!!!!!!!

ووالله انا لو فى يدي مش افصل امدرمان من السودان الحاكماة الانقاذ

والله لو الانسان يمكن ان يعيش بمنأى عن الاخرين

والله افصل بيتنا من السودان

و لو دعا الحال افصل سريري من بيتنا لو كان بيتنتا بدريرو المؤتمر الوطنى

كانت عندهم قضية و اخدوا حقهم بي ضراعهم

قبل فترة سمعت نكتة جميلة قالوا نسوان السودان طالعين بي مظاهرة بيقولوا فيها

الشعب يريد رجال من ليبيا و مصر و اليمن …………….. تفتكروا لية ؟؟؟؟

الله يلعن ناس المؤتمر الوطنى الذين سعوا من أجل تقسيم الوطن , وفرقتنا ,, ولعنة الله مغلظه على خال الرئيس العنصرى الذى سعى حثيثا لانفصال السودان ,, ولكن سوف يرجع السودان موحدا إن شاء الله رغم كيد وحقد الحاقدين والله اكبر والعزة للسودان الوطن الواحد والعار والخزى للساسه الفاشلين الذين قسموا السودان

انكسر المرق واتشتت الرصاص ايها الجنوبيون ولاعودة لما فاااااات

نتمني للاخوة الجنوبيين ان تعيش دولتهم الجديدة وعاصمتهم ان تكون مثال لنيروبي وتقوم بتاسيس المناخ الاستثماري والسياحي لاننا في الخرطوم نفتقد الي الحداثة في الاسواق وفي الخرطوم رقم البترول لاتوجد منابع للصرف الصحي ممايدل علي عقلية السودان العسكرية التي تمجد الانفصال لايوجد شي في الخرطوم بعد ذهاب الجنوبيين وبا البحلم انو عربي يكون واهم مافي انسان معترف بعروبة السودان غير الجامعة العربية التي انتهي زمانها ولاكن بعد ذهاب البشير سوف يتم التواصل مع الجنوب دون تاشيرة وبدل ادس اباابا ح نمشي جوبا العار كل العار الي مهندس الانفصال الطيب مصطفي وسكرتيره اسحاق احمد فضل الله والتحيا الي شرفاء بلادي

اي شمالي يحب الجنوبيين يجب ان يفرح لانفصالهم ليس حبا للانفصال بل لان اي حكومة شمالية لن تنصفهم لان عقلية ساسة الخرطوم اختزلت السودان في الخرطوم فلا تعترف بمعاناة اقليم ولا مواطنيه وهي لا تستطيع ان تعيش يوما واحدا بدون موارد الاقاليم فلا تتحسروا على الشطر الجنوبي فانه حتما سوف يكون افضل حالا بلاشمال

الجنوبيون فقدو اشياء كثيرة معنوية ومادية بس كل هذا يمكن تعويضة ولكنهم كسبو اهم شي هو التخلص من تسلط الكيزان

we can’t forget the nice days we spent it as a real brothers and we gonna make reunion back when the crazy people get away

عزيزى ادم ام دبالو اولاً ان لم اقم بزيارة بلجيكا قط اما حكاية العلم المرفق اناذاتى حيرتنى ولم ادرى ان كان لبلجيكا او خلافه وهذابالطبع ليس موضوع النقاش . ياعزيزى القاصى والدانى يعلم حقيقة مشاعر الجنوبين اتجاه الشمال منذ الاستقلال حيث انهم لايرون فى الشمال الا مستعمراً بديل للانجليزثم فكرة الانفصال لم تكون وليدة حكم الانقاذ كذلك حرب الجنوب ولو ان الانقاذ اعطتها طابعاً اخر ولكنهم تراجعو عنه بعد ان تمكنو من الحكم وهم اصلاً لم يفعلوذلك الاّ لهذا . الجنوبين لم يخفو ذلك اصلاً ثم انهم لم يكونو فى حوجه لمن يضقط عليهم لختيارذلك لانها امانيهم وماموتمرالمائده المستديره ببعيد عن الازهان فياعزيزى فى سبيل كرهنا للكيزان يجب ان لانقالط التاريخ والذى هو بالطبع ليس ملك للكيزان اوالحركه الشعبيه بقدر ماهو ملك لكل الشعب السودانى جديده وقديمه بمافيه الكيزان والحركه الشعبيه. ثم الجنوبين هم من فعل ذلك وبطوعهم واختيارهم لانهم كانو يحسون باستعمارهم من الشمال كما اسلفت لك ذلك وكانو يتحينون الفرص لذلك وقدقاتلو من اجله تلك كل السنين. كنت اجد نفسى متفق معك كثيراً لو انك قلت بان الحكومات الشماليه على مر السنين لم تقدم للجنوبين مايجعلهم يطردون ذلك الوسواس من نفسهم وتعطيهم الاحساس بانهم جزء من هذا الوطن الذى بمكانه ان يسع الجميع ولكن ذلك لم يحدث . ياعزيزى بنفس القدر الذى اخطئة فيه الحكومات الشماليه كذلك اخطئ الجنوبين عندما اعتبرو انهم مستعمرين من الشمال وانهم يعاملون كمواطنين درجه ثانيه ذلك الاحساس الذى تكذبه تلك العاطفه الجياشه.
اخيراً وددت ان اقول لك اننى ولدت حراً وتربية على ان اقول راى دنما اى تاثير من احد ولايهمنى اوافترض ان يتوافق ذلك مع الاخرين .فليس العيب ان تناقش انسان فى افكاره ولكن العيب كل العيب ان تناقش انسان فى انتمائيه لهذا او لذاك. فليس عيب ان تكون موالى اومعارض فالعيب هو ان تاتى بما هو ضدد طبيعة البشر .ارجو ان تعى مااقول . واختلاف الراى لايفسد للود قضيه مع اكيد تقديرى