د. الفاتح خضر رحمة
في السودان بلد العجائب عادي متمرد يقلب حكومة ويغير شريحتوا والحكومة عادي تنسى دم من قتلهم من الأبرياء وتديهوا دعم ووزارة ومنصب وتلقاهوا كمان ينبذ في جماعتوا ناس امبارح ويتشدق ويصرح ويجيك ناس قريعة وشعراء الوناسات ويشبكوا ليك اسد ومرفعين ويمجدوا ليك فيه وهو اصلا هطلة ساي وزول ورجيغ وكلام شطيح أن لميت من ولدهوا لحدي لحظة رجعهوا لحضن الوطن الهامل دا ما تلقاهوا نظم ليه جملة واحدة مفيدة ولا عرف ليه كلمة فيها فائدة بوذوا بين العرقي والبنقوا والسباب والذباب بس لكن مصيبة بلدنا دي اي زول فكا ليه طلقة وساق ليه همباته قطع بيهم زريبة رمم سوى ليه قضية وعمل فيها مناضل ومكافح وهردس طوالي مسك ليك في التهميش وقضايا التغبيش وهلمجرا وجاب ليه حكامة ونفخ اوداجوا وقام صوف بنمرة مافي ويعجبوك ناس طبيز طوالى فاوضوا على أساس أنوا زول مناضل وصاحب قضية وزولك طوالى مسك الكاش وركب جماعتوا سمبك الزوط وتلقى معاهوا شوية هتيفة من عينة العواطلية حايمين تحت رجلينوا معاطين اي زول يحاول يجس فهموا أو ينتقدوا ديل تمومة الشغل يردحوا ردم والبلد شدة ما هاملة وما عندها وجيع كل ستة عواطلية سووا ليهم حزب وهاك ي مؤتمرات لنهب وطلب الدعم واصبحوا هباتة مثقفاتية فرقهم من همباتت التمرد ديلك ينتموا لفصيلة الصعاليك الرمم دايرين القروش وملئ الكروش وديل ينتموا لفصيلة الهمباته الصعاليك اولاد البيوت البتسرق بفهم وفي النهاية كل همباتي من ديل ينتمون لعرق واحد وهدف واحد المتمرد بياكل بعرق بندقيتوا ودا بياكل بغش الناس باعتبار أنوا ولد سيدا وجدوا فلان ابن فنطيز صاحب الحضرة والامجاد المشكلة ما هنا المشكلة نحن بنتفرج على جهالة ونستمع ليهم وتلقى ناس بزغردوا ويهتفوا ليهم على أساس بلدنا المافيها زول عاقل دي مصدقين أنوا ديل هم شمس خلاصة وفجر فرجا والموهمون مصدقين وراكبين فوق رقاب الناس غايتوا هملتنا نحن الله يجازينا على صبرنا ومغصتنا وعلى زلنطحية قادة الأحزاب وهمابتت التمرد واولاد الاسياد .
برضو ما ختيت أصبعك في مكان الألم
الدكتور الكوز فقد المنطق . بعد ما كان الكلام منمق وغير مفهوم قال احسن يرجع للكار وانحطاط اللغة والاخلاق الكيزانى!!