عثمان يس ود السيمت
في تراثنا السوداني نجد كثيرا من الأعمدة أو العمدان أو العماويد والعواميد. أمبارح بالليل ساهرت مع مباراة الآرسنال ونيوكاسل وانهزمنا اتنين صفر. طفيت النور عشان انوم لكن تلبت صحيت ، خفت علي روحي. هل معقول بقيت اتلقى الهزائم بنفس طيبة زي الجماعة إياهم وأنا الذي كنت إن ركت ضبانة في نخرتي بقطعا (أفو يا ود السيمت أمانة ما كتل راجل) . يا جماعة الحصل لينا ده شنو. يا ربي الحصل لي ده يكون حصل لي ناس البرهان والقيادة من بدري شوية عشان كدي تصالحوا مع الهزائم. وفي الليل البهيم حق امبارح استعرضت اخبار النهار من طلعت الشمس لي غيبتا ، وهاكم ليها. أمانة السهر ما كعب.
عمود جنبة:
تحت تحت سمعت الحكومة بتاعت بورتوكيزان كأنها سلمت وتكاسلت وتراخت عن انذاراتها بتبديل العملة عشان العملة دي ممكن تكون عملة (سودان الجنبة اليمين) وانت ضهرك للجنوب وده طبعا لما تتم المفاصلة ونركب مفصلات للباقي الفضل من السودان ويبقى السودان ضلفتين، وتكون الجنبة الشمال ليها العملة القديمة. ويكون الضيع مالنا ودمنا جيش الجنبة اليمين والزاعط ميتينا و… والذي كان يطلق عليه الدعم السريع هو ديش الجنبة الشمال. وعندما قرأت مقالا للنور حمد يقترح حكومة موازية ايقنت أن أمورنا ليست موازية بل مسايفة. يا ربي حيسموهن شنو ، أنا بقترح حاجة ظريفة كده يعني زي جنوب أفريقيا RSA مثلا RSR و LSR جميلة ياخي ؛ جمهورية الجنب اليمين Right side republic وعاصمتها بورتكيزان وجمهورية الجنب الشمال وLeft side republic وعاصمتها الضعين. ما في زول يسألني من الخرطوم (عشان حاخسرو). وكفره نيران زي جهنم تحرق الجنب الشمال، يا كيزان ما تفرحوا ، احمد المصطفي لما كان بلحن فيها في القطر كان مقبل ناحية الشمال الجغرافي ولما غناها في ليبيا كان مقبل ناحية الجنوب الجغرافي ، يعني حريقة فيكم كلكم. (كلكن يعني كلكن).
عمود كرنك:
تماهيا مع ما ذكرناه في عمود الجنبة خرج علينا وزير خارجية امريكا انطوني بلينكن بعمود كرنكن ضقلو يركب وكانت حيثياته مطولة بدون داعي وفي نهايتها اعلن عقوبات على جمهورية الجنبة الشمال تاركا العقوبات على جمهورية الجنبة اليمين لترامب ، عشان تخصص الابادة الجماعية والاغتصاب وضد الانسانية ده تخصص الدولة التي ستنتهي بعد اسبوعين في امريكا أما تخصص الإرهاب والحاجات التقيلة دي تخصص ما بعد 20 يناير (هلا هلا). وكل واحد حياخد نصيبو قدر عمايلو والاتنين عمايلم تهوي بهم في النار اربعين خريفا. وحتاخدوا على دماغكم لحدما يبان لكو صاحب
. عمود طوالي :
سمعنا بالمبادرة التركية الأماراتية. في الأول كانت المبادرة التركية و(طوالي) البرهان قبل وكيزانو بالدس قبلوا وكشموا متهللين بس تحت تحت، إلى أن اعلن الإسم الجديد (المبادرة التركية الإماراتية) فكشر الكيزان وزمجروا تحت تحت برضو. ولحاجة في نفس واحد ما عارفنو منو (طوالي) خمد بريق المبادرة ويبدو أن هناك قوة قادمة زي الفريك ما بتدور شريك كشحت (كيزان) موية فوقا وهمست في اذنهم وما قرصتا و (طوالي) نفست ليهم الكورة. أصلو يا جماعة عمود طوالي بياخد (عزمو) مباشرة من عمود الكرنك بعد ما (الديفرنش) يحدد ليهو السرعة ويختو قدام يمشي ويختو ورا يمشي والكرنك الجايينا بعد اسبوعين خمسة سرعات توماتيكي توماتيكي. وبعدين يا جماعة العايز يتقدم بمبادرة يمهلنا شوية لحدما نشوف حتكون في جنبات تانية وللا جنبتين بس. وقد يأتيكم الشيطان على هيئة رجل من أمريكا. فيكون في رأيه القول الفصل.
عمود اسبتالية:
في الزمن الجميل (وآآخ من النوستالجيا يا أخوي الطاهر) كان في عدة حقت الاسبتالية اشهرها عمود الأكل وترمست الشاي وتوب الزيارة ونعلات الزيارة (عشان زيارة الاسبتالية ما بتنمشي بالملجة والكركب) (ارجو الاستعانة بكوامر للشرح). فقد جاءني فيديو على الواتساب اللخيدر على قول الفاضل الجبوري من جمهورية الجنبة الشمال. الفيديو صادم بلغة الجماعة بتاعين جمهورية الجنبة اليمين. فقد رأيت رتلا من الليلات العلويات واللكاسس وجديدة لنج كرت ورقة من بورتكيزان لميدان ولادة أحدث مليشيا مباشرة تحمل مجموعة من ضباط الخلا سمان ومدفدفين ماهم وصيمين زي حميدتي (حلاتو) . كانوا من أبناء كانو في شمال نيجيريا بتاعين اولى وسطى في الزمن الجميل. من هوسة السودان ، عراة من اعلى يستعرضون عضلاتهم جيئة وذهابا وبيادتهم يسيرون كما كنا نسير في أول أيام الكديت ويبدو أنهم أخذوا على عجل بمناسبة الحفل الاستعراضي بولادة الطفل المعجزة الذي سينقذ ناس بورتكيزان ويحرر مدني وتمبول وامضبان. عمود الزيارة في الزمن داك كان اربعة طاسات وكانت ترص بي ميز ، فوق أول طاسة الكسرة وتحتها السلطة وتحتها التبيخ وآخر شي اللايوف، عشان إن لحقت خليت اللايوق فوق مع أي جلفغة وللا مجمجة (اللايوق) ببوظ العمود كلو وعليكم قراءة التاريخ عشان تشوفوا لما رصوها وخلوا اللايوق فوق حصل شنو ونحن لينا قريب سنتين اللايوق فوق راسنا. . هسي أنا حاسي وربنا يكضب الشينة عمود اسبتاليتنا بقى طول عمود النور والجلفغة كترت والجلبغة زادت والمجمجة (ما بتمهلكم ترصوها) والطاسات كلها لواييق. وأمانة ما اللايوق اللايقتوهوا ده ما يبشتن روسيكم المربعات ديل..
عمود صحفي:
خليتو ليكم.
