ماذا تعرف عن مليشيا البراء؟

مهادن الزعيم

◆ امس امير كتيبة البراء بن مالك (المصباح ابوزيد) كتب في صفحته على الفيسبوك انو قواته بقى عددها (21 الف) خلال فترة الحرب عشان كدا قرروا يحولو الاسم لي (لواء البراء بن مالك) وطبعا الكلام دا عمل جوطة في السوشل ميديا وفي ناس كتار كانو بسألو (الكتيبة دي جات من وين اصلا) …تعالوا نعرف هم منو في المنشور دا …

◆ اسم الكتيبة دي اصلا موجود من زمن حرب الجنوب وهي تابعة للدفاع الشعبي (المحلول الان) والشباب ديل قاموا باحياء الاسم وجمعوا عدد من الاتربوا على حكاوي اسحق فضل الله اناشيد الجهاد وبطولات عبيد ختم وعلى عبد الفتاح، واغلبهم موظفين في قطاعات الدولة (شركات البترول والبنوك من اطباء ومهندسين وصيارفة وبعضهم من هيئة عمليات جهاز الامن) وطبعا كلهم نالو حظ من التدريب العسكري في الدفاع الشعبي في اواخر عهد الكيزان …

◆ اختفت الكتيبة بعد سقوط الكيزان بثورة ديسمبر المجيدة وارتفاع اسهم النضال المدني السلمي (دا م الجو الممكن يظهروا فيهوا) عدا قلة منهم ظلوا متواصلين تحت لافتة العمل الاجتماعي وكل مرة يمشوا لي واحد من اخوانهم في اي حتة بمناسبة انو نجح او عرس (الغريبة كانو بمشوا وهم شايلين كلاشات من وين وكيف وليه عليمكم الله) …

◆ حاولو يتجمعوا بصورة اكبر ايام الفترة الانتقالية في المظاهرات الكانوا بعملوها الكيزان انذاك (ما يسمى بمواكب الكرامة) وافطاراتهم الرمضانية لكن الموضوع م حقق الحاجة ال هم عايزنها لصعوبة تجميع عناصر اتربت على القتال والجهاد بهدف تنفيذ مظاهرات سلمية ….

◆ بعد انقلاب 25 اكتوبر حسوا انو دا جوهم وبدأو يتجمعوا من تاني وعملوا صفحة على الفيسبوك لاول مرة بتاريخ نوفمبر 2021 وبدأو في مراسلة اغلب عناصرهم القديمة للتوحد مرة اخرى وارتفع نشاط الكتيبة بعد الانقلاب ونجحوا في ربط عدد كبير من عناصرها عن طريق الزيارات الاجتماعية فاعادوا تقسيم العضوية لي ثلاثة قطاعات في ولاية الخرطوم (بحري وامدرمان والخرطوم) …

◆ إبان توجه البرهان نحو التطبيع مع الكيان الصهيو*ني لكسب المزيد من الدعم لانقلابه تجمع عدد من انصار كتيبة البراء بن مالك في شارع النيل الابيض لاستقبال (الناجي مصطفى) وسجلوا فيديوا وهم ملثمين وشايلين سلاح ولافتة تحمل اسم الكتيبة وهددوا اي زول يفكر في التطبيع وبعدها ظهرو في فيديو تاني في نفس اليوم خلف الناجي مصطفى وبرضو شايلين سلاح وملثمين لكن بدون م يرفعوا لافتة باسم الكتيبة ….

◆ اكبر نشاط علني ليهم كان في رمضان الفات (قبل الحرب مباشرة) وقاموا بتأمين كل افطارات الكيزان التي تم الاعلان عنها بما فيها افطار كوبر الذي حمل اسم المخلوع البشير (انتشرت صورهم ويحملون السيخ والملتوف)واشتبكوا هناك مع الثوار واصابوا عدد منهم باصابات خطيرة ….

◆ نفذوا برنامج افطارات خاص بيهم في كل قطاعاتهم الثلاثة وكان يتضمن تدريبات بدنية (لمن عملوا جدول للتدريبات) بالاضافة لي اناشيد جهادية واهمها الافطار الذي كان يحمل اسم كتيبة البراء بن مالك بتاريخ 9 رمضان وتحدث فيه رئيس حزب المؤتمر الوطني المحلول بولاية الخرطوم (انس عمر) وطالبهم بالاستعداد …

◆ حاولو احياء عدد من الكتائب الجهادية الاخرى ويدعموها في انها تجمع ناسا برضو عشان كدا هم اول ناس كانوا حضور ودعموا افطار لكتيبة تانية تابعة للدفاع الشعبي المحلول اسمها (الاستراتيجية) في رمضان الفات قبل الحرب بايام ….

◆ بمجرد م الحرب بدت كتب امير الكتيبة على صفحته بعد مرور ساعتين فقط على الطلقة الاولى (اوامر التسليح صدرت خلاص) وفعلا استلموا سلاح من مخازن الجيش في اول يوم حرب وتشروا فيديو يثبت ذلك على صفحة قوات الاحتياط على الرغم من ان الاستنفار لمقاتلي الاحتياط قد كان بعد اكتر من شهر من مشاركتهم …

◆ نشروا عشرات الفيديوهات التي توضح مشاركتهم في الحرب من اول يوم (الواضح في الفيديوهات ان مستوى تسليحهم كان عالي شديد .. رشاش واسلحة قنص و C5 وR2) وبقولو انهم عندهم هيئة تصنيع وبعدلو مدافع ويسموها باسم شهدائهم كما ظهروا في فيديوهات اخرى وهم يحركون طائرات مسيرة ….

◆ امير الكتيبة كتب على صفحته بعد اعتقال انس عمر من قبل الدعم السريع واعترافاته (نحن فعلا اسقط حمدوك من نسف الاطاري ونفتخر بذلك وخلافنا مع حميدتي عقائدي لانه انحاز لدول الكفر واراد تمكينهم من حكم السودان ولايهمنا ان كان الدعم السريع سودانيين او هنود نحن فقط مع اما ان تكون مسلم او غيره) …
◆ الكتيبة في اطلاق سراح اللواء صادق سيد المتهم بفض الاعتصام وسجلوا معاهو فيديو لحظة اطلاق سراحه … وطبعا قتل من الكتيبة عدد كبير واغلبهم من الشباب منهم الطبيب والمهندس اشهرهم ضابط بهيئة العمليات المحلولة ، اما اول من سقط منهم شهيدا (حسب زعمهم) كان في اول يوم للحرب واغلبهم ماتوا في معارك اليرموك الاحتياطي المركزي المدرعات …

◆ كل اعضاء الكتيبة هم من عضوية مايسمى بالحركة الاسلامية (بعضهم ابناء قيادات من الصف الاول او من ابناء من قتلوا في الجنوب) وكلهم انحازوا لجانب الجيش في الحرب عدا واكد منهم انضم للدعم السريع في الايام الاوائل للحرب واتعرض لهجوم شديد من اخوانه لدرجة اتهامه بخيانة الاسلام لكن امير الكتيبة دافع عنه لاحقا بعد عودته من الدعم السريع ونشر وثيقة عسكرية (امر تحرك) تثبت تحرك هذا الشخص وفقا لاوامر قيادته ….

◆ هم بقولو انهم بعد حل الدفاع الشعبي اتحولو لقوات احتياط مساندة للجيش لكن مافي قوات احتياط تابعة لجيش بتعمل ندوات تستضيف فيها رئيس حزب محلول بالقانون ومافي احتياط بشترك في المعركة قبل ان يتم استدعائه (كل المعلومات اعلاه ومتاحة في السوشل ميديا ولو انت تابعت هاشتاقاتهم ح تلقى اكتر من 100 فيديو عليها لوقو كتيبة البراء وتعرف منها بكل سهولة هم منو وقاعدين وسلاحهم شنو وتفكيرهم كيف (لو كان عندي شبكة كنت نزلتا ليكم اكتر من 70 فيديو ومية صورة واسكرين شوت تدعم كل حرف مذكور في المنشور) .