وثيقة اتهام ضد بص شمبات
الشاعر المرحوم عوض فضيل
زول إسمو حماد ودسعيد..
وطنو الصغير إسمو أمبكول
ميلادو مامعروف متين،،،،
لكن كبار ناس امبكول بيقولو
كان سنة البحر غطي الجروف،،،،
سنة المدير( ميجر صنب)،، زار أمبكول
والعمدة كان عازم العــــُـــمــــــــد
واتعازمو الناس الكبار ضابحين عجل وكمان خروف
أعظم تواريخ فى سجلات المواليد فى الوجود،
نوع العمل ،،، إتوفى قبال عشرة يوم.
فى جيبو كانت بس خمسطاشر قرش وحجاب يكف عين العدا
وثلاثة يوم… زى اللحوم… خاتنو فى التلاجة مجهول الأهل
والرادى بعد الكافنول يعلن عن الجتة ويقول
زول بى شنب وخدودو أفقي مفصدة،،،
فى الجيب خمسطاشر قرش وحجاب عشان عين العدا
ما لسة باقية ام الحسن أختو اللى من اربع سنين ،، لابسالا توب واحد وحيد
تمشيبو للبكى والفرح ،،،تمشيبو للجار والبعيد
والله فى يوم ما اشتكت قالت قدم دايرة ،،،الجديد
وكيف تشتكي،،، وهى العارفة بين حماد وبين دنيا القروش تارا قديم
من زمن أبوهو،،، وجدو،،، والجد الكبير فد لحظة مابتصادقوا
ويصعب على حماد شقا أم الحسن
ويتعب شديد ،،، ينزف نزيف وبرضو القروش مايتلقو
ولما خلاص ضاقت عليهو الدنيا
باع التور واشترى توب جديد لى أم الحسن نعلين جداد ،،، فركة ام صفيح،،،
ماكان ضنين حماد ،،، ولا استغلى التمن
ولما خلاص شد الرحال أداها من باقى القروش عشرين ريال
من خوفو من غدر الزمن
وفى العاصمة … حماد طلع….حماد نزل
حماد عذابا ضاقو،، بيهد الجبال،،،
اسفين كتير مافيش شغل،،، أمشي وتعال ،،،أمشي وتعال
يمشى ويجى ….. ويقولولو بكرة تعال وبعدو
كأنهم يمتحنو فى صبر،،، الرجال
ولما خلاس فضلن خمسطاشر قرش وحجاب عشان عين العدو،،،
الدنيا غنت ،،، وزغردت ،،،قبلوهو فى البوليس نفر،،
وقالولو تستلم الشغل ،،، آخر الشهر
وفى اللحظة ديك والله لو حماد قدر
كان طار عشان يمشي امبكول يدي الخبر
حماد سرح ……
والله يا أم الحسن بعد الشقا الشــفـتـيـهو ياما تسعدى
والله لاتسقى البهم لاتحشى قش …….
للونسة والجيران تقومى … سماحه ساكت تقعدي
شطح الخيال ……
قدامو شاف أم الحسن متدللة ومتبخترة
وسط البنات فى أحلى توب زى العروس
مــتــحنـنة ومتعطرة،،،،
وفى اللحظة دى لاقاهو بص شمبات
حماد طار على الارض،،،، انطرح
والدم بحر سال فى التراب ،،،،من قلب كان يادوبو محتضن الفرح
و الدم كتب ،،،فوق التراب :…
والله يا أم الحسن بعد الشقا الشفتيهو ياما تسعدى
والله لاتسقى البهم،،، لاتحشى قش،،،،
للونسة والجيران تقومى ،،،، و سماحه ساكت تقعدي،
والرادي بعد الكافينول يعلن عن الجتة ويقول
زول بى شنب ،،،وخدودو أفقي مفصدة
فى الجيب خمسطاشر قرش وحجاب عشان عين العدو
و لسة با قية أم الحسن
لليلة باقية أم الحسن ،،،،ولى بكرة باقية أم الحسن ،،،ولى بعدو
أم الحسن دماعا سيل ،،،،خايضابو فى زمن المحن
حميدتى مشى بيت آل المهدى شفشف ليهو برمه شئ معبر ويعكس الواقع بكل تفاصيله
يعني من زمان البرُمة دي في مطبخ بيت المهدي
لكن حميدتي شفشفها فاضية ما فيها حاجة