رندا عطية
يا ناس بس مع قومتي كده من عواسة الحلو مر 🤕 مع قومتي من الصاج النيرانو مشعلله والظاهر في الصورة المرفقة وجنبو البنبر الكنت قاعد فيهو بالساعات فد قعدة والصينية الصغيرة الجنبو فيها علبتين صلصة كبار واحده فيها الزيت – يا حليل الطايوق – والعلبة التانيه بمررها على حواف طرقة الحلومر الفي الصاج لمن تنضج وجنب الصينية حلة فيها موية فيها قرقريبة عصرية 😉 ومعاها خراطة وطبعا لا يخفي عليكم انه الجردل الجنبهن ده جردل عجين الحلو مر جنبو حديدة بوزع وبصلح بيها النار تحت الصاج كما يوجد جنب الصينية البخت فيها طرقات الحلومر كوم حطب فيهو كم ضقلمة ماكنات .. اهه يا ناس مع قومتي من الصاج ابو نيران مبلبلة ده ريحتي حطب حطب مخلوطة بريحة بهارات ودويات الحلومر وعجين الحلو مر المالي يديني وملصق في هدومي وعلى العلي يديني مشعوطات من شيل طرقة الحلو الملهلبه من الصاج عطشانه تعبانه 🤕 مع قومتي كدي بحيل مهدود وعرفتي إنو بكره صيام لقيت روحي بغني بجرسة :
ويا زهرة انا في خطر 😭
يا زهرة رندا في خطر 😁
