بدر الدين محمد
صباح الخير عليك يا وطن
صباح مشتاق لضل نيمه
صباح مشتاق لراكوبة
صباح مشتاق لناس خالي
وناس خالتي وحبوبة
صباح مزيان صباح وضاح
صباح فرحان صباح ايضاح
صباح مسلام حب وسلام
صباح وطناً تقوقي عليهو قمرية
ويخرس كل صوت لسلاح
صباح بيوصف العلات
صباح بيوضح العاهات
الملونا ضلام ولسه بزيدوا في جورهم
صباح بيقول لكل الناس
انه البتشوفوهم مصطفين مع الحرب في التلفاز
انهم قابضين تمن صوتهم
وباعوا بلادهم ولا بهمهم يزورها صباح
صباح الخير عليك يا ام
كيف حال الولاد اليوم
صباح الخير عليك يا جار
وكيف اصبحتي يا بت ام
صباح للكادحين في الارض
صباح للنازحين في الارض
صباح للناس الما دخل ريقها بقة شاي
ولا عارفه من وين وكيف تسوي ملاح
وبقول للرفعوا صوت الحرب
انه الحرب ملعونة
وانه البدعمها خائن
ما فيهو ذرة حب لارض الخير
وانه ضميره مات واتباع
وبقول في صمتي لباكر
يا بلدي صباحك خير
وسلام شامل
اصلوا اللعبة مكشوفة
والخائنين ضمير الارض اتعرفوا
والصامدين بشدوا الحيل
ما رجفوا
ومهما طال ضلام الكيد
اكيد باكر بجيكي صباح وينجرفوا
صباحكم خير
صباحكم نور وسلام شامل
وحكم مدني
لا عسكر يسرقوا قروش
ولا يسوقونا بالباطل
صباح الخير يا بلدي
صباح النور ليوم باكر
