عثمان يس ود السيمت
ما ترونه بل تشاهدونه أيها النازحون والمشردون واللاجئون واليابسون المتيبسون بين الخرابات في الخرتوم التي لم تعد خرتوم جوة وخرتوم برة فقد جاططتها الحرب جوطة عدوك وأصبح قصرها الذي تسمت به يوما (Khartoum Palace) اصبح قصرا عشوائيا تسكنه البوم والزواحف. ما ترونه من مهزلة إعلامية وملهاة بليدة سيئة الإخراج يسمونها حكومة مدنية أو تكنوقراط، اختاروا لها اراجوزا مهمته (اضحاك الناس على نفسه وعلى الحركات التي يقوم بها) لماذا؟ ليشكل حكومته، والناس تأسرهم الملهاة تارة مع وزير دفاع ووزير داخلية وأخرى مع المعز بخيت وقد يأتي دور المعز لدين الله السوداني وسنتداوله ردحا من الزمان. (وهو المطلوب). نعم المطلوب ملهاة (تكسب) بضم التاء وكسر السين ، تكسب حكومة بورتوكيزان الفعلية القائمة التي لم ولن ولا تسقط أبدا حتى لو ارتفع ادرينالين هذا الشعب المسكين بالرغم من عدم توفر (المكونات الغذائية والأولية للأدرينالين) عند 90٪ من الشعب الغلبان إلا أنه (يتأدرن) أي تصيبة لوثة ادرينالينية ربما من الذاكرة أيام كان العشاء في حوش السمك وعند عوضية وأيام كانت الشية يتخيرون لها (الأطايب) وأنا لا اريد أن أعود بكم لزمن مطاعم سانت جيمس والإسكالوب والكوستليتة مفروش لهما جرجير شمبات وتوتي وطورشي ومش الحلب من بحري. وقتها كان الادرينالين لا ينساب بل ينصب صبا فتحمر له الخدود وبعد ساعة تشوف صفرة الخجل على الخدود الناعمة كما رسمها خليل فرح :
صبغ الخدين حمرة بعد ساعة تشوف صفرة
اصفرار ده كتير أخجلوك يا أمير
وللا نمت نهار
لا ما نام نهار لكن الادرانالين كان متوفر
هسي خجلونا خجلة صريناها في طرفنا ووشنا ياهو ذاتو. (غايتو) ؟؟؟؟ بسأل الآن لماذا وكيف وعشان شنو يتأدرن السودانيون. الإجابة بسيطة. هم يتأدرنون هيافة وقلة صنعة ويمكن قلة مواكل. الذين اصطنعوا ملهاة حكومة التكنوقراط (تبع كميل ادريس على قول الشوام) اصطنعوها لكسب الوقت: وذلك حتى:
1. نخرج من مود الهزائم المتلاحقة.
2. ونخرج من خلعة مسيرات بورتسودان.
3. وننسى المتحرك بتاع الابيض ، يا ربي اسمو شنو (شوف أنا ذاتي نسيت وقوقل بكون نسى).
4. لجنة تحقيق فضيحة الحجاج الطلعت الحجاج غلتانين.
5. وننسى نحاس الكهربا القلعوهوا بالنهار ومر من الارتكازات بالنها ومرق من المينا بالنهار.
6. وننسى حاجات من قبيل هيجتني الذكرى.
عليكم الله الحاجات دي ما بتستحق مسلسل كميل ادريس وصحبه والذي لم يبلغ الحلقات (الحارة) بعد لما يدخل ليك فكي جبرين وبقية الممثلين.
يا سادة ماتشاهدونه ليس إلا مسلسل (تركي) حلقاته تسل الروح طولا وعددا وترون مهند يقررررب يحضن فاطمة (وللا اسمها منو) لكن تدخل الموسيقى (التركية) الرتيبة عندما يرتفع لديكم الادرينالين ويدخل (المخرج) بمنظر تاني أو كلاكيت أول وجديد. وتاني مهند يقرررب يبوس نور وتتكرر الموسيقى (التركية) البايخة.
يا جماعة المسلسل ده متكلف شديد واقول ليكم من الآخر كده مهند ما حيحضن ولا حيبوس ريحوا نفسكم. يا جماعة إذا كان ارطغرل (المؤسس) ما باس ولا حضن مهند شنو الراجينوا يحضن ليكم. وأصلو (مهند ادريس) ده ما جايبنوا يحضن ولا يبوس ،( ده ما دورو) يا جماعة ده حيرفع ادرينالينكم وياخد القروش ويمشي.
نصيحتي لكم الشايفنو ده كلو طلس عشان الكلام الحلو ده ما كلام مهند ولا كلام نور ولا غيرها ده (الدوبليير) الأخد قروشو وقاعد في اسطنبول يضحك عليكم. عشان بتفوتوا (المسلسل) الحقيقي وتتفرجوا علي الوهم ده.
حكومة كميل حتتشكل بنهاية الحرب والحرب حتنتهي بتشكيل حكومة كميل وحكومة بورتوكيزان جابت قون بي بساطة ورقصت لي عريسا في اسطنبول ومسك حجباتا (سنة يا فكي جبرين).
الشعب في السودان شعبان و ليس شوال!
شعب الهامش ، هذا متروك لك ان تصفه بما تصفهم به
شعب غير الهامش فهذا شعب بيض و سيظل بيض إلى يوم البعث.
اذن كل الاوليغارشية مع البرهان أولى بما تولى