يا برهان ويا جبريل.. انا كمواطن انت كرئيس بي كل حاجاتو وحركاتو الشايلة من ميزانية دولتي اكتر من 90٪.. ميزانيتي (اللي هي أصلا متهالكة) وده علي حساب الصحة والتعليم وبناء وتأسيس البلد.. شايل النسبة دي كلها وده كمان قبل الحركات (وسجم الرماد) إتفاق جوبا وتكاليفه الباهظة.. أكيد النسبة دي بتكون الجهاز زاتو غلبو يقراها.. لأنو أكيد أكيد تخطت ال100٪ وبقت تجيها حاجات بي جاي وبي جاي وتحت تحت وترضيات وبتاع.
يلا يالسيد الرئيس.. يالسيد الرئيس خلي قواتك.. حتي القوات المعاك وأنا كمواطن خليت كل حاجاتي ومدخراتي وما أملك وانت.. انت فشلت في انك تحمي البلد..وما أملك.. كلو ضاع.. فقد محمد احمد الغلبان كلما يملك وجاء بلاد النزوح والعوز وتوفير وبناء متطلبات العيش من عراقي البيت وعلا الله المرقة مرورا بالحلة وصحن الملاح وكبابي الشاي اللي بينتظروها تفضي عشان الباقين يشربوا شاي.. بدوا الحاجات دي من الزيرو (تعرف يا سعادتك يعني شنو زيرو؟!) أكون كضاب لو قلت من الزيرو.. والله بدوا من تحت الصفر وقالوا بسم الله.. ويوم ورا يوم وشهر فوق شهر والحياة تسير متعسرة خطوة بخطوة لمن شويي بقي عندهم شئ.. وأسع بين مصدق ومكذب (لطول المدة) فتحت الخرطوم وكثير من الناس بدأوا في العودة و.. ياهو.. يحملون أمتعتهم وما يغيهم شر وعنت ورهق البدايات (المن تحت الصفر ديك.. قاتلها الله) أيي والله.. صعبة شديد.
يرفع عفشوا وي ااا ألله يتقاسم بعضهم أجرة دفار وتجي انت توقفن لتزيد رهقهم رهق وعصرة جيوبهم مصرة (تعرف المصير بتشديد الصاء) أكيد تعرفو.. الناس دي إتعصرت وإتمصرت.. تجي انت كدولة وكولاية مالية توقفني في نقطة جباية واحدة وتدفعني اكتر من 300 الف؟
أيي والله
شئ زكاة وشئ ضرائب وشئ ما معروف زاتو شنو.. وكمان
(استغفر الله العظيم) 100 الف ك دعم مجهود حربي؟
معقول؟!
دعم.. وإجباري وقروش قدر دي!؟
الشئ شنو هو؟
القروش دي بيصرفا لينا (سيد جبرين) زي جماعتو الفوق؟
بنلقاها موقعة؟
خليك من ده.. ده عفش متجر؟ ده شغل تجارة؟ دي بضاعة انا ماشي إسترزق فيها؟
ده سرير ندبر بيهو حالنا هناك بدل رقاد الواطا لمن الأمور توضح.. دي مرتبة ودي تربيزة وحلة وصحنين للعدس والفاصوليا البقوا يطبخوها من غير لحم.
مجهود حربي؟
يا سعادتك.. انا بدفع لك من بتين انت ما حاسب؟
انا دعمت الحرب دي بي شنو متخيل؟
كلو ما أملك.. فاهما دي؟
و
تعال هنا.. الشغلة زمان كانت دمغة جريح ولا شهيد ولا شنو ما عارف وكانت نتشة كدة
حاجة خفيفة
تدفعا ولا تحسبا وتبقي مارق.. لكن تشبكني إيصال بالمبلغ ده كلو وكسر رقبة.. لو ما دفعت يلموا فيي ناس الاستخبارات يرجعوني ويململوا ميتيني ويكرهوني اليوم الإتولدت فيهو؟
100 الف؟
بتلعبوا انتوا؟!
و…
ياخي أخير اسكت زاتو..
