عثمان يس ود السيمت
متغدي ملوخية خدرا ولابس طاقية خدرا وقاشط صاروخ سيجارة خدرا مولعة نار
في ذمتكم البسمع كلام كرتميلا وزير البولدزرات والتبخير والتكسير ده بنفعوا شي غير سجارة خدرا.
كرري والمرخيات نكسرا وموية النيل نغليها نبخرا
والخرطوم راس الحية ندمرا
يا جماعة ده محمد كر علينا وزير العدل في حكومة الأمل وللا ده هولاكو التتري ونيرون بتاع روما الفي بالي بتاع غردون
التهديدات دي هسي في نظر القانون الجايي يحرسه وزير العدل تكون شنو يا وزير العدل. لو قلت لي زول (حاكتلك)، تكون ارتكبت جريمة شنو حسب القانون السوداني، وهل هذا التهديد يحتاج لإثبات.
إذا كان ده وزير (العدل) بيهدد بي. كده وزير الدفاع حيهدد بي شنو ووزير الداخلية يهدد بي شنو ومدير جهاز الأمن عيييييك ده حكاية براهو لكن كر علينا ما خله ليهو حاجة.
انتبهوا فحكومة الأمل قادمة:
وزير العدل سمعتوا وشفتوا.
وزير التعليم حاوريكم القراية ام دق يا اولاد ال
وزير الصحة توفيرا للنفقات منعنا استخدام البنج والمخدرات
وزير الزراعة مشروع الجزيرة ندمرا وتركترات كلو نخسرا والحواشات نبورا ويمكن نزرعا عشر والترع كلو نغليها نبخرا
وزير الصناعة سنوقف كل الصناعات لحوجتنا الماسة لإنشاء 6 مصانع اطراف صناعية ومصنع كيماوي وبايولوجي
وزير الاعلام انتظروني شوية بفتش علي يونس
وزير الدفاع والداخلية شفتوا الشغل براكم ما بحدثوكم
وزير أمور خارجة اتخارجوا اتخارجوا اتخارجوا
وزير المواصلات الله لا غزا فيني بركة إن ما خليت ليكم تمن الحمار زي تمن المرسيدس.
وزير الثروة الحيوانية. خليك في الصف يا حيوان منك لوه ولما يجي دورك قول بااااع
وزير الطاقة يطقكم الطقة هناي خلاهو ذكاء صناعي
وزير المعادن دي ماليكم فيها غرد
وزير المالية قريبا سنجلب 40 مليون من ماكينات الحليب الإليكتروني(احسن من البقر) وسنخصص عدد مناسب لمستسفيات الولادة وشنط الدايات. حتى نستغنى عن الدفع الإليكتروني ويكون الحليب من قولة تيت
وزير السياحة السياحة حرام والسباحة برضو. قلت لي
الجماعة تاهوا في الأرض 40 سنة وأكلوا الصمغ. دي سياحة زمان في سياحتي أمانة ما تاكلوا الحمت رمت وتحلوا بالقرض.
وزير الاسكان نسبة لظروف المرحلة وبرامج زملائي الوزراء فسنطرح فورا خطة اسكانية للمقابر وسنخصص لكل اسرة 400 متر مقابر. قصرت معاكم
رئيس الوزراء ماتحمروا لي ساكت هو أن الجبت الناس ديل حمروا للجابوهم وشوفوا لي حلل يا ناس شوفوا لي حلل.
وزير الشئون الدينية نسيتني مالك، أكيد انت قحاتي ما عندك دين. أنا مشروعي في منتهى البساطة أنا بشوف النص المليان من الكباية وبشيلا وبوبكشحا عشان ما تووجعوا راسنا بلجنة مخالفات الحج تاني عيال أم زقدة
قوموا لثورتكم
حرية سلام وعدالة
ولن نقول مدنية بعد اليوم اذ لا خيار غير المدنية
يوم الفاينال بتاع شيلسي وباريس
الله يجيب الفاينال بتاعنا بين مكابي ابرهة وومكابي دقلشة
