سيد محمود الحاج
وداب الحول عليها بتول
كان عباس ماش مشغول
قبض يوميتو يادابو
باقي الطين في ايدو مااتغسّل
كان جيعان ما اتغدّي
حيله إنهدّ ..
من دكّ المونة في الملْطم
كان مبسوط ماشّي براه يتبسّم
رسوم الجامعة خلاص تمّت
يوم يومين ويجي الملبوس
لسه الباقي اسبوعين
كمان مصروفو بتدبّر
مو شتّن بيقطع راس
وعندو هناك باقي حساب
في الحفّير ودك الساس
شاف اللمة في دربو
ناس واقفين وامّة تحوص
وشاف بهناك كم مجروس
قافلة السكة قدّامو
ماسك دربو مالفّ
لا راوغ ولا اتخفّى
حافظ صم دروس والدو
درب العيبة مابقالدو
ولا النَيّة من ناسا
نفسو عديلة من ساسا
اقيف يازول دربك وين !!؟
واحدا ً أحَم وليه دقين
وواحدا ً نيْ مسيخ وعفين
عباس : دربي عديل علي الحلة
الأحم : شغال وين ؟
عباس: طالب بقرا في الجامعة
النّيْ : في الجامعة وكلّك طين
طالب مين يا بابا !!؟
قال عباس في حرقة :
ابوي طيّاني ود طيان
وبيت من طين مو فيلا
بس راضين بي حالنا
تب ما بنشكي من قلّة
شغل المونة قط مو عيب
عيب الزول يكون عالة
وعيب الزول يقيف علّة
فتّش جيبو مالقي بطاقة..
قبيل ختّاها في الطاقة
ساعة ماشّي يتوضأ
عباس سيرتو حميدة من تبّ
غير محمودة مابرضي
لا كاجر لا شتّم ولا سبّ
اركب هناك يازول !!
من ميسو طفّر فوق
ولداً ماعرف عاقة
ضهر الشاحنة كان زي سوق
لقي الكمساري والعتّال
والشائل خدارو معاه ..
يادوب جايّ من السوق
واحدا ً يبكي داقنّو
وواحدا ً دمّو شار مفلوق
وواحدا ً قدرو في سنّو
وواحدا ً شال همومو جبال
وواحدا ً ماشفع جنّو
وواحدا ً لا نضم لا قال
عباس بالو كان مشغول
يتاوق كان يلقالو زول حلة
يوصيه لي اهلو
يقول ليهن وداعة الله
شايل هم ابوه هناك
تجيه صدمة و ينشلّ
جرح بتول فيه مااتّاوي
لسه حولو ماهلّ
قدر ماتاق ماشاف زول
لامِن شلّعو اللمة
وكانت اول مرة لعباس
يمِشْ لي حاجة دون همّة
ود دفع الله ماخلّ
مكان في الجابرة ماكاسو
وكان كاسو نجيع وقهر
لاعباس لقالو اتر
ولا من زول عدل راسو
لاهدّن ولا قيلل ولا لاقَي
ولا من وجعة ماضاقا
شهر بي حالو لافّي يكوس
لامن يوم جاهو وليد
كان فكّوه بي واسطة
قال لاقاهو في المجروس
وكانوا سوي في معسكر
ناسو الفيه مُن عسكر
سماسرة موت مااكتر
عيالهم في بلاد برّة مدسوسين
و عيال الناس صفوف ماشّين
و ما عارفين طريقُن وين !!
ود دفع الله شاف الدنيا زي خاتم
وكل الكون صبح عاتم
كورك هاش بطول حسّو :
هاناس :
عباس ماتخلوه في جهادو
زول مسكين قدر حالو
مولود و الطورية في ايدو
يجابد في لقمة العيش
بحال عباس عليم سيدو
وليد يا اخوانّا كان زي ديش
يجاهد جيهة في فقرو
وجيهة يجاهد البطّال
سلاحو همّتو وصبرو
كتابو في يمينو نصال
عباس يا قوم لحافو الخيش
زولا ً عيشتو في ضراعو
بجيب مصروفو من زندو
زولا ً ساعة ماعندو
جهادو الفيه كان كافي
وهمّو الفيه فاض وافي
مو محتاج جهاد ادغال
من يومو نصيبو كتال !!!
وكان عباس والمتلو
دِرْوة زاحفة في الواجهة
مرق من موتة في الأولي
وسِلِم من ضربة في التانية
الا التالتة ماجلّت
فات عباس من الفانية
جات الطلقة زي صاقعة
وقبل الروح تفوت مارقة
مرق الصرّة من جيبو
زي ماهي ماانحلّت
كان دخريه للجامعة
شالا ادّاها للجنبو
وآخر كلمة قال يابا
شالا الريح مشي يدنْدن
وبقت انشودة في الغابة
ود دفع الله لاكورك ولااتبشّع
لا اتهاير ولا اتّرتع
كان واقف عديل مدفع
وشال برقا ً في القبل يلكع
ود دفع الله مات واقف
وعينيه في السماء تعائن
ضاب طوريتّو في باطو
لامديون ولا دائن
والجلاد هداك راكع
مكبّل ايدو دم عباس
وكاتم نفسو ظلم الناس
ود دفع الله زي الشمس
فضل ساطع
يضوّي ضلمة الديجور
ويدفق في الغياهب نور
ود دفع الله مات واقف
وكل ماحولو فِضِل هاتف :
ود دفع الله حي مامات
ولا عباس روّح فات
بتول بنشوفها في الغيمات
شمِس برّاقة مابتندس
وتارا ً باقي مابينداس
وكل الراحو ريحن جات
عاصفة قوية ياجلاد
لاصرصر ولا ريح عاد
عاصفة عنيدة ياجلاد
30-08-2009
[email protected]
والله ابكيتنا يا جني هذا حال كل الشباب في حكومه الانقاذ المتاعيس زنات رمضان اولاد حاج نور الله يمهل ولايهمل برهان هرب ولدو محمد لي تركيا لحقو الموت هناك بدون ذنب ل محمد غير ابوهو عايز عيال الناس وقود لتحقيق حلم ابوهوعشان محمد يتعلم ويرجع يلقي الوظيفه راجياهو في المطار والارصده متلتله في البنوك مهرها دم الغلابه.كلو هذا من اجل حلم!!!!!!