مهدي يوسف إبراهيم
……
بلد عطشانة و النيلين
يِغازلن في خواصر “ام دُر”
بلد جواها ياما كنوز
و ناسا تَعَابي طافحة المُرّ
غَمَامَا على الأُفُق حَفيان
و تحتو أراضي لابسة الدُر
…….
بلد شرقانة من الخَير
و نيلا عروسُو أرض الغير
بلد أحزانا طارن فوق
و هي البتّاتّي خايفة السير
……
بلد مجروحة و أعماقَا
تطقطِق بي الغبينة حَرِيق
بلد أوسع من الأزمان
منو الدخّل فَضَاها الضِيق؟
……
بلد تاريخا لالا شموس
مِعلّمة لي المَعَاها دروس
بلد كانت رَسَن لي النُور
شنو الخلاها تايهة تكوس؟
……..
بلد مزروبة بي التاريخ
مداين لا بتموت ..لا تشيخ
شنو الستّف نِهارا ضَلَام
و سيّج ليلا موت و صريخ؟
……
وحاتا الفي القلب بتحوم
غدًا تضحك سما “الخرطوم”
و ترقص في السبّاتة “ام در”
و ترجع “توتي” تاني تعوم
……..
غدًا يرحل زمان الزيف
علي حيلا البلد بتقيف
و من شَعر الحبيبة تفوح
فناجين قهوة ضجّن كيف
قصيدة عظيمة..
شكرا استاذ مهدي يوسف