انتظار

مهدي يوسف ابراهيم

…..

متين القاك أنا المشتاق
ضلوعي تضوي بي اللهفة
اضم ايدينك النيلين
و بي خصلاتك اتدفي
وحاتك يا جروف توتي
تغازل طفلة الضفة
اماني الروح قضت ازمان
تتوه من مرفي لي مرفا
و رست في عيونك الحلوت
قدر يا الملكة ما صدفة

….

متين القاك و انسي معاك
تعب عمرا قضيتو سراب
اقالدك زي مسافر عاد
يقالد دارو بعد غياب
متين القاك يا غيمات
شهق ليها الورد ترحاب
متين القاك يا المبعوت
من الاقدار عشاني جواب
و احضنك ناس و نخلة و ناي
و اشمك موج و شمس و غاب
و أحسك حيث لا أحلام
تصل ..لا كلمة يوم تنساب
…….

غدا يا بهجتى الكبرى
ظروفنا تروق و نتلاقى
غدا تحضني عينيكا
و احلق ملء آفاقا
ألون كونا بي شوقي
و تلون عمري اشواقا
و أقول ليك يا مواكب ريد
جموعا تسوقني دفاقة
أنا الفي سكتك درويش
خطاوي فؤادي سباقة
أنا السطرت كتب الشوق
أنا العلمت عشاقا
….
جدة أغسطس 2025
[email protected]