حنين

مهدي يوسف ابراهيم

يا أحلى الناس
الشوق جوّاي زفّة أعراس
….

ليكم في الرّوح نكهة و ألوان
رَعشة و تذكار ، لهفة و تحنان
ليكم في الرّوح شارع مزدان
و أطفال بتشخبط أُولى أساس
……..

جيتكم و الحَي
بين ميّت و حَي
و زقاقكن قلبو الحاني جريح
و الشارع شَاعر حزنو فصيح
و أنا بين الصمت و عزف الريح
لي الشوق جواي نوبة و أجراس
……

جيتكم ما لقيت غير باب مسكين
بي فحم الشوق خطّيت سطرين
من “عاشق موت” لي “ضي العين”
حوشكن حزنَان
و الشَدَر المحني القامة بئن
مصفّر اغضان
لكن ذكراكن في الشريان
بقّت نبراس
….

يا الشلتو الرّوح أجمل تذكار
مقعدكم لسّه ببق أنوار
و البيت لو بقدر
كان بي شوقو وراكن طار
و الشارع كان فَرهد أزهار
يا البيتكن حوشو رموش العين
و زقاقكن فاتح في الأنفاس