الاستاذ هاشم صديق يكتب:تراجيكوميديا…وَرَل صحراوي
( مسطولان يجلسان علي شاطيء النيل غير بعيد .. عن مبني اتحاد الفنانين … أحدهما ينهمك في ءاعداد سيجارة ( حشيش ) بتركيز شديد … والآخر منكب علي مطالعة صحيفة فنية اجتماعية باهتمام شديد … فجأة يرفع صوته وهو لا زال منهمكاً في التركيز علي الصحيفة )
المسطول الأول : ( في فزع ) ورل صحراوي
المسطول الثاني : ( يشهق فزعاً وهو يكاد يهب واقفاً … والسيجارة التي كان يعدها تسقط
من يده ) وين ؟!!
المسطول الأول : بسم الله الرحمن الرحيم … خفت مالك ؟!
المسطول الثاني : ( وهو يتلفت خائفاً ) ما .. ما انت قلت ورل صحراوي .. وين ؟ .. وين
الورل ؟
المسطول الأول : ياخي ده خبر في الجريدة … ورل صحراوي ظهر
المسطول الثاني : ( يجلس وهو يزفر في ارتياح ) ظهر وين ؟!
المسطول الأول : في اتحاد الفنانين
المسطول الثاني : ( ساخراً ) بكون فنان شاب جديد
المسطول الأول : ( ينفجر ضاحكاً ) يقومو يسموهو … ورل الموردة
( يعود لمطالعة الصحيفة … و الآخر يرفع سيجارة الحشيش عن ا|لأرض … ويعود
لمعالجتها )
المسطول الأول : ( يرتفع صوته وهو يطالع الصحيفة ) لاحول ولا قوة الا بالله .. الحكاية
شنو ؟
المسطول الثاني : ( يلتفت اليه ) شنو ؟
المسطول الأول : ثعبان
المسطول الثاني : وييييين ؟
المسطول الأول : قدام اتحاد الفنانين … ظهر قبل اسبوع برضو
المسطول الثاني : يا زووول
المسطول الأول : والله … ظهر في نفس الحته .. الظهر الفيها الورل
المسطول الثاني : يعني حسه أنا لو عايز أحجز فنان من اتحاد الفنانين لي حفلة … أشيل
معاي بندقية خرطوش … ولا أتصل بي حرس الصيد
المسطول الأول : ( ضاحكاً ) زماااان ظهرت ( أَصَله ) برضو في نفس المكان .. طولها
يخوف … قطعت شارع الظلط .. ووقفّت الحركة .. ورفعت راسها فوق
… وفتحت خشمها
المسطول الثاني : ما تقول لي .. رفعت راسها .. وفتحت خشمها … وقعدت تغني ؟!
المسطول الأول : ( ينفجر ضاحكاً ويعود للنظر للصحيفة ) …و… وشوف كمان … قطعوا
الكهربا من ميدان التحرير
المسطول الثاني : ( وهو يشعل سيجارة الحشيش بعد أن عالجها ) في القاهرة ؟!
المسطول الأول : لا .. قدام اتحاد الفنانين .. محل ستات الشاي … سموهو ميدان التحرير
المسطول الثاني : ليه ؟!
المسطول الأول : الفنانين والعازفين العندهم خلاف مع لجنة الاتحاد بجتمعوا هناك …
يتكلموا ويتناقشوا … عشان كده قطعوا النور من العواميد البتلمو تحتها
عشان ما يجتمعوا ويقلبوها
المسطول الثاني : ( سازجاً بعد أن أخذ أنفاساً من سيجارة الحشيش ) الحكومة ؟!
المسطول الأول : ( يتلفت فزعاً ) حكومة شنو يا زول .. يقلبوا … اللجنة .. لجنة الاتحاد
المسطول الثاني : ( وهو يمد له سيجارة الحشيش ) خُد … جبّد .. وشوف لينا باقي الأخبار
الظريفة في الجريدة دي
المسطول الأول : ( بعد أن يأخذ أنفاساً من السيجارة ) ترباس قال لي حمد الريح … أحسن
ليك تخلي رئاسة الاتحاد .. وتعمل ( حمام الوادي يا راحل )
المسطول الثاني : ( ينفجر ضاحكاً ) هو مش برضو قال ليهو قبل كده أعمل حسابك .. أنا
زي البيبسي .. تشربني أهضم ليك… تَخُجني أطلع بي نخزيك ؟!
المسطول الأول : لا … دي قالها لي سيف الجامعة .. والتجاني حاج موسى
المسطول الثاني : برضو صلاح بن البادية … قال لي هاشم صديق … أنا بكتب شعر
أحسن منك
المسطول الأول : لا قال ليهو أنا بمدح أحسن منك
المسطول الثاني : ( باصرار ) لا .. قال ليهو .. بكتب شعر أحسن منك
المسطول الأول : لا … قال ليهو .. أنا بمدح أحسن منك
المسطول الثاني : ( بانفعال ) علي الطلاق قال ليهو أنا بكتب شعر أحسن منك .. و أنا
قريت الكلام ده
المسطول الأول : خلاص .. وكت حلّفت طلاق … وقلت انت قريت الكلام ده … تبقي انت
الصادق ( يمد يده له بسيجارة الحشيش )
المسطول الثاني : ( بعد أن يأخذ أنفاساً من السيجارة ) انت صلاح بن البادية ده .. بلحن…
وبغني .. ويكتب شعر … ويمدح .. ويمثل في السينما بالمايوه .. ويشتم
في الجرايد … ؟!
المسطول الأول : فنان شاااامل
المسطول الثاني : ( بعد لحظات صمت ) قالوا عشمانه العرضه … وكلتوم زقلونا …
اتشاكلن .. وعشمانه قالت لي كلتوم طالعيني الخلا
المسطول الأول : انت الفنانين مالهم .. ؟ يا عيانين … متشاكلين
المسطول الثاني : وغُنا جديد .. مافي أصلو
المسطول الأول : ( يعود للصحيفة ثم كمن يزف خبراً ساراً ) كيف ياخي … في غنا جديد
… شوف ( يشير للصحيفة ) أهو أبوعركي … عندو أغنية جديدة
المسطول الثاني : ( هاشاً وفرحاً ) يا زول
المسطول الأول : والله
المسطول الثاني : اسمها شنو ؟
المسطول الأول : ( وهو ينظر للصحيفة ) يا موت … مالك علي
المسطول الثاني : تقصد … يا قلب … مالك علي
المسطول الأول : لا … هاك أقراها .. منشوره القصيدة كاملة ..
( يقرأ ) يا موت مالك علي
أرهقتني وعذبتني
هديت كياني من الألم
ومن الهموم
ما قادر …
المسطول الثاني : ( يقاطعه ) ياخوي أقيف عليك الله …انت البنقو ده جبناهو من عفريت ..
مما قعدنا .. ورل صحراوي .. وثعبان … و أَصَله … وميدان تحرير
ستات الشاي … وصلاح بن الباديه بالمايوه وفنانين متشاكلين وعيانين ..
ويا موت مالك علي … الحكاية شنو ؟! .. قوماك من الحته دي
المسطول الأول : أقول ليك حاجة ؟! ياللاك نقعد جمب البحر … قصاد قناة النيل الأزرق
المسطول الأول : انت بمناسبة النيل الأزرق .. لو سألتك سؤال زي غلوطيه .. بتجاوبو ..
كان شاطر ؟!
المسطول الثاني : شنو ؟
المسطول الأول : الفرق شنو .. بين النيل الأبيض .. والنيل الأزرق .. يا شاااااطر ؟
المسطول الثاني : بسيطه
المسطول الأول : شنو
المسطول الثاني : النيل الأبيض .. فيهو وَرَل .. وأصله.. وثعبان .. وسمك .. وتماسيح
المسطول الأول : والنيل الأزرق ؟
المسطول الثاني : فيهو ءاسراء .. و .. تسابيح
( ينفجران بالضحك )
12/10/2011
هوامش : 1) قصيدة ( يا موت مالك علي ) ? كلمات أبوعركي البخيت ، وردت في صحيفة
فنون بتاريخ 12/10/2011 ? الصفحة التاسعة
2) طرفة ( الفرق بين النيل الأبيض والنيل الأزرق ) اقتباس من (نكتة ) رائجة .
الصحافة
أدب، إبداع، خيال، جمال غير متناهي، وعي عميق، إلمام كامل بما آلت إليه أحوال الفن في بلادنا.إحترام جم لعقل القارئ و إعطاءه حقه الكامل في تفسير معاني اللوحة و أبعادها.
،،، تراجيكوميديا ،،، لا أعتقد و لو إجتمع كل نقاد الأدب في العالم لتصنيف هذه اللوحة بين ضروب الفن و الأدب بأنهم سيجدون أعمق دلالة من هذا التصنيف (تراجيكوميديا) و الذي يعبِّر عن ثقافة عالية متفردة و راقية جدا و إطلاع كثيف و عميق للكاتب و هو بالفعل هاشم صديق كما عهدناه دائما الشاعر المثقف الفنان الأديب المبدع المرتبط دائما بشحمه و لحمه و حسه و عقله و ضميره و روحه و تاريخه بحياة عامة الناس و بسطائهم ،،،
والله يا استاذ هاشم انا من المعجبين بيك جدا واحبك جدا , بس مشكلتك انك بتشخصن الاشياء , يعنى بالواضح كدة ماممكن فنك كلو فى الفترة الاخيرة تكرسو عشان زعلك من ناس ياخى انساهم وانطلق سيبك منهم واسقينة من رحيق فنك عصير بارد يروى عروقنا الجفت……. خلاااااااااص متنا , وطلعنا من الاتون الدخلتنا فيهو دة.
وينك يا أستاذ وسط العفن والسوس الناخر في كل شي كان جميل وينكم إنتوا يا ناس الزمن السمح الفات وما عارفة كان برجع ولا ما في أمل يا حليل زمن كل شي كان فيه حلو وملتو المساخة والقرف لكن برضو عندنا أمل ربك كبييييييييييييييييييييير وقادر يخلصنا ويرجع بلدنا الطيب زي زمان
ياجماعة الخير …..انا غايتو مافهمت حاجة …والله ما طلعت بى حاجة…غير انشرقت ..وراسى لف….من كثرة الدخاخين وما شابه ذلك…….العندو فهامة يسلفها لنا والله لايضيع اجر من احسن عملا……..
ولله ياستاذ هاشم صديق لولا وجودكم بالسودان لما جئيناه اجازه حتي.وانت يالاقرع النزهي خليك علي كدي لانه مهما شرحنا ليك ماحتفهم ويظهر انك من شلة ال (فنان شاب جديد) والله يكون في عون السودان كل شئ صار مسخأً
أستاذنا هاشم صديق
إنت دايماً رائع
وربنا يحفظك يا أحد ثرواتنا القومية