تنفيذ نظام الاتجاه الواحد بكوبري (النيل الأبيض) و ( الأزرق)
الصحافة: اعلنت شرطة مرور ولاية الخرطوم بانه سيتم العمل بنظام الاتجاه الواحد في ساعات الذروة لكل من جسري النيل الأبيض والنيل الازرق ابتداءً من غد في ايام العمل الرسمية من الاحد وحتى الخميس من كل اسبوع ضمن خطة الادارة الرامية للتعامل مع الكثافة المرورية في وقت الذروة.
وقال مدير شرطة مرور الخرطوم بالانابة العميد شاذلي محمد سعد، للمكتب الصحفي للشرطة، ان برمجة كبري النيل الازرق في اتجاه الخرطوم تبدأ من الساعة السابعة والنصف صباحا وحتى التاسعة صباحا، وفي اتجاه الخرطوم بحري من الثالثة والنصف عصراً حتى الخامسة مساءً ، حيث يترتب على ذلك تحويل مواصلات بحري عبر كبري المك نمر اثناء فترة الاغلاق الصباحية والمسائية.
وتكون برمجة كبري النيل الأبيض في اتجاه الخرطوم من أمدرمان عند الساعة السابعة والنصف صباحاً وحتى الثامنة والنصف صباحاً ، وفي اتجاه أمدرمان من الساعة الثالثة والنصف عصراً وحتى الخامسة مساءً. وتأتي الخطوة بالتنسيق مع وزارة المياه والبنية التحتية وهيئة الطرق والجسور والنقل.
الحمد لله والشكر لله هذه خطوة سليمة وكنت قد اقترحت اقتراح يوم 4 نوفمبر الماضى تعليقا على مقال اصابة ومصرع 18 شخص فى حادث بطريق الحصاحيصا وذكرت عدة اقتراحات لاشكالية شارع مدنى وكذلك عرجت على مشكلة داخليه وهى كوبرى النيل الازرق والمك نمر واشرت لمشكلة الاذدحام ومواعيدها واتمنى لو ان يكون كوبرى النيل الازرق فقط للمواصلات فقط وعداها لكبرى النيل الازرق
والتعليق اسفل
ياناس المرور اقترح ليكم اقتراح اقترح اى عربيه جاية من جهة مدنى للخرطوم تجى بشارع شرق النيل الجديد الرابط مع مدنى يعنى اى بص جاى من كسلا والجهات ديك يجى بالشارع ده واى عربيه طالعه من الخرطوم ماشه جهة مدنى تمشى بشارع سوبا القديم وبالتالى الاتجاه يكون واحد وخففتوا مشكلة التخطى وحكاية المفاجاة بعربية جاى من الاتجاه الاخر وانو السواق غلطان دة تبرير باهت انتو سوو العليكم وامنعوا السواق من نفسوا الامارة وبالتالى نستفيد من الشارع ده .
هذه واحد مشكلة داخلية اخرى كبرى المك نمر وبحرى كبرى بحرى القديم من سنة 1906 يعنى مابتحمل بقة وكارثه وارده طيب ياجماعة الخير طلعوا قرار بانو اى عربية صغيرة اقلة من حافلة وتصنفوا العربات تمر بكبرى المك نمر وماتجى بحق بحرى اجباريا حتى لو ماشه الصناعات وتخلو كبرى بحرى للحافلات الركاب والعربات الاكبر وبالتالى نستفيد من كبرى المك نمر بل زحمة الصباح والساعة 2 المابتنتهى دى لانو اسى قاعد زينة ساكت.
ثالثا وده لناس التخطيط والطرق الملاحظ انو اى طائرة جاى من جهة الشرق جدة وبورسودان الخ بتقاصد شارع الطيار الكدرو او شارع الصناعات وكذالك اى طائرة جايه من جهة الجنوب بتقاصد الشوارع الارضيه الداخلة على جهة المطار طيب ياناس اى هبوط اطرارى فى شوارع ضيقه زى دى كارثه شى اعمدة قريبه للزلط واكشاك مع الشارع الضيق نفسوا طيب ليه ماتصمموا شوارع دى الكدرو الصناعات والشوارع الجايه من جهة الجنوب زى افريقيا بعرض يتوقع هبوط اطرارى وازالة الاعمدة وابعادها واى اكشاك واعلانات على الجانبين يعنى الشارع يكون مهبط اطرارى احتياطى بدل تحصل الكارثه ونجى نندب حظنا ولسه مافات شى ولا عاجبكم الانفس الغاليه البتموت دى اللهم هل بلغت اللهم فاشهد
وهذا مع امنياتى للجميع بوافر الصحة والسلامة
مهندس مساحة و تخطيط
رجعت حليمة لعادتها القديمة
كأننا يا بدر لا رحنا ولاجينا
يبدو انه الانقاذ دايرة ترجع اي شي بعد ذهاب البترول لما قبل تسعة وثمانين
لكن للاسف في حاجات كثيرة ما بترجع
الاخلاق والقيم المدمرة والممزعة
الضغائن والاحقاد القبلية التي اتت بها الانقاذ ولم تكن موجودة
الانحلال الاسري والاخلاقي وهذا يستحيل اصلاحه
وظهور مصطلحات بنات الليل التي لم نكن نعرفها قبل الانقاذ
والبلد الاتقسمت اثنين
انت يا عمر البشير بتتصرف تصرفات كأنك ملكتنا وملكت البلد بأي حق تفصل الجنوب ؟
وبأي حق تتنازل عن حلايب وبأي حق تتنازل عن الفشقة ؟
الله ينتقم منك دنيا واخرة