شمارات .. راجلي و راجلك

شمارات .. راجلي و راجلك
السرة: كل سنة و انتي طيبة يا سعدية يا أختي و العفو و العافية
سعدية: و انتي طيبة و تزوري المصطفى إنشاء الله .. اتفضلي خبيز بمواصفات خاصة
السرة: (بعد أن قضمت جزءا يسيرا منه) إنتي يا سعدية .. السمن قصر ليكي في الخبيز و لاشنو ؟
سعدية: ليه؟ في شنو؟
السرة: يعني الخبيز بتاعك ناشف كدي و ما متماسك .. آه يمكن يكون بسبب البيض الما بلدي
سعدية: إنت براكي عارفة أبو أحمد ما قاعد يقصر .. دايرة أديكي منهم شوية .. ترا الخير راقد
السرة: معليش و الله أنا الخبيز بتاعي عاملاه بمواصفات خاصة جدا و ما بنفع معاه إلا سمن أصلي و بيض بلدي!
سعدية: كدا خلصينا من بيض و سمن .. وين و بتين لمة الشلة تاني يا السرة ما طولنا شوية؟
السرة: بعدين الساعة تمنية في بيت فتحية .. مخصوص خليتو متأخر عشان ما عندها مكيف و خايفين من حر الأيامات دي.
سعدية: ما عندها حوش و نجيلة باردة ..
السرة: نتكلم في الحوش؟ الكلام ما بشيلو الهوا يا اختي و إنتي عارفانا مكتمين شديد .. يلا فوتك بالعافية و نتقابل بعدين و ما تتأخري ..
سعدية مع السلامة و كتر الله خيرك على الزيارة.
في بيت فتحية
فتحية: و الله شرفتونا اليوم .. تشربن شاي و لا قهوة؟
السرة: طبعا قهوة بس إن شاء الله تكوني قالياه تمام و ما يكون زي حقة المرة الفاتت
فتحية لا لا لا .. أنا ما اتعلمت منك خلاص بس كان أسلم و لو مرة… بعدين ما قلتي لي .. الهبابة لزوما شنو يعني؟
السرة: بري و الله ما بقدر بغير مكيف اسبلت .. أنا بشرتي حساسة لأي تغيرات جوية
بتول: ( مغيرة المضوع) ممكن أسألك يا فتحية بدون أي حرج؟
فتحية: اتفضلي .. الله لا جاب الحرج
بتول: صحيح إنتي راجلك ميم واو؟
فتحية: أعوذ بالله إنتي قبل القهوة دي شربتي ليكي حاجة تانية و لا شنو؟
السرة: آها يا فتحية آها .. ده كمان موضوع بتنكر .. ما الدنيا دي كلها عارفاهو ميم واو .. بس الله يهديه
فتحية: و الله إنت تغالطن الواحد في روحو .. كدي جيبن ليكن موضوع بستاهل و خلن الكلام الهايف ده
سعدية: هو ما هايف و لا حاجة .. ناس السرة بقولو راجلك ميم واو و أنا مغالطاهم إنو شين واو
فتحية: و هو بالله في فرق بين مؤتمر وطني و مؤتمر شعبي ما كلهم وجهين لنفس العملة
السرة: آه يا فتحية أنحنا ما اتفقنا إنو نتكلم بالرموز شنو لا زمة فك الشفرات؟
فتحية: أنا راجلي ميم شين .. يعني معارضة يا عوارض الزمن و الله يوريكن في رجالكن العاجنين مع ديل و السايطين مع ديلك
السرة: بتقصدي شنو يعني .. واحدة فيكن بتقدر تتكلم في راجلي .. واحدة عندها شك؟
فتحية: لا شك و لا طق .. بذمتك ما شوّفتينا صورة تكريمو مع نافع على نافع؟
السرة: الزول زميل دراستو .. فيها شنو يعني كان كرموا؟ ما بستاهل يعني؟
سعدية: لكن المناسبة شنو .. مش تحرير أبو كرشولا؟ و راجلك لا في الجيش و لا في الدفاع الشعبي .. لكن زي ما قلتي زميل دراستو!! سنة يا زميل دراستو!!
السرة: يا الجماعة الساعة اتأخرت و أنا لازم أمشي .. آه ودعتكن بالعافية
فتحية: ما تنتظري الشوفير يجيكي بالليموزين .. أصلو شارعنا ده كلو حفر و ما فيهو نور
و تهرول السرة ملوحة بيدها و يكاد يعصف بها الخجل.

شريفة شرف الدين
[email][email protected][/email]