دموع تماسيحنـــا!!
.
ان ياكل التمساح معزة او بقرة واحدة او حتى انسانا بطـــوله وعــرضه فهــــــــذا ليس بالمستغرب فى قانون التتمسح فالقوى ياكل الضعيف او هكـــــذا هو قانون الغاب وقــــطعا لاتقتل هذه المخلوقات من باب الونسة او الترفيه اوالسياحة او زيادة الدخل.
ومن الممكن أن تاكل نوعية من التماسيح البشرية وطنا باكمله وتستبيح ارضه وتعتصر شعبه وتمزقه عرضه فهذه تماسيح من نوع اخر.
التمساح ليس له غدد عرقية فى جلده لافراز العرق من جسمة فكل العرق الذي يفرزه التمساح يخرج من العيون …. فى شكل دموع وكانه يقول : وعينى عليك باردة يالسمحة يالواردة .
وكم تبدوتماسيح النيل بريئة اذا ما قورنت بتماسيحنا المستوطنة ارضنا وهى تبتلـع كل ماحولها وتمزق الانسانية قطعا انها تماسيحنا البشرية مرورا بالانقاذ وانتهاءا بالمؤتمر الوطنى… والى متى؟؟
ابوكرش تمساح ليهو ضل يمشى الهــــوينا الكرش امامه تكاد تزاحــــم مقــــود سيارته الفاخرة الفارهة خرج من مقره الحكومى يكاد لعـــابه يسيل طـــربا بعد ان عقــــــد صفقة تماسيحية لاستلاب كميات ضخمة من المواد الاغاثية التى ارسلت من دول صديقة لتوزع على اهلنا المحتاجين المتضرريين من السيول والامـــطار والخلى عادته قلت سعادته فعبر هذه النوعيات التماسيحية المنشأ الانقاذية الميلاد تجد الاغاثات طريقها بكل بســـــاطة الى الاسواق وان فاتك الميرى ادردق فى ترابو…
ياخذ ابوكرش مجلسه فى المكتب الفاخروخلف طاولة ماليزية باهظة تكور السيد الوزير ابوكرشين فى كرسيه وهو يبادل ابوكرش حديث الرضا والارتياح.
التمساح ابوكرش: الله يجزاك خير يا ابو كرشين سهلت علينا استلام الاغاثة ربنا يكتر م
يكتر لينا من امثالك!
ابوكرشين مبتسما مزهوا : دا واجبنا دايرك تستفيد وتشترى العمارتين الجداد فى شارع التماسيح!!
ابوكرش: انتو الخير والبركة البلد بدونكم ما تسوى شى ما حننساكم من صالح الدعـوات
ابوكرشين : ما تنسى امسح شنب الجماعة الطيبين صغار الحزب خلى الانبساطة جماعية
ومبروك عليك المخطط الاسكانى الجديد مقدما.
ابو كرش: والله خيركم مغرقنا ياسعادة الوزير وربنا يقدرنا نرد ليكم بعض من الجميل
ابوكرشين: انتو سند الحزب يا ابو كرش ابقو عشرة على الحكومة !!
ابوكرش : اطمئن يازعيم ماتوصى حريص وبالمناسبة هدية ولدك منى سيارة جديدة اخر موديل .
ابوكرشين: شكرا وماتنسى طلع من القروش دى شوية صدقات واتبرعـــــات للمنظمات الخيرية بكم مليون كدا لزوم الوجاهة والتغطية الاعلامية.
ابوكرش: كل شىء حسب توجيه سعادتكم انتو فصلوا ونحن نلبس وما تشيل هم.
يخرج ابوكرش من المقر الحكومى يقود الفارهة متجها الى السوق تمهيدا لبيع المزيد من المواد الاغاثية التى استولى عليها قادة الحــزب، يدخل احدى البنايات يلتقى باحـــد التجار المعروفين خريج مدرسة الحـــزب الوطنى سبـــق ان تلــــقى تدريبا عالى المـــستوى فى الانتهازية فى المدارس الانقـــذاية استطاع خلال فترة وجيزة ان يصبح من اكابر الاثرياء
ابوكرش يصافح التاجر الانتهازى بحراره شديدة تفوح منهما روائح المـــصالح المشتركة
واللعب المكشوف.
ابوكرش : البلاع كيــــــف حالك جيتك بالاصناف الفيها الفايدة مواد اغاثية معتبرة وفيها
الفايدة البتبسطك وتدخل ليك منها كم مليار!!
البلاع: وانا جاهز واعتبر القروش فى حسابك اليوم وبالمبلغ الاتفقنا عليهو!
ابوكرش: شوف اليوم تستلم البضاعة وخليها فى المخازن وبعد بومين حنشتريها منك ثانى عن طريق الوزارة التمساحية .
البلاع : لكن الوزارة لازم تشتريها بالسعر الجديد يا ابوكرش!!
ابوكرش: اطمئن الوزارة حتدفع ليك المبلغ البرضيك وزيادة ويمكن يبيعهوا ليك تانى بالسعر الجديد عن طريق منظمة المكرشين !!
البلاع : ايوه كدا الشغل النضيف
ابوكرش: كيف يابلاع الامطار جات بالخير على جيبك ياصاحبى.
البلاع: وجيبك يا ابوكرش ويطول لينا فى عمر حكومتنا ويكبر لينا جيوبا الواسعة
ابوكرش: امين …امين
ابوكرش: بمناسبة الحكومة انا موعود بمنصب وزارة التماسيح الكبيرة فى الفترة الجاية!!
البلاع يرفع يده الى اعلى شاهرا السبابة فى الهواء: الله اكبر الله اكبرالف الف مبروك
ابوكرش ضاحكا: الله يبارك فيك الله اكبر الله اكبر.
والله يا الحبيب ما قصرت فى السياريو طبق الاصل لتماسيحنا التى لا تشبع او تشيخ واسمح لي اضيف شويه فى السيناريو . ابو كرش قال للبلاع انه موعود بالوزاره البلاع الاستغلالى عنده ولده عنده دبلوم اقتصاد وبى الواسطه صعد وتانى بى واسطه عمل ماستر وتانى بى واسطه عمل ديك تورا المهم هو شغال فى وزارة التنميه والمواردالبشريه برضو طبعاً واسطه ابوه . اها البلاع ذكر ابو كرش قاليهو ولدى د/ فلان ما تنساه قالى انساه كيف ده من هى وكيل الوزاره لكن لازم انت تكون وكيله فى زواج بنتى البلاع قاليهو ده انت تشرف اكبر عمه لافه فى البلد دى وطبعاً تم الزواج وتمت كلاً من الوكالتين والشعب وكيله الخلقه