يالمــسـتني العجـلة تدور .. متين بتثـور ؟

بسم الله الرحمن الرحيم

يالمستني العجلة تدور
متين بتثور ؟
يالحيَّرت العقل الباطن
وكل زرات الحس الساكن
وروح الشهداء …
والناس الماتت من حسراتُم
والناس الهجَّت فاتت ..
والجوع الضارب في جواك
والعتمة الغطت فرح السكة
الكانت عامرة بي البسمات
وروح الإلفة الشادة وثاق
ونفير الحلة الخاتي نفاق
وعشم الباكر ..
والخير دفَّاق ..
وصوت أطفال في المطرة إغنوا
وحنين تربال شق الليل مع النسمات
أفراحاً جات ..
أيه مستني ؟!
يالمستني العجلة تدور
ليه ماتثور ؟
الحدبة الفوق حلتنا
فاضت ليل
كبت سيل
غضبانة عليك
دايرة تصحيك
من خدر الغفلة
وجور الحاكم
والمرض العشعش فيك
(والبوش) في الضهرية
وشفق الليل
يقين مصنوع
وحس غشاش
ما بغبى عليك
هل يغبى عليك
(راجمات) الحمى الهدت حيلك
والناموس الساكن فيك ما قام
وطعم الموية الكلو أسقام
وكيلو اللحمة البقى قسَّام
ورطل السكر الفاقد طعمو
وبعض الناس بتشوفو أحلام
يالمستني العجلة تدور
حرِّك يا زول
دافع بشعور
عنك وعن أحوال أعياها الهم
وغشاها الغم
وسقاها الدم
حرك للعجلة تدور
وكون الزمن الجاي إقول
وكون الحس البهتف بالطول
وكون الحركة الفيها يقينك
ومعاها خلاصك
من عثرات الدعم السادر
ومن جشع السوق الفاجر
ومن جور الحاكم الغادر
ومن حاجات .. ومن حاجات
معروفة لديك ..
حرِّك ..
العجلة معاك يقين بتدور
حرِّك .. وما تستنى العجلة تدور …
حرِّك يا زول …
واصنع أيامك ..
عروة علي موسى ،،،

[email][email protected][/email]