قبلكم كنا شعب سمين

قبلكم كنا شعب سمين

قبلكم كنا بنعرف
القراصه والمفروكه والكسره
كنا بنعرف اللقمه
وعصيدة العيش
والدامشيق
وكنا بنشرب الحلو مر
ونتباها
بأنو صباحنا نبداهو
وفكة ريقنا يالقيمات
ويا شاياً تخين قنانتو داخله الحله
فى كل بيت…
قبلكم كنا بنعرف الضانى
وربع الكيلو يكفى اليوم
كنا بنعرف العجالى
ونص الكيلو منو الحله والشرموط
كنا بنعرف الويكه
والخدره
وكنا بنعرف الباميه
وملاح سبروق
وكان الفول وزيت السمسم الأصلى
فتيل بيبسى وميرندا
وونسه اصيله فى الكوره
وهلال مريخ
قبلكم كنا شعب سمين ومتريق
بدون هوت دوق
بدون بيتزا
وبدون كيزان
كنا بلد
بمش قدام ومابرجع
قبلكم كنا مرتاحين
ومابنتمنى زى أشكالكم
المغشوشه تملا الواجهه
بى دقينات
موجهه للكذب والغش
بى تكبير وبى تهليل
فقط للدنيا ما لله
منو القال ليكم السودان
بلد هوت دوق؟
منو العلمنا أكل البيتزا
غير طمع الصوص فى الأرض!
منو الباع البلد من أصلو
فرط فيها يا……..ت

شكراً
ولنا عوده
كربكان
أكتوبر 2013

[email][email protected][/email]