بسبب نزاع مع مضيفة طيران الخطوط القطرية ..اعتقال سوداني بمطار الدوحة وتغريمه«500» ريال
اتصل بصحيفة «الوطن» المواطن إبراهيم أحمد الحاج مناع من دبي سارداً حادثة تعرض لها وقال حسب روايته : كنت في رحلة عمل بدار السلام وحجزت على متن الخطوط القطرية متجها إلي دبي وبعد الإقلاع بدأت الضيافة الجوية وعن طريق الخطأ سكبت المضيفة الشاي والبيبسي على ملابسي وكنت أتوقع منها الاعتذار ومساعدتي في إزالة الضرر ولكنها رفضت بحجة أن رجلي كانت ممدودة على الممر وأنني تسببت في انسكاب الشاي والببسي، فطلبت حضور رئيسة المضيفات وتحدثت معها فطلبت من المضيفة الاعتذار لي وللمرة الثانية رفضت المضيفة ذلك.
بعد وصولي مطار الدوحة ومن وسط الركاب دخل أربعة من أمن القطرية ومعهم المشرف وسحبوا جواز سفري وحملوني ورموا بي في بص كبير وتم تحويلي إلى أمن المطار «الشرطة» . وتم التحقيق معي ومع المضيفة ورئيستها ثم تم تحويلي إلى أمن العاصمة بالدوحة وتم إبقائي فيه لأكثر من سبع ساعات مع المضيفة ورئيستها واللتين تم إطلاق سراحهما وبقيت أنا في سجن أمن العاصمة القطرية الدوحة.
وتم تجريدي من أمتعتي الشخصية التي تحتوي على أدوية وعلاجات للسكري والضغط وبقيت على هذه الحالة لمدة ثلاثة أيام. وفي اليوم الثاني قدمت لمحاكمة بواسطة وكيل للنيابة الذي قال لي إنني مذنب وأنني تلفظت بألفاظ نابية وغرمني مبلغ 500 ريال قطري وأرجعوني للسجن مرة أخرى . وفي اليوم الثالث تم ترحيلي إلى مطار الدوحة وأخبروني بأن مدير أمن القطرية أنهى تذكرتي « ألغاها». وفي المطار تعرضت لأزمة صحية وإزاء ذلك تم تحويلي إلى مستشفى المطار وسأل الطبيب الجهات الأمنية بالقطرية عن سبب عدم إعطائي الدواء – واسم الطبيب الدكتور بدر سوري الجنسية – ولقد أعطاني تقريراً عن حالتي الصحية بعد أن اسعفني وأعطاني علاجات للسكري والضغط. وفتحت البلاغ بالرقم 58/12 لعام 2012م أمن العاصمة الدوحة .
الوطن
الحمد الله دا ما كان في الخطوط المصرية ولا المضيفة كانت مصرية – كان سمعنا مليون شتيمة وبكاء ونواح علي حلايب واكلوا اللحمة ومش عارف اية
ارحمنا يارب –
السبب كله لانك واحد زول من بلاد السودان وهده هى نظرة العربان :crazy: :crazy: :crazy: :crazy: :crazy: :crazy: :crazy: :crazy: :crazy: :crazy: :crazy: اعانك الله!
وين ناس الجبايات اقصد السفارات اصلها سفارتنا من اميت السفارات فى العالم نزلت قيمة السودانى وخلتى لايسوى شى ودى شى الله بسالكم منو يوم القيامه مافلاحتكم لسندات القبض والجبايات الله اخلص لينا حقنا فى كل مسؤل قصر فى واجبو تجاه اهل السودان بقولن حبوباتنا الشكيه للبيد القويه
والله معليش لكن بعض السودانين عندهم تصرفات غير محمودة وأكيد صاحبنا بكون جالس جلسه غير صحيحة أضف إلى ذلك روحه بتكون محرقاه .
اول شي الف سلامه لكن كلامك فيه تناقض انا مقيم في قطر منذ زمن طويل المعروف هنا تقدم للمحاكمه عن طريق المحكمه و بحضور ممثل النيابه لان البلاغ مفتوح من قبل موظفه الخطوط القطرية فالذي اصدر الحكم هو القاضي و ليس وكيل النيابه و دا طبعا بعد سماع الشهود . بالنسبة للسبعه ساعات كان يجب عليك مخاطبة السفاره السودانية علشان تضمنك و يطلق صراحك و تاتي للمحكمة في اليوم التالي و هي اطلق صراحها لانها هي المشتكية و محل اقامتها بالدوحة و يسهل الوصول عليها في اي وقت و انت اقامتك حسب ماذكرت في دبي
والله يا واحد مصري ضحكتني من قلبي
والله أصبحنا شعب أبسط ما يقال عنه شعب ذبالة
ما عندنا شئ غير البكاء واللطم زي الحريم
ومحل ما تمشي ما تشوف إلا السودانيين بنضربو وبتهانو وبتشتمو
والسبب واضح اتعالينا واترفعنا على بعض وناس شايفين نفسهم أحسن من ناس اشان كده
ربنا زلانا وسط الخلق
تبالغ يابراهيم الحاج داير تشتكى ناس قطر -ده البشير شخصيا بيجى يجضمك ويقول ليك انت كراعك الطويله ده تانى حاتقصها ليك كان ما لميتها عليك -وبعدين كمان تصر على انها تعتذر ليك ده ماياهو الالفاظ النابيه ذاتها عيب يا براهيم شرطه عينا مالقيت الا قطر ده حتى فى السجن كانوا بيجيبوا ليك دياى -جداديعنى –
صدقوني بيكون مشتح رجلينوووووووووووووووووووووووووووو وشايف نفسو وبيكون اتلفظ
والله رخصوا بينا ناس الحكمونا والمعارضة……….. مفاوضات الدوحة .. مفاوضات الدوحة….. بطولة عربية….. وذيل العرب…… وقعاد في الفنادق لعدة شهور ومهازل مهازل مهازل……. ربنا يأخدكم في ستين داهية وإنت يا إبراهيم الحاج وكل المواطنين الغلابة الله يعينا……..
أخى ابراهيم أحمد الحاج …طالما أنت من السودان وتنتمى الى هذه الدولة البهية ذات الرسالة الحضارية وتحمل جواز سفر بصورة صقر الجديان الغلبان فأرجوك أن تتوقع أسوأ شىء ممكن أن يحدث لك ـ …وأحنى ياأخى رأسك دائما عند مثولك فى المطارات العالمية وأنسى تماما حكاية الكرامة والشهامة السودانية …ووطنى وبلادى وماالى ذلك فأنت ياأخى ومنذ مجىء الانقاذ ذليل حقير ومهان…….ونصيحتى لك الصبر ثم الصبر والحكاية قربت خلاص وحافظ على صحتك حتى تتمكن من الاحتفال معنا قريبا باذن الله بزوال هذا الكابوس
الى واحد مصري
شغل النواح والمليون شتيمه اتعلمناه منكم .نحن اقرب ناس ليكم وكن دولة وحده في يوم من الايام . لكن لحد الان مافهمتوا الشعب السوداني ولابتعرفوه ز هل السوداني بيلقى نفس المعاملة الي بيلقاه المصري في السودان طبعا لا ز مع انه السعودي او الخليجي بيعاملوكم زي الزفت في بلدهم بعد ده كله لمن يمشوا مصر بتشيلوهم من الارض
والله حقيقة لله ما عندك موضوع دة كلام يتقال وتتصل انت انسان مريض بالسكري
والضغط ومسافر والمضيفة اخطات كبت فيك شاي ولا قهوة شي عادي خلاص
خليك احسن منها وكون رجلا حنتل مان وقوم نظف نفسك موضوع لا يستاهل
كل هذة الهيلمة وادخلت نفسك في امور ليس لها داعي سجن وتحقيق وتاخير
وكلام لا يقدم ولا يؤخر الانسان يعرف متي يمسك الغضب الانسان لازم يكون
صبور وحليم يحل المشاكل باسها الطرق ولكن الظاهر انك انسان مفتري بجد
وكنت جالس جلسة غير صحيحة وهذا هو السبب كل هولاء الناس يركبون
الطايرات وانت معلق بين السماء والارض لازم ولا بد ان تكون رجل حكيم
شو يعني يعتزروا ليك لو اعتزروا ليك ماذا تكسب امر عادي واكثر من عادي
بس الاسف الشديد كثير من السودانين رافعين رؤسهم وكانهم يملكون العالم
اها هذة البهدلة ما كانت تحصل لك لو تعاملت بالحكمة وفي النهاية تستاهل
ما حصل لك لانك انسان متكبر ( قال يعتذروا لي ) اعتزارك لا يفيدك والعملتة
كان بايدك …..
واحده من مشكلات الاعلام الاصرار على وجهة نظر واحده وعدم الرغبة في سماع اي وجهة نظر اخرى وعدم مشاهدة الصورة الا من منظار واحد. الان نحن نقرأ وجهة نظر واحدة دون معرفة وجهة النظر الثانية, ده خبر ليس له معنى غير الاستفادة السياسية. لو ضم الخبر افادة اتصال بالخطوط القطرية للتوضيح او صورة من التقرير الطبي المشار اليه , لاصبح الخبر اكثر مصداقية. انا لا اشكك في راوي الخبر لكن لابد للاعلام من موقف محايد مهني ليتصف بالمصداقية
ليست هذه الحادثة الاولي التي يهان فيها سوداني في المطارات العربية و قطعا لن تكون الاخيرة ما لم نتخذ نحن المواطنين العاديين اجراءات تردع كل من يسلك هذا السلوك من العربان, و الردع الذي يجب ان يتم يكون بعدة وسائل مثل:
نشر مثل هذه التجاوزات علي اوسع نطاق علي الصحف الورقية و الاسفيرية.
يجب ان نعامل كل رعايا العربان المتواجدين هنا في السودان بنفس الكيفية
يعزل اجتماعيا اي سوداني يقبل او يتغاضي عن مثل هذه الاهانات
يجب تناول مثل هذه القضايا بشكل مكثف و متكرر (كما يفعل ناس واحد مصري او ناس اولاد بمبة) بصوت عالي و في كل المحافل المتاحة لعل حكومتنا المنبرشة تستحي علي دمها و تثور لكرامة مواطنيها.
يا اخوان: لن تنتهي هذه الممارسات ضدنا الا اذا صنا نحن كرامتنا بايدينا
لازم نسمع كل الاطراف لانه دي سمعة طيران…….بعدين نحنا بنقعد كيف…..حدث ولاحرج الوزير لما يجيبوه في التلفزيون في لقاء مع رئيسه اووفود اجنبيه تلقى الكل شادي قامته الا السودانييين والله قلبي في ايدي انه مايتزحلق ويفضحنا…….نحنا قاعد نسافر كتير وفي اغلب خطوط الطيران المضيفات بكونو تحت ضغط كبير دا داير شاي ودا مويه….ودا ….الخ وممكن يتعاملوا بضيق صدر في بعض الاحيان لكن لوصدق القلتوا…..لازم نقيف يد واحده ونسترد كرامتنا لانو انتو عارفين ماااااااعندنا وجيع……..حادثه مضحكه مبكيه لما نسافر السودان بنشيل الجوازين السوداني عشان لاتاشيره لادخول اجانب والاوربي للطواري يعني لوشافو السوداني وعندك مشكله بقولو ليك غور كدا ولاكدا لكن الاوربي………………………………………..:rolleyes:
والله ياود الحاج المضيفات البيعملو فى القطرية قاطعات جد وشكلك كدى جريت فيها نورطويل وهى قطعتو معاك ناشف وبعدين حصل الحصل ولارايكم شنو؟؟؟؟؟:D
يا زول والله حمد الله علي السلامه لكن القطريين دييل بقوا نا س مفتريين قبل كم يوم داقيين السفير الروسي في مطار الدوحه .انت قول الحمد لله ما رموك في البلديه .
السلام عليكم…
انا مقتنع يا جماعة أنو الانسان ما لازم ياخد كلام الجرايد على أنو هو الحقيقة المطلقة خصوصا لمن تجيب كلام طرف واحد من أي نزاع…
بالنسبة لحالة أخونا إبراهيم أحمد الحاج….
أنا متأكد أنو في جزء من القصة و الحكاية مبتور لأنو مستحيل مستحيل يبلغو عنو الأمن بسبب أنو طالب المضيفة بالإعتذار… , ومحتمل أنو يكون هو اعتدى عليها لفظيا بالفاظ نابية (و يكون ساقو مشرفة الضيافة كشاهدة) و ممكن يكون اهتاج فيها أو اهانابأي طريقة كانت
أرجو عدم اطلاق الاحكام جزافا بدون معرفة كل أطراف القصة و بالنسبة لحكاية أنو عشان هو سوداني ده حصل ليهو ما اعتقد انو هو ده اأصل القضية…
و اتكلم بصراحة يا جماعة في سودانيين كتير بفتقدو لأصول اللياقة لمن يتعاملو مع مضيفي الطيران و بتعامل معاهو كأنو شغال عندو في بيتو.. و ناس القطرية بالذات معروفين بأنهم بحترمو عملاؤهم بشدة لكن ما ممكن طبعا يتقبلو انك تهينم او تسيئ ليهم
يا جماعة ما فيكم واحد محامي نجيض كده يمسك القضية دي ينجض لينا القطريين ديل
علشان يفش غلنا في العرب العواليق ديل. وبعدين دي قضية كان حصلت مثلا في
امريكا، وفيها ضغط وسكري ، ممكن تكون بالملايين فالمحامي يستفيد والمسكين دا
برضو يستفيد .
يا جماعة الخير الناس ديل بيعتمدوا على :
اولا إحنا ما بنتابع الحكايات دي و"حنكسل" وآخرتها تبقى عفا الله عما سلف
تانيا القضية دي قضية طيران وبتدخل فيها المنظمات العالمية للطيران وممكن القطرية
دي يسففوها التراب .
انا متفائل ومتأكد بمجرد ما تظهر الجدية في قضية زي دي بكرة القطرية حتبدأ في
التنازلات وبقروش هبطرش (بس بعدين ما تنسوا العبد لله).
يا ابني كل فوله ليها كيالة مش كفاية قدموا ليك مشروب وزمان اليمني غنى في البيقول بلدنا جعان اداك صورة مقلوبة وكمل !!!!!!!
معقولة !!!!
المضيفات كل الوقت مبتسمات !!!
اخونا دا بكون طفشان من الرئس حمد
عايز ينفشة في المسكينة دي
معقولة بس بيسي و شاي؟؟؟ده بدل شاي بي لبن ولا شنو ولا السفرية دي كان نظامها خاص؟الزول دا كضاااااااااااااااااااااااب
اللي ما شاف تعامل الخليجيين مع الاجانب مفروض ما يتكلم
والله الناس ديل بيحترموا الاجنبي احترام شديد
و بعديد دول الخليج دي دول سياحية و لازم يحترموا السياح
بدليل اي دولة من دول الخليج بتحصل فيها ال 195 جنسية
و انا لي 9 سنين بسافر سواء بي الامارتية او الخليجية
و ما حسيت انو في تمييز في التعامل مع الركاب
العكس دايما بضع علامة استفهام كبيرة علي المضيفات
كيف علي الدوام محافظات علي الابتسامة بالرغم من تعب السفر و ارهاقه
و ما فيش لزوم للتعليقات المسيئه ( متل العرب العواليق ديل )
;)
شكلك كضااااااااااااب.. لانو في الطيارة بوزعوا المشروبات البارده براها زي البيبسي و المشروبات الحاره براها.. الشاي و القهوه !!!…ياخي عيب عليك كبييييير كدا و تكضب!!!!!(؟) فضحتنا
يا جماعة في الطيارات بقدموا الببسي براهو وبعدين الشاي او القهوة براهم لكن ما سمعنا انه بقدموا الببسى مع الشاي مع بعض حتى يندفقن على اخونا
تلقاها شافت عمتك المقنطرة واتخلعت منك لحدي كشحت الضيافة عليك….
انا عارف قطامة وقرضمة السودانيين المسافريين انت قايلو بص شندي ولا شنو … يا اخي الجاتك في جلابيتك سامحتك
الزول دي كضاااااااااااااااااب
برضو كنا عاوزين نعرف ما هى جنسية هذه المضيفة؟
دي ماحاجة غريبة اذا المواطن السوداني اصبح مهان من قبل حكومته….فليس غريبا ان تجئ مضيفة هلفوتة تافهة كهذه مضيفة طيران كرور ماعندها اخلاق وطبعا انا متاكد مية بالمية انها حتكون حلبية لبنانية….الحلب ديل الا يدقوا بالجزم
اجمل تعليق
تبالغ يابراهيم الحاج داير تشتكى ناس قطر -ده البشير شخصيا بيجى يجضمك ويقول ليك انت كراعك الطويله ده تانى حاتقصها ليك كان ما لميتها عليك -وبعدين كمان تصر على انها تعتذر ليك ده ماياهو الالفاظ النابيه ذاتها عيب يا براهيم شرطه عينا مالقيت الا قطر ده حتى فى السجن كانوا بيجيبوا ليك دياى -جداد يعنى
الله يجازيك يا بخيت العفريت
هههههههههههههههههههه
صاحبنا فاكرها السودانية ولا شنو …
لمعلوماتك مضيفات الطيران من أحسن الناس تعامل مع الزبئن وخاصة الطيران الخليجي لكن شكلك كده واحد كضااااااب
كل سنة بنسافر بالخطوط جميعها وما شفنا حاجة وحشة ..
طبعا ياخوى انت كنت قاعد قعدة سودانى متعجرف فى الفارغه و يا دنيا ما فيكى الا انا لكن يا اخوى المضيفات ديل بنات سمحات بنقوهم نقاوه من الاف البنات لو عاينت للواحده ساكت ضغطك وسكريك دول بروحن منك بدون حبوب ونصيحتى ليك ما تتطاول على البنات الحلوات
يا اخوى قول الحمد لله انك ركبت القطريه وسجنوك 7 ساعات انت لو ركبت السودانيه وحصل ليك الموقف ده كان واحد من اثنين
1 -احتمال الطائره تقع وبعد داك الطائره تحرق وانت تموت وتكون قضيتك انتهت
2 -احتمال يودوك لناس الامن ويدخلوك بيت الاشباح وتكون مسجون الى قيام الثوره
فيا اخ احسن ليك الطائره القطريه وله السودانيه
السودانيين ماعندهم اخلاق دايما اقل شي بس دايرين يشاكلوا(؟) (؟)
Believe me Ihad the same accident in KLM but the hostess was very nice she apologizes and offered me tissues papers ..
كله ولا اصدق قصتك دي قول الحقيقة كامله انا وسط هؤلاء القوم قرابة العشر اعوام مافي تعامل زي ده والسوداني له مكانه خاصة لازم تكون اطلقت للسانك العنان والمضيفات اكثر الفئات ادبا وخوفا على وظائفهن
:eek: :eek:
سجمكم وسجم الوطن والشعب الراجي منكم رجاء—-
ده تعاليق ده وينه الحميه السودانيه –الاصيله–باختصار العرب او الخلجيين ما بيحترموا السودانيين
–ومما ذاد الطين بلا لانو حكومتنا ورئيسنا ما عندو هيبه يعني دولتنا فاشله وشعبنا بالطبع حيكون مستضعف—
يعني نحن بقينا شعب مامحترم بعمايلنا الغريبه يارجال نحن فتنا المصريين حقنا دايما رايح بس لانك زول من بلد بيحكموا واحد اسموا البشير—
يا وهم البتعلقوا بسخريه اشك في انكم عندكم حميه طلعتو الزول كضاب !!!!!!!
فعلا من اعملكم يولى عليكم—-حسبنا الله ونعم الوكيل على البلد الراح!!!!!!!!
الزول دا شكلو كان راكب سودانير ما القطرية;)
انتو كلكم غلط في غلط ) موضوع زي دا تتناقشو فيه يومين نحن مانتناقش في المشكل الكبيرة الحاصلة اسي مثل ارتغاع الاسعار ………الخ
فعلا انت بتكون مادى رجليك مترين فى الممر تستاهل
على المواطن أن يتصل بالمنظمات الحقوقية ويتظلم لها حتي يرد حقه بواسطة القانون مثلا هناك في قناة الجزيرة قسم للحقوق والحريات يمكن الاتصال به لأن في ذلك إنتهاك لحقوقه واساءة لجوازه السوداني .
من هنا اناشد الحكومة السودانية حتي تحمي حقوق مواطنيها بالاسراع للإنضمام للإتفاقية الدولية للعمال المهاجرين والتي تحفظ للمواطن حقه في التجول خارج أرض الوطن ، حقه في كرامته وفي حريته وسلامته .