طلعت حرامى يا خالى..!!

منو الغلطان..؟
كلامكم صاح أنا الغلطان..
ضِحكتوا معاى..
ضِحكتوا علىّ..رَميتوا اللوم عليّا براي..
نسيتوا زمان..؟
نسيت يا خال وصيتك لى..؟
ما تَبقالنا زى ولد الحِويج أحمد..عديم الراى..
جاتوا وظيفة لى عندو..
عامل فيها خايف الله..زول صلاى..
ما بِياكُل حقُوق الناس..
تحت يدو القروش كانت..
فات خلاها لغيروا..
هداك الليلة قاعد ساى..
رخيت ليك الإضان يا خال..
كتير وصيت..
ما قصرت فيك حاشا..
بقيت شابكنى شِن سويت ..
حِساب فى البنك ..بنيت البيت..
مشيت حَجيت..
جايز خالى إنت نِسيت..
عارفك إنت زول نَسّاى..
نِسيت الخلوة والجامع..
كُنت إمامكم الراتب..
ساعة الحلقة كُنت الشيخ ..
أنا التلاى..
يوم الجُمعة فى المِنبَر أنا الطالع..
منو الغيرى منو السوّاى ..؟
انا الشغلت كم عاطل..
ردمت شوارع الحلة..
للصرمان والمديون منو الدافع..؟
شُوف فى الحلة كم شافِع..
أنا العرست لى أُمو أنا السمّاى..
طلعت حرامى يا خالى..!!
شان سفسفت حبة مال..
نسيتو الفات .. كلامكُم يا قريبى معاى..؟
وصيتك لى ..
ما تبقالنا زى زولك عديم الراى..
خُش أسّفح..
معاهم أمشى اتلحّلح..
كسِر يا وليد تلجك .. فيهم ديمة إتمسّح..
كلامكم صاح أنا الغلطان..
فارقت الطريق الصح..

بلا أقنعة..
صحيفة الجريدة..

الردود