راعى الأمانة..على
يسلم أصلك..
يا على..
تسلم أمك الوالداك..
جاد الرب على ..
أبوك..القبـيل سمــاك..
على..باب العلم..
بالمال الحلال ربـاك..
ساعة الوداع ..
قبال تفـوت وصــاك..
كيف تحـفظ حقـوق الغـير..
كيف تسلك دروب الخـير..
لا تتبع الشيطان..
ما تسمــع كـــلام إنســان..
مهما اداك ..
ياولدى..بالمال الحرام أغــراك..
تخون غيرك..
تخالف شِرعة الخالق..
كنت براك..
يوم سألوك..
عن نعجة..
ما اتساهلت..
ما اتـرددت..
حارس نعيجــاتك..
مبسوط بى قريشاتك..
مرتاح الضمير..شاكر..
منو الشايفك..قلت الله..
منو العارفك..برضوا الله..
كانت اجاباتك..
كافية ما اتعتعت..
هم اغروك..
ما اتهاونت..
شايفين هديماتك..
ما عارفين شنو الجواك..
ما عارفين قناعاتك..
طاعـة ربـى..
هى الجـواك..
خوفك من السواك..
رضيان بالقسموا ليك الرب..
طمعان فى فضل مولاك..
سبحانك ربى..
لا ينسانا لا ينساك..
جاتك تسعى دنيانا..
سيدى الكريم أغناك..
بالمال الحلال..
شان برضك تربى جناك..
زى ما..
جاد الرب على..
أبوك يا على الرباك..
تسلم لينا..
يا راعى الأمانة على..
تسلم بلدى يا على الجايباك..
شكرآ على هذه الكلمات ويستحق اكثر ارفع راسك انت سودانى ,ارفع راسك انت اميت
جزاك الله خير والله يستاهل المديح جاد الرب علي ابو ضمير مرتاح
صح لسانك .. شعر مؤثر بالجد .. اللهم احفظ هذا الانسان البسيط الذي مثلنا خير تمثيل .. وربنا يهدي مسئولينا ويسلكوا طريق ذالك الراعي البسيط
الانحطاط الاخلاقي وفقط هو الذي جعل من صورك يجروء علي مفاتحتك أصلا في موضوع الحرام
اولا ان الشخص ليس علي جاد الرب بل هو الطيب يوسف الزين احمد وهو من شرق سنار وموجود الان بالسعودية وعملت صحيفة تبوك الحدث معه لقاء يوم الخميس 13/4/1435 يعني قبل يومين وماتداول في قناة الشروق كذب وخداع للحقيقة واوكد انه الطيب يوسف الزين احمد من شرق سنار والصحيفة عملت معه لقاء ومصور على اليوتيوب