ما يغشوكا بي وثبة
ما يغشوكا بي وثبة
كلمات: حسين شنقراي
دلاها وكمان أشتر
والعجب وكت
ترقص و تتبختر
تشيل احقاد وتتنبر
قايل رويحتك أشطر
علينا وبس بتتشطر
بيك ضاع الوطن
والليلة إتختر
سالت دماهو
وقطًر
تعال نفتح
معاك الدفتر
حتطلع في
النهايه الأخسر
—————
باكر براكين
الشعب تتفجر
وفجر الثورة لو أمطر
طرورك ياما إتطرطر
وتصبح عساكرك منظر
ما تلاقي البيهو تدثر
والكانت معاكا
قلوبا تتحجر
وفي عينيكا
تبفي الدنيا
هي الأصغر
و للدولية تتجرجر
ويظل الوطن شامخ
وفي حدق العيون أكبر
————
أسمع كلامي الليلة
وباكر ليهو إتذكر
ما بدوم الكرسي
ماتقعد فيهو تتحكر
باكر خشيمك بملح
بعد ما ضقت
طعم السكر
الشعب ضاقت بيهو
وصبحت روحو تتكركر
وإنت في ظلامك غايب
تعبي ومن نشوة
خمورك تسكر
لا بتصحي من غفوة
لا فيك عقل فكر
ما يغشوكا بي وثبة
ياما بي وثبة تتكسر
————–
فوت خلينا إتحرك
ما فيش زول
في الحكم عمًر
أمشي إنت وبس
ولا الباقي يتدمر
والشعب عب
ولي سواعد الثورة
قد شمر
—————
عربة حكم عطلانة
قادة المكنة
كاسرة الشمبر
فتح عيونك ديل
وشوف الشعب يزمر
ما تغرك
قصور وطبول
وبلاطك المرمر
راح صدام
وراح قذافي
راحو الأكبر
راح الزين
وراح بن صالح
ومبارك في
الطوة بتحمر
كفاكا خلاص
ماتقعد فينا
تتسمر
[email][email protected][/email]
كرمتونا كلمة وثبة … أين كنتم 25 عام …. عايزين وثبة جديدة … هكذا وثبة الاسود بالترجل عن الحكم بسبب الفشل التام … فشل فشل فشل 25 عام فشل … ماذا تريدون بعد الفشل … وثبة الى أين ؟؟؟؟؟ الى البحر نؤديكم في ذلك ليرتاح الشعب منكم … والسودان … حتى أنني أرى هذه الايام قد ترجلت وتنازلت الاسود لكم من وثباتها … عند علمها بوثبتكم … حتى لا تقع في امواج فسادكم وفشلكم الذي لم يسبقة فشل في العالم … وأجمل وثبة فهى وثبت والى الخرطوم في شراء البصات من مالطا … أما وثبة وزير الدقاع فهى أحلى وثبه في الدفاع بالنظر … ووثبت حاج ساطور … هذه وثبة تتمناها اسود البركل … ووثبت على عثمان شفناها في اتفاقية نيفاشا وهى أكبر وثبة في التاريخ بتقسيم السودان … أما وثبت البشير بقتل 10 من أهلنا في دارفور … يا أخل المؤتمر الوطنى ما أجمل وثباتكم ويجب تدريسها في الجامعات والكليات العسكرية في كيفية الوثوب للوصول للفشل بأسرع وقت ممكن …
وثبة ولو طال السفر (معذره أستاذنا جبره)
قصيدتك في التنك. . .