في رثاء حفيدة السلطان عجبنا
إبراهيم الكرسني
أهدي هذه الكلمات الى روح الشهيدة “عوضية” حفيدة السلطان عجبنا، والى والدتها المكلومة الحاجة “الزهرة” والى جميع أفراد أسرتها الممتدة حتي جبال النوبة العظيمة التى أنجبت الرمز الوطني المناضل السلطان عجبنا.
اليوم داكا كان إتنين
يوما أسودا بلحيل
جونا عسس نصوص الليل
زي جيشا غزانا عديل
ناسن ضما سجمانين
وحرم ما بيشدوا الحيل
كتلوا بناتنا نص الليل
وحات إسم الله
دم عوضيي فوق رقبتنا ديمة يسيل
بلدا فيها شبانا يعدلوا الميل
بلدا فيها فرسانا يسرجوا الخيل
حرو كان يشيلوا التار
ويبهدلوا للجناة بهديل
…
تجار دين
يمين بالله تجار دين
حتى إن قالوا “بدريين”
كتلوا بناتنا.. بإسم الدين
أهانوا ولادنا.. بإسم الدين
أذلوا نسانا.. بإسم الدين
…
ومو خايفين…
يمين من الله مو خايفين
من رب العباد والعزة مو خايفين
لكن الظلم ما بطول
حتى إن كان بقالوا سنين
لابد من يجيكم يوم
ناخد تارنا “بين الثورة و السكين”
…
ثورة ناس يخافوا الدين
ناسن كانوا مظلومين
ناسن كانوا مقهورين
ثورة ناس كتير صابرين
لكين ضمه مو راضين
علي حكم الترك ساخطين
…
وحات إسم الله بس صابرين
مو خايفين
وكت أماتنا جن نايحات
يكوسن للبيحمي الدين
يمين بالله ديل فرسان
يضربو النار شمال ويمين
ديل أحفاد عجبنا الكان
بياكل النار دفاعا عن حقوق مسكين
وحرم ما بيترو ورا
وكت الحارة.. وكتين البنات تتهان
وكمان فوق داكا مظلومين
…
“عوضية” بت السلطان
موتك شرف السودان
شهادتك عزة للنسوان
ولا بد تارنا ناخدو عديل
مهما طالت الأزمان
ومهما تكروا ناس هولاكو
ما أصلو الكضب سلطان
…
أخو عوضيي فارق نومو ليهو شهور
وعد الوالد المبرور
وقال حرم
دمك ما بيروح مهدور
وحات إسم الله الكتلوكي مو عارفين
كتلوا المهرة.. كتلوا مهور
وتارك ناخدو
حنى إنكان بقالو دهور
….
الكتلوكي مهوسين
قالوا كتلنا بإسم الدين
دينن كوم
ودينا الضمة خاتي اللوم
دينا مابيكتل الزول كتل مظلوم
ودينن يكتل المظلوم
حتى إن شافوا
قدام بيتو ماشي يحوم
…
وعوضيي الشهادي دي كات مناها
من زمن السلطان عجبنا محمداها
يوم الباشبوزق تتلبد وراها
يوم ضربوها فى راسا وقفاها
زغردن آبنات ديمنا وشباها
فشان عوضيي مهرت لى دروب
الثورة والحرية بي جاها ودماها
لا يهمنا حفيدة من تكون بقدر ما يهمنا انها قتلت على أيدى الشرطة ويجب محاسبة المسئولين
الله يخليك
اولا نترحم علي روح الفقيده ونسال الله ان يسكنها فسيح جناته مع زمرة الشهداء ونسال الله ان يرينا يوم القصاص في القتله الحقيقيين وليس ضابط الشرطه وحده ……… ثانيا اتفق تماما مع المعلق سامي .. اذ يجب ان يكون النقد علي المبدا ولا اظن ان الاشاره للشخص باهله او قبيلته تفيد الموضوع بل العكس فهذا ما يكرس للعنصريه باشكالها المختلفه ( قبليه .. دينيه .. عرقيه .. الخ ..) فالظلم هو الظلم يا دكتور كرسني فلنحاربه من اين اتي وندافع عن المظلوم من كان هو …. عموما اعتقد ان مثل اشارتك هذه قد تاتي بحسن نيه ولكن يجب الانتباه لما نكتب يا دكتور خصوصا لمن يكتب للعامه امثالنا و يكون عموده مقروءا مثلكم .. ( فقط اقراالتعليق الثاني علي مقالك هذا ) الاخ المعلق (دكين )لا اعتقد ان تعليق سامي فيه ما يسئ للشهيده او اسرتها او غيره ……. مع الشكر والاحترام للجميع ..
عفوا اقصد التعليق الثالث باسم المعلق ( دكين )
عندما قال سامي لا يهمنا حفيدة من تكون لم يكن قصده تقليل من شأن السلطان عجبنا انما كان يقصد ان الجريمة يجب القصاص فيها بصرف النظر عن من قتل فهو مظلوم في الأول والآخر… انشاء الله المعلومة وصلت … وهو ينادي بمحاكمة المجرمين … وفي الختام اقول للجهل اكيد ليه ناسه.
انني آآسف للفهم القاصر لدى البعض عندما تحدثنا عن (لا يهمنا ابنة من تكون بقدر ما يهمنا ان ينال المجرم جزاءه ) لم يكن لتقليل من شأن السلطان عجبنا انما وجوب ايقاع الجزاء بالمجرم سواء قتل ابنة سلطان اوابنة انسان عادي يعني دعوتنا كانت لملاحقة المجرمين وليس لذكر امجاد احد افهموا
لم نسمع في التاريخ بالسلطان عجبنا واعتقد ان المجال لم يكن للحديث عنه بل كان للمطالبة بمحاكمة المجرمين
لا مجال هنا للعنصرية ووصف الآخرين بالجهل السيد سامي قصده واضح وهو طلب محاسبة المسئولين سواء القتيلة ابنة سلطان ول ابنة غفير