والى الخرطوم يطمئن الشعب : السودان سيبقى واحداً وآمناً من الجوع والخوف ..نتعهد بخلافة أيِّ مجاهد في أهله،، فترة من يذهب إلى الجهاد شهرين ليخلفه مجاهد آخر،

الخرطوم: مقداد خالد

جَدَّدَ د. عبد الرحمن الخضر والي الخرطوم، العهد والميثاق في أن يظل السودان وطناً واحداً آمناً من الجوع والخوف ومن أيِّ تهديدٍ، وأشاد بالقوات المسلحة التي ردعت المتمردين وصارت تمتلك زمام المبادرة. ووصف الوالي اللقاء الذي نظّمته اللجنة النسائية العليا للتعبئة والاستنفار بالولاية لمختلف قطاعات المرأة في المجلس التشريعي بحضور الوالي ورئيس المجلس التشريعي محمد الشيخ مدني وعدد من القيادات النسائية بالولاية أمس، بأنه إعلان من نساء الخرطوم لمؤازرة القوات المسلحة والدفاع الشعبي في صدهم للعدوان، وتَعهّد الوالي بخلافة أيِّ مجاهد في أهله، وأوضح أنّ فترة من يذهب إلى الجهاد شهرين ليخلفه مجاهد آخر، ونوّه الخضر إلى أنّ إعلان التعبئة والاستنفار لن يصرف الولاية عن الخدمات والتنمية والبناء، وأشار إلى افتتاح عدد من المشاريع الزراعية الكبيرة التي ستحقق الامن الغذائي خلال الأسبوع الماضي، وأضاف أن المفاوضات مع دولة الجنوب في أديس أبابا ستستمر لتحقيق السلام شريطة أن يتم الاتفاق على قضايا الترتيبات الأمنية أولاً، وأن رسالة القيادة لوفد التفاوض أن تظل الحدود آمنة ومستقرة.

الرأي العام

تعليق واحد

  1. رأيك شنو عزيزى الوالى إنو ناس الحكومه إبتداءاً من البشير يمشو الجهاد شهرين و الشعب يخلفهم

  2. وقال الوالى اى شخص يذهب الى الجهاد سنخلفه فى اهلهه يعنى حتتجوزو او تعرسوا مرتو دى قديمه شوفوا غيرها ما تمشوا انتو علشان نعرس حريمكم بلا هباله معاكم

  3. خلافة شنو يا كذابين,,,انا بعرف واحد في ايام الانقاذ الاولى ,,بحكم عمله في مصلحة حكومية اجبر على الذهاب الي الجهاد,,وبعد عودته تفاجأ بفصله من العمل للغياب,,,,قال خلافة قال..

  4. 23سنة من الحكم =حروب + جوع+ تقسيم = دمار للسودان فقط لا غير ….. حكومة حرب بأمتياز…لمدة23سنة!!

  5. ((دَّدَ د. عبد الرحمن الخضر والي الخرطوم، العهد والميثاق في أن يظل السودان وطناً واحداً آمناً من الجوع والخوف ومن أيِّ تهديدٍ))
    ومازالت حلقات المسلسل اليومي (نفاق ودجل وكذب)مستمرة !!!!!!!!

  6. العندو مره سمحه اوعي يمشي—-لانو الطياره ما حترك بيهو

    والخليفه في الاهل—وعيييييييييييييييييييييييييييييييك

  7. ونحن نذكر الناس بما جري من قبل في حرب الجنوب والتي راح فيها الكثير من ابناء السودان في ماكان يعرف بالدفاع الشعبي وايضا من ابنائنا في الجيش السوداني وماذا حصل بعد ان ذهبوا؟ تقسم السودان وذهبت كل خيرات السودان بما في ذلك البترول وتشتت الناس وكثرت الحروب والانقسامات وووووووو——الخ

  8. خليهم يرسلوا أولادهم هم في الأول، أصلهم قابضين خلافتهم مقدماً من أراضي و الي منهم، يعني جاهزين للجهاد و الاستشهاد، بعدين لو ما كفّوا يجيبوا أولاد الما لاقين حاجة. أستغرب كيف يملك هؤلاء الناس الجرأة على تجنيد أبناء الآخرين و الرمي بهم في أتون حرب لا ناقة لهم فيها و لا جمل، بينما أولادهم هم يعيشون في نغنغة و سفه لا حد له.

  9. انت منتظر شنو ما تمشى نحن بنحرس ليك عيالك ارمى قدام والخلف مؤمن بنسيبة يا حرامى تنوموا فى الكندشة وولاد الناس يموتوا والشيخ بتاعكم لم اختلف معاكم قال مافى حاج اسمه شهيد كمان كذابين نعل الله المنافقين

  10. اطمئنينا خلااااص ..
    مادام ردعتو المتمردين ومسكتو زمام المبادرة تاني التعبئة والاستنفار لشنو .. ووينو الامن البتتكلم عنو دا ؟؟

  11. المجاهد الذي يذهب لقتال الكفرة والملحدين في الثغور – وفسطاط الكفر – (6) اشهر ولكن لاادري السر الذي يجعلكم ان تتخلفوا عن المجاهدين (وتكونوا مع الخوالف ) وتقصروا المهمة على شهرين
    ثم اي جهاد تجاهدون في بلاد اهلها مساجدهم عامرة ويرفع فيها الآذان –
    انتم يا الخضر فصلتوا اسلام على طريقتكم وحسب مزاجكم ولهذا نتبرأ مما انتم فيه فقد بلغ تلاعبكم بالدين امرا توزعون فيه الجنة على الدفاع الشعبي – وهي مفردة تعتبر (بدعة) وهذا يؤكد انكم شر الناس وقد تلاعبتم بالاسلام واهل الاسلام .

  12. ياناس انتو الراجل ده قايل نفسه عبد الرحمن بن عوف هههه قال نخلفه في اهله بالله يفتح الله يا اخوي زمن الغباء انتهى

  13. زمان على عبد الفتاح واخوانه عليهم الرحمة ذهبوا لنصرة الدين ووحدة التراب.. وما عرفناهم شهداء ام فطائس ؟؟ اها المرة دى فتوتكم شنو ؟؟ انا هاهنا قاعدون .

  14. الوالي يا جماعه الخير صادق ميه فى الميه فى كلامه المره دى لانو اي مغفل راح يمشى يجاهد فى اخوانه ويموت فطيس ( الترابي) الجماعه ديل فعلا راح يخلفو فى اهلو و مرته لازم تستت و تعرس و تتعوض براجل جديد بدل الهبيل المات فطيس و الكلام ده اذا كانت سمحه ذى وداد مرت ابراهيم شمس الدين امااذا شينه اكلت هوا, و بعدين فى سوالى فى بالي ال115 مجاهد اللموهم ديل فى معسكر بالنيل الابيض و مشو خطبوا فيهم جماعه منبر الحرب الما عادل ديل و امام الفاعده الحاقد هسع ديل فيهم واحد من اقرباء الوالي ده ولده مثلا ود خال ود عم عمو وحتى لو كان بلفه كده يهنى اهوليه من بعيد؟؟ ماف اكيد . الحمد لله بقى فى السودان 115 مغفل بس بيبارو ويصدقوا الجماعه ديل . ما افتكر فى واحد فيهم راح يرجع تاني عشان يحكي لينا عن القرود و سكران الجنه لانهم حمام ميت بختكم يا ناس كاودا جاتكم بارده.

  15. ما من امرءٍ ولي امر من امور المسلمين ومات وهو غاش لهم الا قام يوم القيامة مكتوب بين عينية ايس من رحمة الله ((مدام انتو لسة حيين توبو…. وحتي لو تبتو حقي ما بخليهو ليكم)))

  16. انت ما قلت الجيش مسيطر علي الوضع لزوم الجهاد شنو واللة ربنا ما جاب زيكم في الكذب ……….اه ولدك قدام معانا ولا راجي الدور بعد الدفعة العاشره لما تجي

  17. تعليقات مش ولا بد
    والوالي يتكلم والمواطن يسمع والكسبان سيد الساوند وأنحنا الله يكون في عوننا
    قال خلافه قال

  18. وأوضح أنّ فترة من يذهب إلى الجهاد (شهرين) ليخلفه مجاهد آخر، …
    دسكاونت و كدا … !!!!!!!!
    تلقوها عند غافل المرة دي ..

  19. (نتعهد بخلافة أيِّ مجاهد في أهله)
    (نتعهد بخلافة أيِّ مجاهد في أهله)
    (نتعهد بخلافة أيِّ مجاهد في أهله)

    دي مصدقينكم فيها تب
    وكمان بتعقدوا على مرتو قبل ما تدفنوه

  20. خليه هو و الرئيس بتاع يمشوا يحاربوا ما في حد من الشباب بيمشي ليك تاني لانهم عرفوكم علي حقيقتكم يا والي كلكم دجالين و خداعين خدعة الناس الطيبين اهل السودان تنقذوا مين والله جاياكم زنقة اكعب من زنقة القذافي اليس هذا هو الوالي الذي قال من لا يستطيع ان يعيش داخل الخرطوم فليذهب الي خارج الخرطوم لان الخرطوم ملك ابوه و له ام ام باقي اهل هو اصلا كان عايش وين قبل ما يجىء الخرطوم كتر خير الحكومة جابتك من وين ما عارفين و الايام دول و الله المرة دي الشعب السوداني حيقطعكم تقطيع لان ما حصل حقد علي حكومة من الحكومات مثل هذه حيأكلوكم نيين بانيابهم لان مافي بيت من بيوت السودانيين ما حاقد عليكم

  21. جهاد المجانين ديل بيشترو النار بي قروشهم والقال ما دايرنو حي دا قشو مالو ما يمشي لابد في القصور ويقول للتعابة اولاد القبش امشو جاهدو ودي باي فتوى فتوة الجهاد في سبيل الله ام فتوى حروب الردة

  22. (بيع قبل الربيع!!!)
    همس المتعافى فى أضان عبدالرحمن الخضر قائلا:(بيع قبل الربيع!!)…ومن يومها والوالى ماسك جرسو …يوم تحت كبرى الحرية…يوم قدام مستشفى الخرطوم…يوم قدام مستشفى العيون…يوم قدام وزارة الشباب…يوم قدام ديوان المراجع العام…وعيييييك!وبعدين الوالى ما فاضى مافى بقالة ولللا مخبز ولللا محل تحويل رصيد الا تلقى الوالىفى افتتاحو…يعنى أمبارح فى سارية..اليوم القبليهو فى افتتاح مصنع الجداد بتاع هناى فى برى..واليوم القبليهو فى مزرعة هناى فى سوبا…يعنى حقو نغير اسمو من عبدالرحمن ل عبد (الفتاح!)…يعنى سعادتك فى داعى تكون وسط الحريم ديل..قال اللجنة النسائية العليا للتعبئة والاستنفار!!!ياخى ما تخلى وزيرة الشئون الاجتماعية بالولاية تمشى بدلك وتفضى انت شوية لكركر وجاكسون والخرطوم العفنانة ومليانة ضبان وبعوض دى…خاصة انو الوزيرة ما جات العزاءءبتاع عوضية عجبنا…ياخوى ماتشوف شغلك…وياحليل مهدى مصطفى الهادى!!!وده سعادتك ما لاعب كورة!!!

  23. انا مستعد امشي اليوم بس بشرط .. ان يكون في المقدمة علي عثمان و نافع و عبد الرحمن الخضر وكل قيادات المؤتمر الوطني .. وان يتم نقل المقر الرئيس للمؤتمر الوطني لتلودي وعقد جلسة هناك بكامل عضويتة ال5 مليون شخص

  24. ناس المؤتمر الوطنى هم من استفاد من خيرات الوطن و نهب البلاد و العباد و لذلك عليهم الآن أن يذهبوا الى الجهاد و نحن نتَعهّد بخلافتهم فى أهلهم، و على الوالي أن يترك الترطيبة و حياة الترف ليلحق بركب الجهاد هو و قبله البشير و على عثمان و نافع و كبار القوم و عليهم أن لا يرسلوا أبناء الشعب الى الموت و هم جالسون مع نسائهم المثنى و الثلاث و الرباع.

  25. خلاص و نحن نتعهد بخلافتك و خلافةاولادك امشى جاهد ساكت و اطمن على مرتك حا نخلفك عليها بسنة الله و رسوله و على عماراتك و على عرباتك ما تخاف خالص ارمى قدام هنا مامن جاهد جهادك سااااااكت

  26. وانت الراجيها شنو يا ود الخضر ؟ ارمى قدام وابقى قدوة .. ورا مؤمن وما تخاف والينا مش حا يعقد على مراتك..ده قلب كورولات وبطل سواقة الهايس ..

  27. انتوا يا جماعة الوالى مشى اجتمع مع اخوات نسيبةلعرس الشهيد ولا شنو؟ .. يظهر الشباب خذلوه وذهبوا الى الذهب بعد عجزه استيراد قرود لنزع الالغام وعدم الجزم ببقاء زوجاتهم فى الانتظار حتى عودتهم احياء..

  28. يا اخوي امش انت نحن بنحرس العقاب وسوق بشة وابوريالة و نافع ولوفي طريقة سوقوا رؤساء الاحزاب والخال
    قال جهاد قال

  29. أخوان البشير وولد نافع وولد عوض الجاز وولد الزبير (نسيب نافع) وأولاد المستشارين وأولاد الوزراء وأولاد المعتمدين ماشين يجاهدوا برضو ؟

  30. وآلي الخرطوم ليس رجل امين على الوطن العام وبدأت ببيع ممتلاك المواطنين وهم احياء ولقد صرحت في احد المقابلات بان سوف تبيع كل الاماكن العامة واملاك الدولة في مزاد علني بدأُ بمقر المعتمدية وكان هذه المؤسسات بتاعة ابوووووك

  31. أولاالبشير قال داير 16 الف شهيد ,, يعنى عاوز يغرض 16 الف شاب , طيب الجيش السودانى قاعد يسوى شنو ؟؟ والشرطه وكل القوات الموجوده فى السودان قاعده تسوى شنو ؟؟؟ ده ماشغلهم ّّ مش حرام يمشموا الشباب الجامعيين المؤهلين والقاعدين يدرسوا فى الجامعات يحصلوا فى العلم,وهم أمل البلاد لانهم كوادر مثقفه ,, يقوموا يودوهم عشان يموتوا فى الحرب التى سببها الصراع وراء السلطه,, والله هذا لايجوز فى أى شرع أن يذهب شباب الجامعات إلى ساحة المعركه ويموتوا , والجيش قاعد فى الخرطوم فى المكاتب المكيفه

  32. ودالخضر حدد الخلافة بشهرين لانو عارف الجماعة ديل مابيستروا الحال ولابد من مجاهدين جدد كل شهرين يعنى كده لما يجى الخريف يلحقنا امات طه وبذلك نقول لعقار ابشر بطول سلامة ياعقار

  33. نتعهد بخلافة أيِّ مجاهد في أهله،، ما بتقصروا يا كيزان خاصة لو زوجة المجاهد زي وداد وكده!!!

  34. و الله هسي الواحد لو قال ليهم انا بمشي ما بصدقوك يقولو معقوله في زول عوير للدرجه دي ؟ كلام الوالي دا للونسه السياسيه بس الجماعه ديل قنعانين من الجهاد و بقوا ناس طيراااان ساااااي

  35. خلافه المجاهدين يعني الماتو ا قبل كده خلفتوهم بايش شويت سكر وكم كيلو عدس وباقة من الزيوت وشوال بصل والله من يستمع لكلامك غير البلها والهبل من ابنا الشعب فقط

  36. خلافه المجاهدين يعني الماتو ا قبل كده خلفتوهم بايش شويت سكر وكم كيلو عدس وباقة من الزيوت وشوال بصل والله من يستمع لكلامك غير البلها والهبل من ابنا الشعب فقط

  37. سلام للجميع تعرفوا اجمل حاجة التعليقات ههههههههههههههههه
    جد النا س ديل ماعندهم زرة حياة والله الحمدلله الزول مادكس زمان ايام حرب الجنوب والحقيقة تقال انو الزول فقد جد ناس عزيزين في حرب الجنوب وصراحة مافي الذة من الشهادة بس الشهادة ايام عهد الرسول عليه افضل الصلاة والسلام والصحابة رضوان الله عليهم ما احلاك يا شهادة في عهدهم مش في عهد المنافقين ديل لعنة الله عليهمم

  38. الجديد من الحركة
    الخبر معاكم كيف يا ناس الموتمر الوثني و دجالين ألانتبهاة

    رئيس الجبهة الثورية السودانية: امتلكنا زمام المبادرة في الحرب ورددنا الصاع صاعين.. ونحن أقرب لكادوقلي والدمازين
    تحالف الجبهة الثورية (كاودا ) يعلن دخوله هجليج وبسط سيطرته بالكامل والجيش يتهم حكومة الجنوب
    نشر بتاريخ الإثنين, 02 نيسان/أبريل 2012 15:21
    (شبكة اخبار السودان-راديو دبنقا)

    أعلن تحالف الجبهة الثورية السودانية (كودا) أمس دخول قواتها المشتركة لمنطقة هجليج للبترول والاستيلاء عليها بشكل كامل، اعلن ذلك لراديو دبنقا من الميدان بدوى موسي الساكن الناطق الرسمي بإسم حركة العدل والمساواة وقال الساكن، ان قوات الجبهة الثورية المألفة من حركة العدل والمساواه ، وحركة تحرير السودان الوحدة ، والحركة الشعبية (جبال النوبة )، دخلوا هجليج أمس واستولوا عليها بالكامل . وقال الساكن ان قوات الجبهة قتلت المئات من القوات الحكومية، التي قال بأنها فرت وتركت اسلحتها وسياراتها وكل معداتها خلفها ن وتوعد الساكن بدخول الخرطوم

    ومن جهة اخرى هتفت قوات الجبهة الثورية التي كانت تحيط ببدوي موسى الساكن ، وهي تردد هتافات النصر، ودخول هجليج وقالت هذه القوات وهي تهتف كل ( القوة جوه الخرطوم، مع هتافات أخرى)

    وفي الخرطوم أكد العقيد الصوارمي خالد سعد الناطق الرسمي باسم القوات المسلحة أنه في تطور جديد للاحداث بولاية جنوب كردفان، حيث قام امس الجيش الشعبي التابع لحكومة جنوب السودان بالتوغل الى داخل الحدود السودانية بمسافة ثلاثة كيلومترات في منطقة التشوين بمنطقة هجليج في خرق واضح لكل المواثيق الدولية . واكد الصوارمي في تصريح نقله التلفزيون السوداني في ساعة متأخرة من ليل أمس ، ان القوات المسلحة تتعامل الآن مع هذه القوات التي وصفها بالمعتدية ، واكد الصورامي أن القوات المسلحة السودانية ستقوم بواجبها كاملاً في دحر ما أسماه بالغزاة ، وحماية الوطن والمواطنين. وأكد ان الجيش السوداني سيوافي الرأي العام السوداني بالتفاصيل لاحقا ، حالما ينجلي الموقف بمنطقة التشوين في هجليج

    ومن ناحية أخرى تبادل السودان وجنوب السودان الإتهامات بشن مزيد من الهجمات في المنطقة المنتجة للنفط التي تمتد على حدودهما، مما يقوض الأمال بشأن جولة جديدة من المحادثات تهدف الى إنهاء الاشتباكات. وكانت الاشتباكات التي اندلعت في البداية يوم الاثنين هدأت بعد يومين عندما خرجت القوات الجنوبية من حقل هجليج النفطي المتنازع عليه في الجانب السوداني من الحدود. لكن السودان شن يوم الجمعة هجوما جويا على مواقع جيش جنوب السودان الحدودية وفقا لتصريحات جنوب السودان. وقال متحدث باسم الجيش السوداني في الخرطوم، انه شن هجوما بالمدفعية فقط ، وليس بالطائرات ، وان الهجوم كان ردا فقط على هجوم بالمدفعية شنه في وقت سابق جيش جنوب السودان

  39. مافى اى جهاد بلاش دجل ياسر وعبدالعزيز ومالك يحاربون عمروعلى ونافع على الحكم وكلهم مسلمين وسودانيين ومثل ما اتت الانقاذ بانقلاب لهم الحق فى الانقلاب على نظام الانقاذ الانقلابى انت اوع تكون مصدق موضوع الانتخابات داك

  40. كان في السابق تجد بعض الاقلام تدافع عن النظام او افراد في النظام.ولكن الان انظر الى جميع الكتابات لن تجد شخص واحد يدافع عن هذا النظام الهالك باذن الله ,اما عن الجهاد فلو كان الوالي والرئيس وعلي ونافع وزمرتهم مقتنعين ان هذا جهاد (وللمجاهد احدى الحسنيين اما النصر او الشهادة)وان مابعده خير من قبله,فليذهبوا مع تمنياتنا لهم بالاستشهادونحن كفلاء بخلافتهم في اهلهم
    ان الذي تفعله الحكومة اليوم ليس استنفار للجهاد ولكن شراء بعض المرتزقة ليكونوا وقود للنار مقابل حفنة من الاموال وحفنة من الوعود(والمحرش مابقاتل)

  41. أن يظل السودان وطناً واحداً آمناً من الجوع والخوف ومن أيِّ تهديدٍ،

    جوع اكثر من الفيهو دا ؟ اسال الله ان يجوعك ويعطشك يوم القيامة وعند الموت

  42. و النسوان يا اخوانى بقسموهن حسب مؤهلاتن الجسدية, امثال ودة و جاى يذوجوهن و يعملو ليهن اليات لمص دماء االشعب. و تكديس اموالو فى لندن ? دبى وكوالالمبور و فيننا و جاى, و الاقل جمالاً كده ذواج عرفى و ياكلوهن بالقمتى, الا الذيى ناس كنتوشة ديل مخير الله, احسن ليكى يا كنتوشة امسكى ابو عيالك قوى, انشاء الله بالجوع , بس ما يعكشوه الجماعة الما عندو ليهم قدره ديل, و على الله.

  43. جهاد ؟! انتو قايلين الناس دى بتاكل برسيم؟ الناس الدايرين تحاربوهم ديا بيعرفو الدين و بيطبقوه أحسن منكم يا لصوص يا فاسدين يا مفسدين. قال جهاد قال !!

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى

انت تستخدم أداة تمنع ظهور الإعلانات

الرجاء تعطيل هذه الأداة، فذلك يساعدنا في الأستمرار في تقديم الخدمة ..